Read tshwa 2 Tihosi 5 Bible Online

2 Tihosi 5 - tshwa bible

2 Tihosi 5

¹Makunu Namani a nduna ya yimpi ya hosi ya le Siria i wa hi munhu wa hombe mahlweni ka hosi yakwe, a hi wo dzunzeka, hakuva Jehova i wa nyikile kuhlula ka maSiria ha yena. Na a ngha yena a hi wanuna wa nhenha, kanilezi na hi ni hlokonho.

²A maSiria ma wa hlomile a yimpi, ma ya khoma a nhanyana le tikweni ga ka Israeli, a ta tirela a sati wa Namani.

³Yena i te ngalo ka nwinyi wakwe: Loku a hosi ya mina yiya ka muprofeti loyi a nga le Samaria, i wa ta mu hanyisa.

⁴Namani i lo yisa timhaka leto ka hosi yakwe, a yaku: A nhanyana loyi a tako hi le tikweni ga ka Israeli i wulile lezi ni lezi.

⁵A hosi ya le Siria yi te ngalo: Suka u famba, nzi ta rumela a papilo ka hosi ya ka Israeli. I lo suka a teka a 10 wa titalenta ta siliva, ni 6,000 wa maxekeli ya nzalama, ni 10 wa tinguwo to saseka.

⁶Yena i lo yisa a papilo ka hosi ya ka Israeli gi nge ngalo: Loku gi chikela a papilo legi ka wena, u ta zi tiva lezaku nzi rumela Namani a nanza ga mina, kasi wena wa fela ku mu chuma a hlokonho yakwe.

⁷Makunu laha a hosi ya ka Israeli yi nga wa gonzile a papilo, yi lo hanzula a tinguwo ta yona, yiku: Kasi mina nzi Nungungulu loyi a zi kotako ku daya ni ku hanyisa, lezi a munhu loyi a rumelako a munhu lezaku nzi mu hanyisa a hlokonho yakwe ke? Hlolisisani, mu pimisisa mu ta wona lezaku i lava ku holova na mina. [12]

⁸Laha Elixa a munhu wa Nungungulu a nga wa zi zwile lezaku a hosi ya ka Israeli yi hanzule a tinguwo ta yona, i lo rumela a munhu ka hosi, a yaku: Hi kuyini u hanzula a tinguwo ta wena ke? A ate seno ka mina, kasi a fela ku zi tiva lezaku lomu tikweni ga ka Israeli ku na ni muprofeti.

⁹Zonake Namani i lo chikela ni mahaxi yakwe ni kareta yakwe, a ta yima laha nyangweni ya yindlu ya Elixa.

¹⁰Elixa i lo rumela a munhu a yaku kakwe: Famba u ya hlamba 7 wa zikhati le Congweni wa Jordani, a nyama ya wena yi ta hanya, u hlazeka. [13]

¹¹Namani i lo zangara, a suka a famba, na aku: Mina nzi waku i ta huma ata ka mina a ta khongela ka Jehova Nungungulu wakwe, a nzi phuphutela hi canja gakwe, a nzi chuma a hlokonho ya mina.

¹²Mina a nziku yi kona micongo le Damasku, vaAbana, na Farpara, a yi hunzi wontihe a mati ya tiko ga ka Israeli ke? Ngha nzi nga hlambangi ka yona rizi hlazeka ke? Zinghaho i lo tlhela a famba na a zangarile.

¹³Kanilezi a malanza yakwe ma lo tshinela kusuhani kakwe, maku: Dada, loku muprofeti a wa ku byelile a xilo xo binza, ngha u nga xi mahi ke? Makunu loku a ku byelile ku ngalo hlamba u ta hlazeka, a ku faneli a kuva u zi maha lezo ke?

