Read tshwa 1 Kronekele 17 Bible Online

1 Kronekele 17 - tshwa bible

1 Kronekele 17

¹Makunu laha Davida a nga wa tshamile lomu ndlwini yakwe, i te ngalo ka muprofeti Natani: Languta, mina nzi tshama lomu ndlwini ya tisedare, kanilezi a arke ga xivumelwano xa Jehova gi tshama lomu tendeni.

²Natani i te ngalo ka Davida: Maha zontlhe zi nga mbilwini ya wena, hakuva Nungungulu i zinwe na wena,

³Gwalego wusiku a gezu ga Nungungulu gi loya ka Natani, gi yaku:

⁴Famba ka nanza ga mina Davida u ya mu byela uku: Jehova i ngalo: A hi wena u ta nga nzi akela a yindlu leyi nzi ta nga tshama ka yona;

⁵hakuva cima a nzi se nga tshama lomu ndlwini, kusukela a siku lego nzi nga humesa va ka Israeli le Gipite kala lezi. Kanilezi nzi wa ku enghena ka tenda ginwe ni ginwani, ni ka tabemakeli ginwe ni ginwani.

⁶A masiku wontihe lawa nzi nga fambafamba ni va ka Israeli vontlhe, nzi na nga humesa a gezu ka munwe wa Valamuli va ka Israeli, loyi nzi nga wa mu leletela a ku risa a vanhu va mina, nziku: Hiyini mu nga nzi akeliko a yindlu ya sedare ke?

⁷Hikwalaho famba u ya byela a nanza ga mina Davida, uku: Nzi ku tekile kuriseni ka tiyivu, kasi u fela ku tava murisi wa vanhu va mina, a va ka Israeli. [19]

⁸Mina nzi wa hi zinwe na wena kontlhe lomu u nga wa fambafamba kona, nzi susile vontlhe valala va wena mahlweni ka wena. Nzi ta maha a vito ga wena gi duma ku fana ni mavito ya vanhu va hombe va nga misaveni.

⁹Nzi ta nyika wutshamu ka vanhu va mina, a va ka Israeli, nzi va tikareta lomo, va ti akela; cima va nga ta ha hangalaswa hi vanhu vo biha, ge hambu ku hlokiswa kota kale,

¹⁰a xikhatini lexo nzi nga wa yimisile a valamuli hehla ka vanhu va mina, a va ka Israeli, Nzi khozisile vontlhe valala va wena; makunu nzi ku tivisa lezaku Jehova i ta ku akela a yindlu,

¹¹A xikhati lexi a masiku ya wena ma ta nga tatiseka, na u famba ka vararu va wena, zonake nzi ta yimisa a mbewu ya wena, a munwe wa vana va wena, nzi tiyisa a mufumo wa yena.

¹²Hi yena a ta nga nzi akela a yindlu; mina nzi ta tiyisa a xitshamu xakwe xa wuhosi kala kupinzuka. [20]

¹³Nzi tava raru wakwe, yenawu i tava nʼwana wa mina; cima nzi nga ta susa a tipswalo ta mina hehla kakwe, khwatsi hi lezi nzi nga ti susa ka loyi a rangileko mahlweni ka wena.

¹⁴Kanilezi nzi ta mu yimisa lomu ndlwini ya mina ni lomu mufunweni wa mina kala kupinzuka, ni xitshamu xakwe xa wuhosi xi ta tiya kala kupinzuka.

¹⁵Natani i lo hlawutela Davida tontlhe timhaka leto ni muwoniso wa kona wontihe.

¹⁶Zonake Davida i lo wulawula mahlweni ka Jehova, aku: Jehova Nungungulu, nza kuva maniwo, ya kuva yini a yindlu ya mina ko kala u nzi chiketa kwalaha?

¹⁷Lexo xilo xitsongwani mahlweni ka wena Nungungulu; hakuva u wulawulile hi yindlu ya nanza ga wena hi zikhati za kule za ha tako, u nzi kombisa a munhu a tlakusilweko, wena Jehova Nungungulu.

¹⁸Xana wa ha ta ku byela yini Davida hi wudumo gontlhe legi u nyikileko a nanza ga wena ke? Hakuva wena wa tiva a nanza ga wena.

¹⁹Jehova, wena u mahile a wukulu gontlhe legi ga hombe ki kota ya nanza ga wena hi kota ya mbilu ya wena nwinyi, kasi ku tivisa a timhaka leti ta hombe.

²⁰Jehova, cima a nga kona wo fanana na wena, cima a ku na munwani Nungungulu ahandle ka wena, khwatsi hi zontlhe lezi hi zi zwileko hi tindleve ta hina. [21]

²¹Hi gihi tiko gi fananako ni vanhu va wena, a va ka Israeli, a vanhu lava Nungungulu a va tlhatlhisileko a va maha vakwe, kasi ku ti mahela a vito hi mitiro yi chavekako, hi ku hlongola a matiko mahlweni ka vanhu va wena, lava u va tlhatlhisileko le Gipite ke?

²²Wena u yimisile a vanhu va ka Israeli a kuva va wena kala kupinzuka; wena Jehova u Nungungulu wabye.

²³Makunu, Jehova, a gezu ga wena legi u gi wulileko hi nanza ga wena xungetano ni yindlu yakwe, ngha gi tiyiswa kala kupinzuka, u maha khwatsi u wulileko!

²⁴Ni vito ga wena ngha gi tiya gi kuliswa kala kupinzuka, vaku; Jehova wa tiyimpi, a Nungungulu wa ka Israeli, hi yena a Nungungulu ka Israeli! A yindlu ya nanza ga wena Davida yi ta tiyiswa mahlweni ka wena.

²⁵Hakuva wena Nungungulu wa mina, u byelile a nanza ga wena lezaku u ta mu akela a yindlu; hikwalaho a nanza ga wena gi kumile a ntamu a ku khongela mahlweni ka wena.

²⁶Makunu, Jehova, hi wena Nungungulu, u tsumbisile a nanza ga wena a wuxinji lego.

²⁷Makunu katekisa a yindlu ya nanza ga wena, lezaku yi simama kala kupinzuka mahlweni ka wena, hakuva lezi u zi katekisako wena Jehova, zi katekisilwe kala kupinzuka.