Read tshwa 1 Kronekele 14 Bible Online

1 Kronekele 14 - tshwa bible

1 Kronekele 14

¹Hiramu a hosi ya le Tire, i lo rumela ka Davida a mitsumi zinwe ni tisedare, ni vavatli va maribye, ni vaaki, kasi va fela ku mu akela a yindlu.

²Zonake Davida i lo zi pima lezaku Jehova i yimisile yena a kuva hosi hehla ka va ka Israeli, ni lezaku a mufumo wakwe wu tlakukile hi kota ya vanhu vakwe, a va ka Israeli.

³Davida i lo engeta ku teka vavasati le Jerusalema, a beleka kambe a vafana ni vanhanyana.

⁴Lawa hi mavito ya vana lava va belekelweko le Jerusalema: Xammua, na Xobaba, na Natani, na Solomoni,

⁵na Ibhara, na Elixua, na Elpeleta,

⁶na Noga, na Nefega, na Jafia,

⁷na Elixama, na Beeliada, na Elifelete.

⁸Makunu laha vaFilistia va ngazwa lezaku Davida i totilwe a kuva hosi, ya va ka Israeli, vontlhe vaFilistia va lo kanziha a ku ya hlota Davida. Davida i lo zizwa, a si huma a ku yalwa navo.

⁹A vaFilistia va lo maha xijumani le mikoveni ya Refaime.

¹⁰Zonake Davida i lo wutisa ka Jehova, aku: Nzi kanziha nzi yalwa ni vaFilistia ke? U ta va nyikela mandleni ya mina ke? Jehova i lo hlamula aku: Kanziha! Nzi ta va nyikela mandleni ya wena!

¹¹Zinghaho va lo kanziha vaya le Baali-Perazimu; Davida i lo va hlasela leyo. A wuya aku: Nungungulu i hangalasile a valala va mina hi canja ga mina, khwatsi hi mati ma khulungako. Hikwalaho va lo chula a wutshamu lego a vito ga Baali-Perazimu.

¹²Va lo siya vanungungulu vabye leyo, Davida a leletela lezaku va hiswa hi nzilo. [13]

¹³A vaFilistia va lo engeta kambe va maha xijumani le nkoveni.

¹⁴Davida i lo wutisa kambe ka Nungungulu, Nungungulu aku kakwe: U nga kanzihi u va lanza hi le nzhako; kanilezi va fularele u tlhela, u ta ya va kuma hi tlhelo ga le tisinyeni ta timora.

¹⁵U taku loku uzwa a guwa ga kufamba le hehla ka tisinya ta timora, u huma u yalwa, hakuva Nungungulu i rangile mahlweni ka wena a ku hlasela a yimpi ya vaFilistia.

¹⁶Davida i lo maha kwatsi hi lezi Nungungulu a mu leleteleko; va lo hlasela a yimpi ya vaFilistia kusukela Gibeoni kala Gezera, va yi hlula.

¹⁷Zonake a wudumo ga Davida gi lo hangalaka matikweni wontihe; na Jehova i lo maha a vito ga Davida gi chabyiwa hi matiko wontihe.