¹⁴Zonake Namani i lo relela a ya ti peta 7 wa zikhati le Jordani, khwatsi hi kuwula ka munhu wa Nungungulu; zonake a nyama yakwe yi lo hola yi fanana ni nyama ya xihlangana, a hlazeka. [14]

¹⁵Namani i lo tlhela ni vanhu vakwe aya ka munhu wa Nungungulu; laha na chikele i lo yima mahlweni kakwe, aku: Nza zi tiva lezaku a nga kona Nungungulu lomu misaveni yontlhe, saseka lomu tikweni ga ka Israeli. Makunu amukela a xinyikiwo lomu canjeni ga nanza ga wena.

¹⁶Kanilezi Elixa i te ngalo: Nzi hlambanya ha Jehova a hanyako, loyi nzi mu khozelako, lezaku cima nzi nga ta amukela nchumu. Namani i lo mu kurumeta a kuva a amukela, kanilezi i lo ala.

¹⁷Namani i te ngalo: Kota lezi u alako, nzi vumele u nyika a nanza ga wena a misava leyi yi ringanako minzhwalo ya timbongola timbiri, hakuva a nanza ga wena cima a nga ta ha phahlela ka vanwani vanungungulu hi munyikelo wa kuhiswa, ntsena Jehova.

¹⁸Kambe Jehova a rivalele a nanza ga wena, loku a hosi ya mina yi enghena lomu ndlwini ka Rimoni a ku ya khizama kona, ni kuva a khegela wokweni ga mina, nzi kala mina nzi khizama lomu ndlwini ya Rimoni; ngha Jehova a rivalele a nanza ga wena loku nzi ya khizama lomu ndlwini ya Rimoni.

¹⁹Elixa i te ngalo kakwe: Famba hi kurula. Makunu laha Namani a nga wa fambile a pfhukana,

²⁰Gehazi a nanza ga Elixa a munhu wa Nungungulu, i te ngalo: A hosi ya mina yi tsikile Namani a muSiria loyi, a nga amukelangi lezi a zi nehileko mandleni yakwe. Nzi hlambanya ha Jehova a hanyako, nzi ta tsutsuma nzi mu lanza nzi ya teka nchumu ka yena.

²¹Zinghaho Gehazi i lo tsutsuma a lanza Namani. Laha Namani a nga wona a munhu na a tsutsuma lenzhako kakwe, i lo chika kareteni a mu khinga, aku: I thenga lezo!

²²Yena i lo hlamula, aku: I thenga! A hosi ya mina yi nzi rumile lezi: Ku chikele a vapfhumba va tako hi le xitsungeni xa ka Efraime, a majaha mambiri ya vapizani va vaprofeti. Va nyike a talenta ya siliva ni tinguwo timbiri.

²³Namani i te ngalo kakwe: Teka hi titalenta timbiri. I lo mu kurumeta a chela titalenta timbiri ta siliva lomu ka mikwama mimbiri zinwe ni tinguwo timbiri, a zi rwexa malanza mambiri kuwoneni ka Gehazi.

²⁴Laha a nga wa chikele le xitsungeni, Gehazi i lo zi teka mandleni yabye a zi veka lomu ndlwini, a tlhelisa a vanhu lavo va famba.

²⁵Kanilezi yena i lo yima mahlweni ka nwinyi wakwe; Elixa i te ngalo kakwe: Uta hi kwihi Gehazi? Yena aku: A nanza ga wena gi wa nga yangi ka kuya.

²⁶Kanilezi Elixa i te ngalo kakwe: Kasi a moya wa mina wu wa nga hi kona laha a munhu a nga chika kareteni yakwe a ku khinga ke? Kasi lexi hi xona xikhati xa ku teka a mali ni tinguwo ni maoliva, ni mavina, ni tiyivu, ni tihomu, ni malanza ya xinuna ni ya xisati ke?

²⁷A hlokonho ya Namani yi ta namarela ka wena ni vana va wena kala kupinzuka. Zonake Gehazi i lo suka mahlweni kakwe na a tele hi hlokonho leyi yi fananako ni gapongo. [15]