Read tshwa 1 Kronekele 11 Bible Online

1 Kronekele 11 - tshwa bible

1 Kronekele 11

¹Zonake vontlhe va ka Israeli va lo tsombana khatiginwe ka Davida le Hebroni, vaku kakwe: Languta, hina hi marambu ya wena ni nyama ya wena.

²A zikhatini zi hunzileko, na ka ha fuma Saule, ku wa hi wena u nga rangela Israeli. Na Jehova Nungungulu wa wena i ku byelile, aku: Hi wena u ta nga risa a vanhu va mina uva murangeli vabye, va ka Israeli. [11]

³Zinghaho wontihe masingalakati ya ka Israeli ma lota ka hosi le Hebroni, Davida a maha xivumelwano navo mahlweni ka Jehova, zonake vona va tota Davida a kuva hosi ya va ka Israeli le Hebroni, khwatsi hi lezi Jehova a wulileko hi nomu wa Samueli.

⁴Davida i lo famba zinwe ni vontlhe va ka Israeli le Jerusalema (hi Jebusi); a vajebusi, va nga hi vaaki va lomo tikweni, va wa hi kona.

⁵A vanhu va le Jebusi va te ngalo ka Davida: Cima u nga ta enghena lomu! Hambu lezo Davida i lo teka a khokhola ga Zioni; ku lo maha a muti wa Davida.

⁶Davida i te ngalo: Kani hi wihi a ta nga ranga a hlula a vajebusi, i ta maha hosana ni nduna. Joabe nʼwana Zeruia i lo ranga a kanziha; a si mahiwa hosana.

⁷Davida i lo tshama lomo khokholeni, hikwalaho va lo wu chula lezaku i muti wa Davida.

⁸I lo aka a khokhola ga muti kusukela Milo, gi renzelekela matlhelo wontihe. Joabe i lo aketa a xipanze xinwani xa muti.

⁹Davida i lo enzelekelana aya mahlweni, a kula hi ntamu, hakuva Jehova wa tiyimpi i wa hi zinwe naye. A tinhenha ta Davida.

¹⁰Makunu leti hi tinhenha ta hombe ta Davida, leti ti mu tiyisetako lomu mufunweni wakwe, zinwe ni vontlhe va ka Israeli, a ku mu maha hosi, khwatsi hi lezi Jehova a wulileko xungetano ni va ka Israeli.

¹¹Makunu a tsengo wa tinhenha ta Davida hi lowu: Jaxobeamu nʼwana Hakmoni, a murangeli wa tinduna, loyi a nga tlakusa a tlhari gakwe a hlasela a 300 wa vavanuna khati ginwe.

¹²Yena i wa lanzelwa hi Eleazare nʼwana Dodo a muAhohi; i wa hi munwe wa tinhenha tinharu.

¹³Hi yena a nga wa hi zinwe na Davida le Pas-Damima, laha vaFilistia va nga wa tsombene kona kasi kulwa; laha ku nga wa hi ni simu gi teleko hi mavele, laho a vanhu va nga tsutsuma va chava vaFilistia.

¹⁴Va lo yima xikari ka simu va gi vikela, va hlasela vaFilistia, Jehova a va nyika kuhlula ka hombe.

¹⁵A tinduna tinharu ka lava va 30, ti lo relela tiya ka Davida le ribyeni, lomu muhumeni wa le Adulama, a mabutho ya vaFilistia na ma govile le nkoveni wa Refaime.

¹⁶Xikhatini lexo Davida i wa hi le khokholeni; a mabutho ya vaFilistia ma wa hi le Betlehema.

¹⁷Davida hi kota yo xuva, i te ngalo: Ko khwatsi nzi nga kuma a munhu wa ku nziha a mati ya hlowo ya le nyangweni ya Betlehema nzinwa!

