Read tshwa 1 Kronekele 12 Bible Online

1 Kronekele 12 - tshwa bible

1 Kronekele 12

¹Hi valava va ngata ka Davida le Ziklagi, na a ha hi kufihlaleni ka ku chava Saule nʼwana Kixi; va wa hi xikari ka tinhenha leti ti nga wa mu vuna yimpini.

²Va wa hlomile mawura, va zi kota ku hoxa maribye hi canja ga xinene ni ga xibhabha; va wa humela xikari ka vanakulobye va Saule, va ka Benjamini.

³A nduna ku wa hi Ahiezera, ku gamela Joaxi, a vana va Xema a muGibeate; na Jezieli, na Pelete, a vana va Azmavete; na Beraka, na Jehu a muAnatote;

⁴na Ixmaia a muGibeoni, a wanuna wa ntamu ni nduna xikari ka lava va 30, na Jeremia, na Jehazieli, na Johanani, na Jozabada a muGederate;

⁵Eluzai, na Jermote, na Bealia, na Xemaria, na Xefatia a muHarufe;

⁶Elkana, na Ixia, na Azareli, na Joezera, na Jaxobeamu a vana va Kora;

⁷na Joela, na Zebadia, a vana va Jerohamu wa le Gedora.

⁸A vanwani vavanuna va ntamu hi va ka Gadi, lava va sukileko vaya ka Davida le khokholeni ga le xiwuleni; va wa hi tinhenha ti tivako a kulwa yimpi, va khomako matlhari ni zitlhangu, lava a tinghohe tabye ti nga wa fana ni ta tinghala, va tsutsuma ku fana ni timhuti hehla ka zitsunga.

⁹A nduna ku wa hi Ezeri, ku gamela Obadia, a wa wunharu hi Eliabe,

¹⁰a wa wumune ku wa hi Mixmanna, a wa wuntlhanu hi Jeremia;

¹¹a wa wu 6 hi Attai, a wa wu 7 hi Elieli;

¹²a wa wu 8 hi Joanani, a wa wu 9 hi Elzabada;

¹³a wa wu 10 hi Jeremia, a wa wu 11 hi Makbannai.

¹⁴Lava hi vavanuna lava va humako xikari ka vana va ka Gadi, va nga wa hi tinduna ta yimpi. Loyi tsongwani i wa ringana ni 100, loyi wa hombe i wa ringana ni 1,000.

¹⁵Lava hi lava va nga tlhatuka Jordani hi hweti yo sangula, laha a congo wu nga wa tele wu tlhela wu hlata, va hlongola vontlhe lava va nga wa hi mikoveni hi tlhelo ga Mutsuwuka-gambo ni ga Muhlwa-gambo.

¹⁶Ku wa hi kona a vana va ka Benjamini ni va ka Juda, lava va ngaya ka Davida le khokholeni.

¹⁷Davida i lo huma a va khinga, a wulawula kabye, aku: Loku nwina muta ka mina hi kurula kasi ku ta nzi vunetela, nzi ta tlhangana na nwina hi mbilu ya mina; kanilezi loku ku hi ku ta nzi xengetela, mu nzi nyikela ka valala va mina na nzi onhangi nchumu, Nungungulu wa vararu va hina a zi wone, a lamula!

¹⁸Zonake ku lota a Moya ka Amasai, a nduna ya tinhenha, aku: Hina hi vanhu va wena, Davida, hi zinwe na wena, wena nʼwana Jese! A kurula, a kurula a kuve na wena, a kurula a kuve ni lava va ku vunako, hakuva Nungungulu wa wena i ku vunile. Zonake Davida i lo va amukela a va veka xikari ka tinduna ta tiyimpi takwe.

¹⁹Ku wa hi ni vanwani vanhu va ka Manasa lava va ngaya ka Davida xikhatini lexi a nga hloma yimpi zinwe ni vaFilistia a ku yalwa na Saule. Kanilezi cima a va vunetelangi a vaFilistia, hakuva laha a tinduna ta vaFilistia ti nga maha xikungo, va lo tlhelisa Davida, vaku: I ta ya hunza aya ka hosi yakwe Saule a tokometa tihloko ta hina.

