Read tshwa 2 Tihosi 7 Bible Online

2 Tihosi 7 - tshwa bible

2 Tihosi 7

¹Elixa i te ngalo: Zwanani nwina a mhaka ya Jehova! Jehova i ngalo: Manziko hi xwalexi xikhati, a Xipimo xinwe xa mapa yo saseka xi ta xabyiwa hi xekeli, ni zipimo zimbiri za sevada zi ta xabyiwa hi xekeli lomu tinyangweni ta Samaria. [18]

²Kanilezi a nduna ya hosi leyi yi khegelako laha canjeni ga yona, yi lo hlamula a munhu wa Nungungulu, yiku: Hambu loku Jehova a vulula a tinjhanela ta le tilweni, lezo zilo u zi wulako cima zi nga mahekisa kuyini? Elixa i lo hlamula, aku: U ta zi wona hi mahlo ya wena, kanilezi cima u nga ta ziga.

³Makunu laha nyangweni ya muti ku wa hi kona mune wa vanhu va hlokonho; va wa wutisana vaku: Hi ta tshama kwalaha kala hifa ke?

⁴Loku hiku: A hi engheneni lomu mutini, a ndlala yi kwalomu mutini hi ta ya fela kona; loku hi tshama laha, hi tafa kambe. Hikwalaho a hi releleni hi ya wugovelweni ga vaSiria; loku va ya hi tsika hi hanya, hi ta hanya; loku va hi daya, hi tafa.

⁵Va lo suka laha gambyeni va ya enghena lomu wugovelweni ga maSiria; laha va nga chikela laha nyangweni ya wugovelo, languta, ku wa nga hi na munhu.

⁶Hakuva Jehova i wa zwatisile le wugovelweni ga maSiria a guwa ga tikareta, ni ga mahaxi, ni ga yimpi ya hombe; zonake vaku ka munwe ni munwani: A hosi ya ka Israeli yi hi rambele a tihosi ta vaHiti ni ta vaGipite a ku ta hi hlasela. [19]

⁷Hikwalaho va lo suka va tsutsuma laha gambyeni, va tsika matenda ni mahaxi yabye, ni timbongola tabye, ni wugovelo va gi siyisa zalezo va tsutsuma va ponisa wutomi gabye basi.

⁸Loku a vahlokonho va chikele magumo ka wugovelo, va lo enghena lomu xaxeni munwe vaga, vanwa, va rwala a siliva ni nzalama, ni tinguwo va ya zi fihla. Va lo wuya va ta enghena ka munwani xaxa, va phanga kambe a mali va ya yi fihla.

⁹Zonake va lo wulawula xikari kabye, vaku: Hina a hi mahi khwatsi! A siku legi i siku ga mahungu yo saseka, kanilezi hina ho miyela basi; loku hi rinzela ku ngalo ga ha taca, hi ta ta kumiwa na hi hi ni nanzu. A hi fambeni hi ya tivisa va le ngangweni wa hosi.

¹⁰Zinghaho va lo ya vitana a murinzeli wa muti, va mu tivisa vaku: Hi enghenile lomu wugovelweni ga maSiria, kanilezi a hi kumangi munhu hambu ni kuzwa a gezu ga munhu, ntsena a mahaxi ni timbongola ti bohilweko, ni matenda ma wa siyisihve zalezo.

¹¹I lo vitana varinzeli va tinyangwa, va ya tivisa a timhaka leto le ndlwini ya hosi.

¹²A hosi yi lo suka ni wusiku, yiku ka malanza ya yona: Nzi ta mu byela lezi a maSiria ma zi mahileko. Vona va zi tiva lezaku hi na ni ndlala ya hombe, hikwalaho vona va humele lomu wugovelweni va ya fihlala lomu khwatini, vaku: Loku va huma hi lomu mutini, hi ta va khoma na va ha hanya zonake hi enghena lomu mutini.

¹³Kanilezi munwe wa malanza yakwe i te ngalo: A vanwani a va teke a ntlhanu wa mahaxi lawa ma seleko lomu mutini, hakuva me khwatsi hi xidlemo xa va ka Israeli lexi xi mbhelileko; a hi va rumeni ha nga zi wona.

¹⁴Va lo teka tikareta timbiri ni mahaxi ya tona, a hosi yi rumela a vanhu le wugovelweni ga maSiria, yiku kabye: Fambani mu ya wona!

¹⁵Va lo suka va va lanza va ya chikela le Jordani, va wona laha ndleleni na ku mbambamele tinguwo ni matlhari, lezi zi nga wa hoxetelwe hi maSiria xikhatini lexi va nga wa tsutsuma. A mitsumi yi lo tlhela yi ta bikela a hosi.

¹⁶A vanhu va lo huma va ya phanga a wugovelo ga maSiria. Zinghaho a Xipimo xa mapa yo saseka xi lo xabyiwa hi xekeli, a zipimo zimbiri za sevada zi xabyiwa hi xekeli, khwatsi hi lezi Jehova a wulileko.

¹⁷A hosi yi wa rumile a nduna leyi yi khegelako canjeni gakwe a ku ya hlayisa a nyangwa; yona yi lo kanzihelwa lahasi hi mikonzo ya vanhu vo tala, afa, khwatsi hi lezi a munhu wa Nungungulu a nga wa wulile a siku legi a nga relela aya kakwe.

¹⁸Hakuva laha a munhu wa Nungungulu a nga wulawula ni hosi, i wa te ngalo: Manziko hi xwalexi xikhati le nyangweni ya Samaria, a zipimo zimbiri za sevada zi ta xabyiwa hi xekeli, ni Xipimo xa mapa yo saseka xi ta xabyiwa hi xekeli.

¹⁹A nduna yi wa hlamule a munhu wa Nungungulu, yiku: Hambu loku Jehova a vulula a tinjhanela ta le tilweni, zi nga kala zi mahisa kuyini lezo ke? Makunu Elixa i wa te: Wena u ta zi wona hi mahlo ya wena, kanilezi u nga ta ziga.

²⁰Zi lo mahisa zalezo; vanyingi va lo mu kanzihela hi mikonzo le nyangweni, afa.