Read tshwa 1 Kronekele 20 Bible Online

1 Kronekele 20 - tshwa bible

1 Kronekele 20

¹A ka lembe gi gamelako, a xikhati lexi a tihosi ti humako tiya yimpini, Joabe i lo rangela a yimpi a ya hlasela a tiko ga vana va ka Amoni; i lo ya vimbezela Raba. Kanilezi Davida i wa sele le Jerusalema. Joabe i lo hlasela Raba a gi khungumula. [24]

²Davida i lo teka a xidlodlo xa wuhosi a hlokweni ya hosi ya vona; i lo kuma lezaku a kubinza ka xona ku wa hi ka talenta ya nzalama, na xi nameketelwe a maribye yo saseka; xi lo tlhatekwa hlokweni ya Davida. I lo phanga ni tshomba yinyingi nguvu lomo mutini a famba nayo.

³A vanhu lava va nga wa hi lomu mutini i lo va humesa a va tsema hi masaho ni mitlonga ya ziketse, ni zihloka. Davida i lo maha lezo ka yontlhe miti ya vana va ka Amoni, zonake a tlhela aya Jerusalema ni vanhu vontlhe.

⁴Anzhako ka lezo ku lo vuka a yimpi le Gezera ni vaFilistia. Zonake Sibekai a muHuxate i lo daya Sipai, a munwe wa vana va Rafa; a vaFilistia va lo khoziswa.

⁵Ku lo vuka kambe yinwani yimpi ni vaFilistia. Elhanana nʼwana Jaire i lo daya Lami nakulobye wa Golia a muGati, loyi a mbingo wa tlhari gakwe wu nga fanana ni piselo wa muluki.

⁶Ku lo vuka yinwani yimpi kambe le Gati. Laho ku wa hi ni wanuna a nga hi ni dzumba ga hombe, a nga hi ni ntlhanu wa titiho ni linwe ka kada canja, ni mikonzo yakwe kambe ku hi lezo; i wa hi ni 24 wa titiho na hi zukulu wa zihotlovila.

⁷Laha yena a nga wa tseketsela va ka Israeli, Jonatani nʼwana Ximea a nakulobye wa Davida i lo mu daya.

⁸A vavanuna lava va wa hi vana va zihotlovila za le Gati; va lo dawa hi canja ga Davida, ni mandla ya malanza yakwe.