Read tshwa 2 Tihosi 6 Bible Online

2 Tihosi 6 - tshwa bible

2 Tihosi 6

¹A vapizani va vaprofeti va te ngalo ka Elixa: A yindlu leyi hi tshamako ka yona mahlweni ka wena, a yi eneli.

²A hi fambeni le Jordani, a munwe ni munwani i ta ya rwala a mhanze, kasi hi fela ku aka yinwani kwalaha. Yena i te ngalo: Fambani!

³A munwe wabye i te ngalo kakwe: Ngha u fambawu zinwe ni malanza ya wena. Yena i te ngalo: Nzi ta famba.

⁴I lo famba navo. Va lo chikela le Jordani va tsema timhanze.

⁵Kanilezi laha munwani a nga wa tsema a mhanze, a xihloka xi lo kunuka xi wela lomu matini. I loba huwa, aku: Nzi ta kuyini, hosi yanga! hakuva xi wa hi xo lomba.

⁶A munhu wa Nungungulu i te ngalo: Xi wele kwihi? I lo komba Elixa. Elixa a tsema a linhi a li hoxa kwalaho, a xihloka xi si deluka.

⁷Zonake aku: Xi teke. Yena i lo nawuluta a canja gakwe a xi teka.

⁸Makunu a hosi ya le Siria yi lo hlomelana ni va ka Israeli; i lo tsema xikungo ni malanza yakwe, aku: A wugovelo ga mina gi tava laha ko kari.

⁹Kanilezi a munhu wa Nungungulu i lo ya tivisa a hosi ya ka Israeli, aku: Ti wonele, u nga hunzi hi wutshamu go kari, hakuva a maSiria ma ta relela hi kwalaho.

¹⁰A hosi ya ka Israeli yi lo rumela a vanhu va yona ka wutshamu lego a munhu wa Nungungulu a mu byelileko a kuva a ti wonela. I lo ponisa wutsumbu gakwe, na ku nga hi khati ginwe kutani mambiri.

¹¹A hosi ya le Siria yi lo tshingelwa hi kuchava hi zilo lezo, a vitana malanza yakwe, aku ka wona: Hi nga nzi byelani lezaku himani xikari ka hina a yimelako a hosi ya ka Israeli!

¹²A munwe wa malanza yakwe i te ngalo kakwe: Hosi yanga, hi Elixa a muprofeti loyi a nga tikweni ga ka Israeli; hi yena a byelako a hosi ya ka Israeli a timhaka leti u ti wulawulako lomu ndlwini leyi u etlelako ka yona.

¹³A hosi yi te ngalo: Fambani mu ya wona laha a nga kona; nzi ta rumela a vanhu va ya mu khoma. Va lo mu byela, vaku: I le Dotani.

¹⁴Hikwalaho i lo rumela a mahaxi ni tikareta, ni yimpi ya hombe, va famba ni wusiku va ya ranzela muti.

¹⁵Laha a nanza ga munhu wa Nungungulu gi nga wa vukile ni mixo gi huma lahandle, gi lo wona a yimpi na yi ranzele a muti na yi hi ni mahaxi ni tikareta. A nanza gakwe giku: Hosi yanga, hi ta maha yini?

¹⁶Yena i te ngalo: U nga chavi, hakuva lava va nga na hina va tele ku hunza lava va nga na vona.

¹⁷Elixa i lo khongela, aku: Jehova, vulula a mahlo yakwe, kasi a fela ku zi wona. Jehova i lo vulula a mahlo ya nanza gi wona a xitsunga na xi tele hi mahaxi ni tikareta ta nzilo na zi ranzele Elixa. [16]

¹⁸A maSiria ma lo relela maya ka Elixa, yena a khongela ka Jehova, aku: Lamata a mahlo ya vanhu lava hi wukhumu. Jehova i lo lamata a mahlo yabye, khwatsi hi lezi Elixa a wulileko.