²⁰Laha a ngaya le Ziklagi, ku loya ka yena va ka Manasa, va nga lava, Adna, na Jozabada, na Jediale, na Mikaeli, na Jozabada, na Elihu, na Zilletai, a tinduna ta matala ya ka Manasa.

²¹Lava vanhu va lo vunetela Davida laha a nga walwa ni mabutho ya vaphangi, hakuva vontlhe va wa hi tinhenha, na va hi tinduna ta yimpi.

²²Siku ni siku ku wota vanhu ka Davida kasi ku ta mu vunetela, kala gi maha butho ga hombe, khwatsi i butho ga Nungungulu.

²³Leyi hi mitsengo ya vavanuna lava va nga wa hlomile matlhari, lava va ngaya ka Davida le Hebroni a ku ya mu wumbela wuhosi wutshanwini ya Saule, khwatsi hi lezi Jehova a leleteleko.

²⁴A vana va ka Juda lava va khomileko a zitlhangu ni matlhari va wa hi 6,800, va hlomileko kasi kuya yimpini.

²⁵A vana va ka Simeoni, a tinhenha ta yimpi, va wa hi 7,100.

²⁶A vana va ka Levi va wa hi 4,600.

²⁷Jehoiada i wa hi murangeli wa yindlu ya ka Aroni; i wa hi ni 3,700 wa vavanuna.

²⁸Zadoke, a jaha gi nga hi nhenha; le ndlwini ya raru wakwe ku wa hi ni 22 wa tinduna.

²⁹A vana va ka Benjamini, a vanakulobye va Saule, va wa hi 3,000, hakuva lexo xikhati a vanyingi vabye va wa ha namarele ka yindlu ya ka Saule.

³⁰A vana va ka Efraime va wa hi 20,800 wa vavanuna, a tinhenha ti dumileko mingangweni ya vararu ya tona.

³¹Ni va khihlanya ga nyangwa ya Manasa va wa hi 18,000, lava va kumbukilweko hi mavito yabye, lava va ngata a ku ta wumbela Davida a kuva hosi.

³²A vana va ka Isakari, a vavanuna lava va nga tiva zikhati, va tiva lezi Israeli a faneleko ku zi maha, va wa hi 200 wa tihosana; vontlhe vanakulobye va wa maha zileletelo zabye.

³³A va ka Zebuloni, lava va nga wa zi tiva ku hloma tontlhe tixaka ta matlhari, vaya yimpini, vontlhe va wa hi 50,000: i vanhu va ngaya kulweni hi timbilu ti tiyileko.

³⁴A va ka Naftali, va wa hi 1,000 wa tinduna, na va hi ni 37,000 wa vavanuna va nga welele zitlhangu ni matlhari.

³⁵A va ka Dani, lava va hlomeleko matlhari, va wa hi 28,600.

³⁶A va ka Axeri, lava va hlomeleko matlhari, va wa hi 40,000.

³⁷Hi le tlhatuko wa Jordani, a va ka Rubeni, ni va ka Gadi, ni khihlanya ga nyangwa ya ka Manasa, lava va hlomeleko tixaka tontlhe ta matlhari, va wa hi 120,000.

³⁸Vontlhe lavo va wa hi vavanuna va yimpi, a zilwa-matlhari; va lota le Hebroni hi mbilu yinwe, a ku ta wumbela Davida a kuva hosi ya vontlhe va ka Israeli. Vontlhe va ka Israeli lava va nga wa sele va wa hi va mbilu yinwe a ku wumbela Davida a kuva hosi.

³⁹Zonake va lo ya tshama leyo masiku manhru zinwe na Davida, vaga, vanwa, hakuva a vanakulobye va wa va longisele zontlhe.

⁴⁰Hambu lava va nga wa akile lomu kusuhani, kala ku chikela ka va ka Isakari, na Zebuloni, na Naftali, vonawu va wa neha timbuva hi timbongola, ni makameli, ni mamula, ni tihomu, va neha timbuva ta mapa, ni zikhekhetselo za makuwu ma womileko, ni mihanzu ya mauva ma womileko, ni vinya, ni mafura, ni tihomu, ni tiyivu to tala nguvu, hakuva a va ka Israeli va wa tsakile.