Read tshwa 1 Kronekele 10 Bible Online

1 Kronekele 10 - tshwa bible

1 Kronekele 10

¹Makunu a vaFilistia va lo hloma matlhari va vukela va ka Israeli; a vavanuna va ka Israeli va lo panzanyeka va tsutsuma mahlweni ka vaFilistia, kuwa vanyingi hi ku dawa le xitsungeni xa Gilboa. [9]

²A vaFilistia va lo tsimbeketa va lanza Saule ni vana vakwe; zonake va lo daya Jonatani na Abinadaba, na Malkixua, a vana va Saule.

³A yimpi yi lo binzela Saule, kala a kamanyetwa hi vaweleli va mawura va mu fula.

⁴Zonake aku ka muweleli wa matlhari yakwe: Hlomula a supado ya wena u nzi tlhava, nzi nga xakelwa hi makhuna lawa. Kanilezi a muweleli wa matlhari yakwe i lo ala, hakuva i wa chava nguvu; hikwalaho Saule i lo teka a supado yakwe a ti tlhava ha yona.

⁵Laha a muweleli wa matlhari yakwe a nga wona lezaku Saule i file, yenawu i lo ti tlhava hi supado yakwe afa.

⁶Zinghaho Saule i lofa ni vana vakwe va vanharu, vontlhe va yindlu yakwe va lofa khatiginwe.

⁷Laha vontlhe vavanuna va ka Israeli lava va nga wa akile lomu nkoveni va nga wonile lezaku yimpi yabye yi tsutsumile, ni lezaku Saule ni vana vakwe va file, vonawu va lo tsika a miti yabye va tsutsuma. Zonake a vaFilistia va lota va ta tshama ka yona.

⁸Makunu hi siku gi gamelako, laha a vaFilistia va ngata ku ta kaza a vafileko, va lo ta kuma Saule ni vana vakwe na va file le xitsungeni xa Gilboa.

⁹Va lo mu kaza, va tsema a hloko yakwe, va teka ni matlhari yakwe; zonake va lo rumela a vanhu lomu tikweni gontlhe ga vaFilistia va ya bika mahungu lawo zifananisweni zabye ni ka vanhu va tiko.

¹⁰Va lo veka a matlhari yakwe lomu ndlwini ya vanungungulu vabye, va tihomeka a hloko yakwe lomu ndlwini ya Dagoni.

¹¹Laha a tiko gontlhe ga Jebexe-Gileade gi nga zwile zontlhe lezi a vaFilistia va mahileko ka Saule,

¹²tontlhe tinhenha ti lo suka ti ya teka a xirumbi xa Saule ni zirumbi za vana vakwe va zi neha le Jebexe, va ketela marambu yabye lahasi ka nkanyi le Jebexe, va yila ntlhanu wa masiku ni mambiri.

¹³Zinghaho Saule i lofa hi kota ya zionho zakwe lezi a nga onhela ha zona Jehova, hi kota ya gezu ga Jehova legi a nga kala ku gi hlayisa a vitana a mufi ku ta mu byela timhaka. [10]

¹⁴A nga wutisangi ka Jehova, hikwalaho Jehova i lo mu daya, a nyikela mufumo ka Davida a nʼwana Jese.