Read tshwa 1 Kronekele 15 Bible Online

1 Kronekele 15 - tshwa bible

1 Kronekele 15

¹I lo ti akela a tiyindlu le mutini wa Davida, a longisa a wutshamu ga arke ga Nungungulu, a gi gwimbela a tenda.

²Zonake Davida i te ngalo: A nga kona a munhu a ta nga rwala a arke ga Nungungulu, loku ku nga hi va ka Levi, hakuva hi vona va hlawulweko hi Jehova a ku rwala a arke ga Nungungulu ni ku mu khozela kala kupinzuka. [14]

³Davida i lo tsombanyisa vontlhe va ka Israeli le Jerusalema a ku yisa a arke ga Jehova wutshanwini lego a nga wa gi longisele.

⁴Davida i lo tsombanyisa a vana va Aroni ni va ka Levi.

⁵A vana va ka Kohate: hi Urieli a hosana ya kona, zinwe ni 120 wa vanakulobye.

⁶A vana va ka Merari: hi Asaia a hosana ya kona, zinwe ni 220 wa vanakulobye.

⁷A vana va ka Gerxomi: hi Joeli a hosana ya kona, zinwe ni 130 wa vanakulobye.

⁸A vana va ka Elizafani: hi Xemaia a hosana ya kona, zinwe ni 200 wa vanakulobye.

⁹A vana va ka Hebroni: hi Elieli a hosana ya kona, zinwe ni 80 wa vanakulobye.

¹⁰A vana va ka Uzieli: hi Aminadaba a hosana ya kona, zinwe ni 112 wa vanakulobye.

¹¹Davida i lo vitana a vapristi: Zadoke na Abiatara, ni va ka Levi, Urieli, na Asaia, na Joeli, na Xemaia, na Elieli, na Aminadaba;

¹²aku kabye: Hi nwina madota ya tiyindlu ta ka Levi. Ti basiseni zinwe ni vanakuloni, kasi ma fela ku ya rwala a arke ga Jehova Nungungulu wa ka Israeli, mu ta gi veka lomu wutshanwini legi nzi gi longiseleleko gona.

¹³Lezo nwina mu nga hi hava kusanguleni, Jehova Nungungulu wa hina i mahile xigirimuka xikari ka hina, hi ku kala hi nga mu vitanangi, khwatsi hi lezi ku leletelweko.

¹⁴Zonake a vapristi va ka Levi va lo ya ti basisa, kasi va fela ku ya rwala a arke ga Jehova Nungungulu wa ka Israeli.

¹⁵A vana va ka Levi va lo rwala hi makatla yabye a arke ga Nungungulu hi mipingo leyi yi nga wa hi hehla ka gona, khwatsi hi lezi Jehova a nga leletelisa zona hi nomu wa Mosi.

¹⁶Davida i lo leletela a tihosana ta ka Levi a ku yimisa a vanakulobye ntirweni wa kuyimbelela hi timbila ni zitende, va yimbelela hi ntamu va kombisa kutsaka.

¹⁷Zinghaho a va ka Levi va lo yimisa ntirweni lowo Hemani nʼwana Joeli; ni xikari ka vanakulobye, Asafa nʼwana Berekia; xikari ka vana va Merari, va nga vanakulobye, Etani nʼwana Kuxaia.

¹⁸Va wa hi ni vanakulobye va ntlawa wa wumbiri, Zakaria, na Beni, na Jaazieli, na Xemiramote, na Jehieli, na Unni, na Eliabe, na Benaia, na Maaseia, na Mattitia, na Elifelehu, na Mikneia, na Obed-Edomi, na Jeieli, a vahlayisi va tinyangwa.

¹⁹A vayimbeleli ku wa hi Hemani, na Asafa, na Etani, va nga wa hi ni zingomana za suku, va zi gidivela zi vuma nguvu;

²⁰Zakaria na Azieli, na Xemiramote, na Jehieli, na Unni, na Eliabe, na Maaseia, na Benaia, va wa hi ni timbila ta Alamota,

²¹Mattitia, na Elifelehu, na Mikneia, na Obed-Edomi, na Jeieli, na Azazia, va wa hi ni zitende za Xeminete, a ku rangela a tisimu.

²²Kenania a nduna ya va ka Levi, i wa hi murangeli wa vayimbeleli; i wa gonzisa ku yimbelela, hakuva i wa tlharihile.

²³Berekia na Elkana va wa hi vahlayisi va arke.

²⁴Xebania na Joxafate na Netaneli, na Amasai, na Zakaria, Beneia, na Eliezere, va wa hi vapristi kuba mipunzu mahlweni ka arke ga Nungungulu; Obed-Edomi, na Jehia, va wa hi vahlayisi va tinyangwa ta arke.

²⁵Zinghaho Davida zinwe ni masingalakati ya ka Israeli, ni tinduna ta 1,000, va lo suka va ya teka a arke ga xivumelwano xa Jehova le ndlwini ya Obed-Edomi hi kutlanga.

²⁶Laha Nungungulu a nga vunetela va ka Levi lava va rweleko a arke ga xivumelwano xa Jehova, va lo tlhava a 7 wa tikuzi ni 7 wa tihamba.

²⁷Davida i wa ambele a nguwo ya wukene yo saseka, ni vaLevi vontlhe lava va nga wa rwele a arke, ni vayimbeleli, na Kenania a murangeli wa vayimbeleli; Davida i wa ambele kambe a efode ya wukene.

²⁸Zinghaho vontlhe va ka Israeli va lo neha a arke ga xivumelwano xa Jehova, na va kari va kanyuluka hi litsako; na vaba a miparatana, ni mipunzu, ni tingomana, ni zitende, ni timbila.

²⁹Makunu laha a arke ga Jehova gi nga wa enghena mutini wa Davida; Mikali nʼwana Saule i lo hlomela hi laha njhaneleni, a wona hosi Davida na a kari a ti nhenga a kina; i lo mu monya mbilwini yakwe.