Read tshwa 2 Tihosi 8 Bible Online

2 Tihosi 8 - tshwa bible

2 Tihosi 8

¹Makunu Elixa i wa tivisile a wasati loyi a nga mu hanyisela a nʼwana wakwe, aku: Suka ni ngango wa wena u ya luvela lomu u ta nga ku kuma, hakuva Jehova i vitanile a ndlala lomu tikweni; yi tava kona 7 wa malembe. [20]

²A wasati i lo suka a maha khwatsi hi lezi a munhu wa Nungungulu a mu byelileko. I lo suka ni ngango wakwe a ya luvela le tikweni ga vaFilistia 7 wa malembe:

³Na ku hunzile 7 wa malembe, a wasati i lo wuya hi le tikweni ga vaFilistia aya le hosini a ya kombela a yindlu yakwe ni masimu yakwe.

⁴Makunu a hosi yi wa wulawula na Gehazi, a nanza ga munhu wa Nungungulu, yiku: Wa nga nzi byela yontlhe mitiro ya hombe leyi Elixa a nga yi maha!

⁵Laha Gehazi a nga wa hlawutela hosi lezi Elixa a nga hanyisisa zona a mufana loyi a nga wa file, a nyine wa mufana loye i lo kanyuluka a kombela a yindlu yakwe ni masimu yakwe. Gehazi aku: Hosi yanga, hi yaloyi wasati wa kona; ni mufana wa kona hi loyi, loyi a nga hanyiswa hi Elixa.

⁶Laha a hosi yi nga wutisa wasati loye, i lo yi hlawutela. Zinghaho a hosi yi lo rumela a nanza ku famba naye, aku ka gona: Famba u ya mu tlhelisela zontlhe lezi zi nga wa hi zakwe, ni mihanzu yontlhe leyi yi humileko lomu masinwini yakwe kusukela a siku lego a nga famba ha gona kala nyamutlha lezi.

⁷Elixa i loya le Damasku. Ben-Hadade a hosi ya le Siria i wa babya! Va lo mu byela, vaku: A munhu wa Nungungulu i chikele lomu!

⁸A hosi yi te ngalo ka Hazaeli: Teka a zinyikiwo u ya wonana ni munhu wa Nungungulu, u wutisa ha yena ka Jehova, uku: Xana nzi ta kalamuka ka legi wubabyi ke?

⁹Zinghaho Hazaeli i lo ya wonana naye; i lo teka zontlhe zo saseka za le Damasku zi ringanako ku rwaliwa hi 40 wa makameli; i lo ya chikela a yima mahlweni kakwe, aku: Nʼwana wa wena Ben-Hadade a hosi ya le Siria i nzi rumile ka wena a ku ta ku wutisa lezaku: Xana nzi ta kalamuka ka legi wubabyi ke?

¹⁰Elixa i te ngalo kakwe: Famba u ya mu byela ku ngalo: U ta kalamuka; kanilezi Jehova i nzi kombisile lezaku wena u tafa futsi.

¹¹A munhu wa Nungungulu a si mu cwalalala lomu nghoheni yakwe kala ave ni tingana. A munhu wa Nungungulu i lo rila.

¹²Hazaeli i te ngalo: Hosi yanga, hi yini u rilako? Yena i lo hlamula, aku: Hi lezi nza yi tiva a xapi leyi u ta nga yi maha ka vanana va ka Israeli: u ta hisa a makhokhola yabye, u daya majaha yabye hi tlhari, u pswhandlasela a zivanana zabye, u bhoxetela a marumbu ya vasati vabye va nga ni tinyimba.

¹³Kanilezi Hazaeli i te ngalo: A nanza ga wena gi ta mahisa kuyini lezo zilo na hi mbyana ya ku tani? Elixa i lo hlamula, aku: Jehova i nzi kombisile lezaku wena u tava hosi ya Siria.

¹⁴Zonake Hazaeli i lo suka ka Elixa a wuya ka hosi yakwe, leyi yi nga mu wutisa, yiku: Elixa i ku byelile yini ke? Yena a hlamula, aku: I nzi byelile lezaku hakunene u ta kalamuka.

¹⁵Hi siku gi gamelako, Hazaeli i lo teka a kumba a wu peta lomu matini a fenengeta a nghohe ya hosi ha wona, kala yona yifa. Zonake Hazaeli i lo fuma xikhundleni xa yona.

¹⁶Hi lembe ga wuntlhanu ga kufuma ka Joramu nʼwana Ahabi a hosi ya ka Israeli, Jehoxafate na hi hosi ya ka Juda, Jehoramu nʼwana wakwe i lo sangula ku fuma.

¹⁷I wa hi ni 32 wa malembe laha a nga sangula ku fuma, a fuma le Jerusalema 8 wa malembe.

¹⁸I lo lanzela tindlela ta tihosi ta ka Israeli, kota lezi yi nga wa mahile a yindlu ya ka Ahabi, hakuva a sati wakwe i wa hi nwaAhabi. I lo maha lezi zi bihileko mahlweni ka Jehova.

¹⁹Hambu lezo, Jehova a nga lavangi ku lovisa Juda, hi kota ya nanza gakwe Davida, khwatsi hi lezi a nga wa mu tsumbisile lezaku i ta mu nyika a kandiya xikari ka vanana vakwe kala kupinzuka. [21]

²⁰Xikhatini xakwe Edomi, i lo hluwuka ka Juda, a ti yimisela a hosi.

²¹Zonake Joramu i lo hunza le Zaira ni tikareta takwe tontlhe. I lo vuka ni wusiku a hlasela a vaEdomi lava va nga wa mu ranzele, ni tinduna ta tikareta, kanilezi a vanhu vakwe va panzanyeka vaya matendeni yabye.

²²Zinghaho Edomi i lo ti hambanyisa na Juda kala nyamutlha lezi. Ka xwalexo xikhati yenawu Libna i lo hluwuka. [22]

²³A zinwani zimaho za Joramu ni mitiro yakwe zi tsalilwe lomu bhukwini ga Matimu ya tihosi ta ka Juda.

²⁴Joramu i lo etlela zinwe ni vararu vakwe le mutini wa Davida. A nʼwana wakwe Ahazia i lo fuma xikhundleni xakwe.

²⁵Hi lembe ga wu 12 ga kufuma ka Joramu nʼwana Ahabi a hosi ya ka Israeli, Ahazia nʼwana Jehoramu a hosi ya ka Juda i lo sangula ku fuma.

²⁶Ahazia i wa hi ni 22 wa malembe laha a nga sangula ku fuma. I lo fuma lembe ginwe le Jerusalema. A vito ga nyine wakwe i wa hi Atalia wa Omri, a hosi ya ka Israeli.

²⁷I lo lanzela mahanyela ya yindlu ya ka Ahabi: i lo maha lezi zi bihileko mahlweni ka Jehova, kota yindlu ya ka Ahabi, hakuva i wa hi mwane wa yindlu leyo.

²⁸I lo hloma zinwe na Joramu nʼwana Ahabi a ku yalwa ha Hazaeli a hosi ya Siria le Ramote-Gileade; kanilezi a maSiria ma lo mu tlhava Joramu.

²⁹Hosi Joramu i lo tlhela a famba le Jezreeli a ku ya chumiwa kona a timbanga leti a maSiria ma nga wa mu tlhavile le Rama, a yimpini leyi va nga yalwa na Hazaeli a hosi ya maSiria. Ahazia nʼwana Jehoramu a hosi ya ka Juda i lo relela aya Jezreeli a ku ya wona Joramu, nʼwana Ahabi, hakuva i wa babya.