¹⁸A tinhenha leti tinharu ti lo Suka ti tsemakanya a mabutho ya vaFilistia, ti yakha mati le hlobyeni ya le nyangweni ya Betlehema, ti ma neha ka Davida; kanilezi Davida i lo ala ku manwa, a ma chulula mahlweni ka Jehova,

¹⁹aku: A zive kule na mina a ku maha za kunghahi! Nzi nganwa a nkhata wa vavanuna lava va nga yisile wutomi gabye mhangweni ke? Hakuva vona va nzi nehele mati lawa hi ku nyikela wutomi gabye. Hikwalaho i lo ala kunwa. Lezo zi mahilwe hi tinhenha tinharu.

²⁰Abixai a nakulobye wa Joabe i wa hi hosana ya tinduna, hakuva yena i lo teka a tlhari gakwe alwa ni 300, a va daya. I wa hi ni vito xikari kabye va vanharu.

²¹Xikari kabye va vanharu i wa dzunzeka ku hunza lava va vambiri; i lo maha wahombe wabye. Kanilezi a nga kumangi xikhundla xa lava vanharu vo sangula.

²²Benaia nʼwana Jehoiada wa Kabzeeli, loyi a nga mahile mitiro ya wunghwazi, i lo daya a vana vambiri va Ariel wa le Moabi; hi yena kambe a nga relela aya rinzini a ya daya a nghala hi siku ga xirami.

²³Hi yena kambe a nga daya muGipite wa xihotlovila xa ntlhanu wa mikono a kuleha ka xona. A muGipite loye i wa khomile a tlhari go fanana ni mbingo wa muluki. Benaia a si relela a mu yela, na welele a nhonga, a ya wutla a tlhari lego canjeni gakwe a mu tlhava ha gona.

²⁴Hi lezo zi mahilweko hi Benaia nʼwana Jehoiada; i wa hi ni vito xikari ka tinhenha leti tinharu.

²⁵I wa dzunzeka ku hunza lava va 30, kanilezi i wa nga ringani ni lava va vanharu vo sangula. Davida i lo mu maha murangeli wa tinghwazi ti mu rinzelako.

²⁶A tinhenha ta yimpi ti wa hi leti: Asaheli nakulobye wa Joabe, Elhanana nʼwana Dodo wa le Betlehema;

²⁷Xammote a muHarore, Helezi a muPeloni;

²⁸Ira nʼwana Ikexa a muTekoa, Abiezera a muAnatote;

²⁹Sibbekai a muHuxate, Ilai a muAhohi;

³⁰Maharai a muNetofate, Helede nʼwana Baana a muNetofate;

³¹Itai nʼwana Ribai wa le Gibea, wa vana va ka Benjamini; Benaia a muPiratoni;

³²Hurai wa le Nehale-Gaaxa, Abieli a muArbate;

³³Azmavete a muBaharumi, Eliaba a muXaalboni;

³⁴Bene-Haxuma a muGizoni, Jonatani nʼwana Xage a muHarare;

³⁵Ahiamu nʼwana Sakara a muHarare, Elifali nʼwana Uri;

³⁶Hefera a muMekerate, Ahija a muPeloni;

³⁷Hezro a muKarmeli, Naarai nʼwana Ezbai;

³⁸Joeli nakulobye wa Natani, Mibhara nʼwana Hagri;

³⁹Zeleke a muAmoni, Naharai a muBerote, a muweleli wa matlhari ya Joabe nʼwana Zeruia;

⁴⁰Ira a muItri, Garebe a muItri;

⁴¹Uria a muHiti, Zabada nʼwana Alai;

⁴²Adina nʼwana Xiza a muRubeni, a hosana ya ka Rubeni, yi nga wa hi ni 30 wa vavanuna;

⁴³Hanana nʼwana Maaka, na Joxafate a muMitni;

⁴⁴Uzzia a muAxterate, Xama na Jeieli a vana va Hotamu a muAroera;

⁴⁵Jediaeli nʼwana Ximri, ni nakulobye Joha a muTizi;

⁴⁶Elieli a muMahavi, Jeribai na Joxavai a vana va Elnaamu, na Itma a muMoabi;

⁴⁷Elieli, na Obedi, na Jaasieli a muMezobai.