Read tshwa 1 Kronekele 23 Bible Online

1 Kronekele 23 - tshwa bible

1 Kronekele 23

¹Laha Davida a nga wa khosahele, hi kutala ka masiku yakwe, i lo yimisa nʼwana wakwe Solomoni a kuva hosi hehla ka va ka Israeli.

²I lo tsombanyisa tontlhe tihosana ta ka Israeli, ni vapristi, ni vaLevi.

³Ku lo hlayiwa a vaLevi kusukela ka lava va 30 wa malembe kuya mahlweni: a tsengo wabye hi tihosana tabye, va wa hi 38,000 wa vavanuna.

⁴Davida i te ngalo: A 24,000 wa vavanuna va tava vahlayisi va ntiro wa yindlu ya Jehova; lava va 6,000 va ta lavelela ntiro ni ku lamula timhaka. [28]

⁵A 4,000 va tava vahlayisi va tinyangwa, a vanwani va 4,000 va ta dumisa Jehova hi wucenje legi nzi gi maheleko a kuva mu dumisa ha gona.

⁶Davida i lo va avanyisa hi mitlawa, hi tinyangwa ta vanana va ka Levi, Gerxoni, Kohate, na Merari.

⁷Va ka Gerxoni: Ladani na Ximei.

⁸A vana va Ladani: Jehieli a hosana, na Zetamu, na Joeli, vanharu.

⁹A vana va Ximei: Xelomote, na Hazieli, na Harani, vanharu; lava hi tona tihosana ta tiyindlu ta ka Ladani.

¹⁰A vana va Ximei: Jahate, na Zina, na Jeuxa, na Beria; lava va mune va wa hi vana va Ximei.

¹¹Jahate i wa hi hosana, ku gamela Ziza; kanilezi Jeuxa na Beria va wa nga hi na vana vo tala, hikwalaho va lo maha a yindlu yinwe ntsena ntsengweni wa vararu vabye, a ntlawa munwe.

¹²A vana va Kohate: Amrama, na Izhare, na Hebroni, na Uzieli; mune.

¹³A vana va Amrama: Aroni, na Mosi. Aroni i lo hlayiwa tlhelweni, kasi a fela ku hlawulwa a kuva wa kubasa zinwe ni vanana vakwe kala kupinzuka, kasi va fela ku hisa tibani mahlweni ka Jehova, va mu khozela ni ku katekisa vanhu hi vito gakwe kala kupinzuka. [29]

¹⁴Kanilezi a vana va Mosi, a munhu wa Nungungulu, va hlayilwe lomu ka nyangwa ya ka Levi.

¹⁵A vana va Mosi: Gerxome, na Eliazare.

¹⁶A vana va Gerxome: Xebueli a hosana.

¹⁷A vana va Eliazare: Rehabia a hosana, Eliazare i wa nga hi na vanwani vana, kanilezi a vana va Rehabia va wa tele nguvu.

¹⁸A vana va Izhare: Xelomite a hosana.

¹⁹A vana va Hebroni: Jeria a hosana, ku gamela Amaria, a wunharu hi Jahazieli, a wa wumune hi Jekameamu.

²⁰A vana va Uzieli: Mika a hosana, ku gamela Ixia.

²¹A vana va Merari: Mali, na Muti. A vana va Mali: Eliazare na Kixi.

²²Eliazare i lofa na a nga hi na vana, kanilezi i wa hi ni vanhanyana lava va nga wa tekilwe hi vana va nakulobye Kixi.

²³A vana va Muxi: Mali, na Edera, na Jeremote; vanharu.

²⁴Lava hi vana va ka Levi hi tiyindlu ta vararu vabye, ti nga tona tihosana ta tiyindlu ta vararu vabye, khwatsi hi lezi va hlayilweko hi mavito yabye hi tihloko tabye. Va wa hi ntirweni wa kukhozela ndlwini ya Jehova, kusukela ka lava va nga ni 20 wa malembe kuya mahlweni.

²⁵Hakuva Davida i wa te ngalo: Jehova Nungungulu wa ka Israeli i nyikile a vanhu vakwe a kuhumula, na yena i ta tshama Jerusalema kala kupinzuka,

²⁶hikwalaho a va ka Levi va nga ta ha rwala a tabemakeli ni zontlhe zibya za ku khozela ha zona.

²⁷(A ku hlayiwa ka vana va ka Levi ku sangula hi lava va nga ni 20 wa malembe kuya mahlweni; lezo zi mahilwe hi kuleletela ka Davida ko gumesa.)

²⁸Hakuva va yimisilwe kusuhani ni vana va ka Aroni ntirweni wa kukhozela ndlwini ya Jehova; va wa hi vahlayisi va tihubye ni tikwarutu, va basisa a zilo zontlhe zi hlazekileko, va tira mitiro ya yindlu ya Nungungulu;

²⁹va hlayisa a zibaba zi vekiwako mahlweni ka Nungungulu, ni mapa yo saseka ya minyikelo ya zakuga, a zibaba zi nga comelwangiko, ni lezi zo katingwa ni lezi zo wociwa, ni lezi zi patsilweko ni mafura; ni tipimo tontlhe ta ku pima kutala ni wukulu.

³⁰Ahandle ka lezo, va wa fanele ku yima mahlweni ka Nungungulu siku ni siku, kasi ku bonga ni ku dumisa Jehova mixo ni gambo.

³¹Va wa fanele ku nyikela yontlhe minyikelo ya kuhiswa hi masabado ni zikhatini za tihweti tiswa, ni ya mitlhangano, hi tsengo wa kona, khwatsi hi lezi zi leletelweko, lezaku kasi va hi kona mahlweni ka Jehova hi ku simamisilweko.

³²Va wa fanele ku hlayisa a tabemakeli ga mutlhangano, ni wutshamu go basa, ni ku vuna vanakulobye, a vana va ka Aroni, ntirweni wa yindlu ya Jehova. [30]