Read tshwa 1 Kronekele 19 Bible Online

1 Kronekele 19 - tshwa bible

1 Kronekele 19

¹Anzhako ka lezo Nahaxi a hosi ya vana va ka Amoni i lofa; zonake a nʼwana wakwe i lo fuma xikhundleni xakwe.

²Davida i te ngalo; Nzi ta maha tipswalo ka Hanuna nʼwana Nahaxi, hakuva a raru wakwe i nzi mahele tipswalo. Zinghaho Davida i lo rumela a mitsumi a ku ya mu chavelela xungetano ni raru wakwe. A malanza ya Davida ma loya tikweni ga vana va ka Amoni ka Hanuna a ku ya mu chavelela.

³Kanilezi a tihosana ta vana va ka Amoni ti te ngalo ka Hanuna; U alakanya lezaku Davida o rumela vachaveleli hi ku khatalela a raru wa wena ke? A ku zi woni lezaku a malanza yakwe ma tela ku ta hlola muti kasi ku wu khungumula, ni ku kamba a tiko ke?

⁴Zinghaho Hanuna i lo khoma a malanza ya Davida a ma halula, a tsema tinguwo ta wona hi laha xikari kala tinyongeni tabye, a ma tlhelisa.

⁵Zonake ku loya a munhu wo kari a ya tivisa Davida lezi zi mahilweko ka vanhu lavo; Davida i lo rumela a vanhu va va khinga, hakuva a vavanuna lavo va wa hi ni tingana ta hombe nguvu. A hosi yi te ngalo kabye: Tshamani kwaseyo Jeriko kala zilevu za nwina zi kula, zonake mu ta wuya.

⁶Laha a vana va ka Amoni va nga wona lezaku va vangile livengo ka Davida, Hanuna ni vana va ka Amoni va lo rumela 1,000 wa titalenta ta siliva kasi ku lomba a tikareta zinwe ni vakhileli va mahaxi ka Aram-Naharaime ni ka vaAram-Maaka ni va le Zoba.

⁷Zinghaho vona va lo kuma 32,000 wa tikareta zinwe ni hosi ya le Maaka ni vanhu va yona, va ta gova mahlweni ka Medeba; a vana va ka Amoni va lo huma mitini yabye va tsombana vata yimpini.

⁸Laha Davida a nga wa zi zwile, i lo rumela Joabe ni yimpi yontlhe, zinwe ni tinhenha.

⁹A vana va ka Amoni Va lo hlomisa a yimpi laha nyangweni ya muti, kanilezi a tihosi leti ti ngata a ku ta va vunetela ti lo yima tlhelo ga tona laha nkoveni.

¹⁰Laha Joabe a nga wona lezaku mitlawa mimbiri ya tiyimpi, a wunwe le mahlweni ni wunwani le nzhako kakwe, i lo hlawula a vavanuna va tinhenha xikari ka va ka Israeli vontlhe, a va rumela a ku yalwa ni vaSiria.

¹¹Lava va nga wa sele i lo va nyikela mandleni ya nakulobye Abixai, kasi ku yalwa ni vana va ka Amoni,

¹²Yena i te ngalo kakwe: Loku a vaSiria va nzi hlula, wena u ta ta nzi vunetela; ni loku a vana va ka Amoni va ku hlula, minawu nzi ta ta ku vunetela.

¹³Tiyani hlana, hilwa kota vavanuna, hi lwela a vanhu va hina ni miti ya Nungungulu wa hina; Jehova a mahe lezi zi lulamileko mahlweni kakwe!

¹⁴Zinghaho Joabe ni Vavanuna lava a nga wa hi navo, va loya mahlweni a ku yalwa ni vaSiria. A vaSiria va lo panzanyeka mahlweni kabye.

¹⁵Laha a vana va ka Amoni va nga wona lezaku a vaSiria va panzanyekile mahlweni ka Joabe, vonawu va lo tsutsuma mahlweni ka nakulobye Abixai, va tlhela va enghena lomu mutini. Zonake Joabe i lo tlhela Jerusalema.

¹⁶Laha a vaSiria va nga wonile lezaku va hlulilwe hi va ka Israeli, va lo rumela a mitsumi a ku ya vitana a vaSiria lava va nga wa hi le tlhatuko wa congo, lava a murangeli wabye a nga wa hi Xofake a nduna ya yimpi ya Hadarezera.

¹⁷Laha Davida a nga byelilwe mhaka leyo, i lo tsombanyisa vontlhe va ka Israeli a tlhatuka Jordani a hlomisa matlhari a va yela a yalwa navo. Zinghaho loku Davida a hlomile a ya tlhangana navo, va lolwa naye.

¹⁸Kanilezi a vaSiria va lo panzanyeka mahlweni ka va ka Israeli; Davida i lo hlasela a vavanuna va 7,000 wa tikareta ta vaSiria ni 40,000 wa vavanuna va fambako hi milenge; i lo daya na Xofake a nduna ya yimpi.

¹⁹Laha a malanza ya Hadarezera ma nga wona lezaku ma hlulilwe hi va ka Israeli, ma lo kombela kurula ka Davida, ma khoza kakwe. A vaSiria a va ha engetangi va vunetela a vana va ka Amoni.