Read tshwa 1 Kronekele 16 Bible Online

1 Kronekele 16 - tshwa bible

1 Kronekele 16

¹Makunu laha va nga wa nehile a arke ga Nungungulu, va lo gi veka lomu ka tenda legi Davida a nga wa gi akele; zonake va lo nyikela miphahlo ya kuhiswa, ni ya kubonga mahlweni ka Nungungulu.

²Laha Davida a nga wa gumesile ku nyikela miphahlo ya kuhiswa ni ya kubonga, i lo katekisa a vanhu vitweni ga Jehova.

³Zonake i lo avela va ka Israeli vontlhe, a vavasati ni vavanuna, loyi ni loyi a mu nyika a xibaba ni xitluwu xa nyama, ni xikhekhetselo xa tisote ta mauva.

⁴I lo yimisa vanwani va ka Levi mahlweni ka arke ga Jehova a ku khozela ni ku dumisa, ni ku bonga Jehova Nungungulu wa ka Israeli.

⁵A wahombe wa kona ku wa hi Asafa; ku gamela Zakaria, zonake Jeieli, na Xemiramote, na Jehieli, na Mattitia, na Eliabe, na Benaia, na Obed-Edomi, na Jeieli, na va hi ni zitende ni timbila; Asafa yena i wa gidivela a xingomana.

⁶Mupristi Benaia na mupristi Jehazieli va wa fanele ku yima wontihe masiku mahlweni ka arke ga xivumelwano xa Nungungulu, na va khomile mipunzu.

⁷A siku lego Davida i lo sangula ku leletela Asafa ni vanakulobye a ku dumisa Jehova, vaku:

⁸Dumisani Jehova, mu khongela hi vito gakwe! Banani hungu xikari ka matiko hi mitiro yakwe ya hombe!

⁹Yimbelelani, mu dumisa a vito gakwe! Alakanyani a zihlamaliso zakwe zontlhe!

¹⁰Ti tsakiseni hi vito gakwe go basa! Ngha timbilu ta lava va hlotako Jehova ti tsaka!

¹¹Hlotani Jehova ni ntamu wakwe! Lavisisani a nghohe yakwe xontlhe xikhati!

¹²Ehleketani hi zihlamaliso lezi a nga zi maha! A zihlamaliso zakwe ni kulamula ka nomu wakwe. [15]

¹³Wena pswalo wa ka Israeli, a nanza gakwe, Na nwina vana va Jakobe, a vahlawulweko va yena.

¹⁴Yena Jehova i Nungungulu wa hina; A kulamula kakwe ku kona misaveni yontlhe.

¹⁵Alakanyani xivumelwano xakwe xontlhe xikhati, Ni zileletelo zakwe lomu ka khume ga mazana ya zizukulwana,

¹⁶Ni xivumelwano xakwe lexi a xi mahileko na Abrahama, Ni lexi a hlambanyileko ka Isaka. [16]

¹⁷Yena i xi yimisile kota nayo ka Jakobe, Ni kuva xivumelwano xo simama ka Israeli,

¹⁸Aku: Nzi ta ku nyika a tiko ga Kanani, Gi maha a tshomba ya wena.

¹⁹Laha nwina ma ba hiko vatsongwani, Na mu hi valuveli lomu tikweni;

²⁰Mu nzula kusukela tikweni ginwe muya ka ginwani; Ni kusukela ka mufumo munwe muya ka munwani;

²¹Yena a nga vumelangi munhu a ku va xanisa. I tsayisile a tihosi hi kota ya vona, aku: [17]

²²Mu nga khumbi a vatotilweko va mina, Mu nga lamati vaprofeti va mina!

²³Yimbelelani ka Jehova, nwina mi sava yontlhe! Kombisani a kuhanyisa kakwe hi masiku ni masiku.

²⁴Hlawutelani a wudumo gakwe xikari ka matiko, Ni zihlamaliso zakwe xikari ka vanhu vontlhe!

²⁵Hakuva Jehova ngwa hombe, i fanekelwe hi ku dumiswa. Yena wa chaveka ku hunza vanungungulu vontlhe.

²⁶Hakuva a vanungungulu vontlhe va matiko zifananiso ntsena, Kanilezi Jehova i mahile a matilo.

²⁷A wukulu ni kungangamela zi le mahlweni kakwe; A ntamu ni kutsaka zi le wutshanwini gakwe.

²⁸Nyikani ka Jehova, nwina matiko, Nyikani ka Jehova a wudumo ni ntamu!

²⁹Nyikani Jehova a wudumo gi faneleko a vito gakwe! Tanani mahlweni ka nghohe yakwe na mu rwele zinyikiwo; Khizamelani Jehova na mu ambele zobasa.

³⁰Rurumelani mahlweni kakwe, nwina misava yontlhe! A misava yi tiyile, cima yi nga ta tsekatsekiswa.

³¹Ngha a tilo gi tsaka, ni misava yi nengela! Ngha va wula xikari ka matiko, vaku: Jehova wa fuma!

³²Ngha bimbi gi dzinza, ni lezi zi nga ka gona! Ngha mikova yi tsaka, ni zontlhe lezi zi nga ka yona!

³³Zonake tontlhe tisinya ta khwati ti ta yimbelela hi kutsaka mahlweni ka Jehova; Hakuva yena wata a ku ta lamula misava.

³⁴Dumisani Jehova, hakuva i nene. Hakuva a wuxinji gakwe gi tshamile kala kupinzuka.

³⁵Wulani muku: Nungungulu, muhanyisi wa hina, hi hlangute! Hi tsombanyise, u hi tlhatlhisa xikari ka vamatiko, Kasi ha fela ku bonga a vito ga wena go basa, Hi bhuma hi wudumo ga wena.

³⁶A ku khesiwe Jehova Nungungulu wa ka Israeli Kala kupinzuka ni kupinzuka! Zonake a vanhu vontlhe vaku: Amen! va dumisa Jehova.

³⁷Zonake Davida i lo siya Asafa ni vanakulobye laha mahlweni ka arke ga xivumelwano xa Jehova, kasi va fela ku khozela mahlweni ka arke wontihe masiku, maringano ni ntiro wa siku ni siku,

³⁸na Obed-Edomi ni 68 wa vanakulobye; Obed-Edomi nʼwana Jedutuni na Hosa va lo enghena ntirweni wa ku hlayisa livati.

³⁹I lo yimisa mupristi Zadoke ni vanakulobye, vapristi, mahlweni ka yindlu ya Jehova, wutshanwini gi tlakukileko, gi nga wa hi le Gibeoni,

⁴⁰kasi va fela ku nyikela ka Jehova wontihe masiku a muphahlo wa kuhiswa laha alatini mixo ni gambo, ni ku maha kota lezi zi tsalilweko nayweni wa Jehova wu leletelweko va ka Israeli.

⁴¹Xikari kabye ku wa hi na Hemani na Jedutuni, ni vontlhe lava va hlawulilweko, lava mavito yabye ma kumbukilweko, kasi va fela ku dumisa Jehova; hakuva a wuxinji gakwe gi tshamile kala kupinzuka.

⁴²Hemani na Jedutuni va wa hlayisa a mipunzu ni tingomana ta vayimbeleli ni timbila to yimbelela a tisimu ta Nungungulu; a vana va Jedutuni va wa hi vahlayisi va tinyangwa.

⁴³Zonake a vanhu vontlhe va lo hangalaka vaya makaya kabye; yenawu Davida i lo famba a ya katekisa va le ngangweni wakwe. [18]