¹⁹Elixa i te ngalo kabye: Leyi a hi yona ndlela, hambu ni muti a hi wona lowu. Nzi lanzeleni nzi ta mu chiketa ka munhu loyi mu mu lavako. I lo va heleketa le Samaria.

²⁰Laha va nga wa enghenile lomu Samaria, Elixa i te ngalo: Jehova, va vulule mahlo yabye, kasi va fela ku wona. Jehova i lo vulula a mahlo yabye, va wona lezaku va wa hi laha xikari ka muti wa Samaria.

²¹Laha a hosi ya ka Israeli yi nga va wona, yi te ngalo ka Elixa: Dada, nzi va daya ke? Nzi va daya ke?

²²Elixa aku kakwe: U nga va dayi. U wa ta daya lava u va khomileko hi matlhari ya wena ni wura ga wena ke? Va nyike zakuga ni mati kasi va fela kuga vanwa, va ta tlhelela ka hosi yabye.

²³A hosi ya ka Israeli yi lo va mahela a kuga ko tala, yaga vanwa, a salisana navo, va tlhela va ti fambela ka hosi yabye. A mabutho ya maSiria a ma ha engetangi kambe mata lomu tikweni ga ka Israeli.

²⁴Anzhako ka lezo Ben-Hadade a hosi ya Siria i lo tsombanyisa yontlhe yimpi yakwe a kanziha ku ya hlasela Samaria; i lo ya vimbezela a muti.

²⁵A ndlala yi lo kula nguvu lomu mutini wa Samaria, kuva ni hlomulo wa hombe nguvu, laha ka kuva a hloko ya mbongola yi xabyiwa hi 80 wa maxekeli, a xipanze xa wumune xa wubheketse ga swanyi wa tuva xi xabyiwa hi ntlhanu wa maxekeli ya siliva.

²⁶Makunu laha a hosi ya ka Israeli yi nga wa hunza hi le hehla ka ligingisi, a wasati i lo yi vitana, aku: Nzi hlangute, hosi yanga!

²⁷A hosi yi te ngalo kakwe: Loku Jehova a nga ku hlanguti, mina nzi ta ku hlanguta hi yini? Hi lezi zi humako hi lomu nzhimbyeni kutani hi lezi zi humako hi lomu xigowolweni ke?

²⁸A hosi yi lo engeta yiku kakwe; Na ya kuva mhaka muni u nga nayo? A wasati aku: Loyi wasati i ngalo ka mina: A hige a nʼwana wa wena nyamutlha, manziko hi taga wa mina. [17]

²⁹Zinghaho hi bhikile a nʼwana wa mina higa. Makunu a siku gi gamelako nzi te ngalo kakwe: Nehawu wa wena higa: kanilezi yena i fihlile wakwe.

³⁰Laha a hosi yi ngazwa timhaka leto ta wasati, yi lo hanzula a tinguwo ta yona. Na a hunza hi le hehla ka ligingisi, a vanhu va lo mu wona lezaku i wa ambele a tinguwo ta tisakwa a ti maha zirangiso.

³¹Zonake i te ngalo: Nungungulu a engete hi ntamu, loku a hloko ya Elixa nʼwana Xafate yi tshama hehla kakwe nyamutlha!

³²Elixa i wa tshamile lomu ndlwini yakwe zinwe ni masingalakati. A hosi yi lo mu rumela a munwe wa malanza ya yona. Na wu nga se chikela a ntsumi, Elixa i te ngalo ka masingalakati: Langutani a nʼwana wa mudayi, loyi a rumelako a munhu a ku ta nzi tsema a hloko! Langutani! Loku a ntsumi wu chikela, valani livati, mu mu susumeta ha lona. Ma zizwa a zigingi za hosi yakwe yi mu lanzako ke?

³³Laha a nga wa ha wulawula navo, a ntsumi wu lo relela, wu taku kakwe: Languta a mhango yi tako hi ka Jehova! Xana nza ha rinzela yini ka Jehova ke?