Read tshwa 1 Kronekele 26 Bible Online

1 Kronekele 26 - tshwa bible

1 Kronekele 26

¹Leyi hi mitlawa ya vahlayisi va tinyangwa. A va ka Kora: Mexelemia nʼwana Kore, wa vanana va ka Asafa.

²A vana va Mexelemia: Zakaria a matewula, ku gamela Jediaeli, a wa wunharu hi Zebadia, a wa wumune hi Jatanieli,

³a wa wuntlhanu hi Elami, a wa wu 6 hi Johanani, a wa wu 7 hi Eliehoenai.

⁴A vana va Obedi-Edomi: A matewula hi Xemaia, ku gamela Jehozabada, a wa wunharu hi Joa, a wa wumune hi Sakare, a wa wuntlhanu hi Netaneli,

⁵a wa wu 6 hi Amieli, a wa wu 7 hi Isakare, a wa wu 8 hi Peuletai; hakuva Nungungulu i wa mu katekisile.

⁶Ni nʼwana wakwe Xemaia i wa belekile vana lava va nga fumela lomu ndlwini ya raru wabye, hakuva va wa hi tinhenha.

⁷A vana va Ximaia: Otni, na Rafaeli, na Obedi, na Elzabada, ni vanakulobye lava va nga wa hi vavanuna va ntamu, Elihu na Semakia.

⁸Vontlhe lava va wa hi vana va Obedi-Edomi; vona ni vana vabye ni vanakulobye va wa hi vavanuna va tinghitsi, va ntamu wa hombe ntirweni wa ku tira. Va wa hi 62 wa vazukulu va Obedi-Edomi.

⁹Na Mexelemia i wa hi ni vana ni vanakulobye va tinghitsi, vontlhe va wa hi 18.

¹⁰Na Hosa, wa vana va ka Merari, i wa hi ni vana; a vito ga hosana ya kona ku wa hi Ximri (hakuva hambu lezi a nga hiko matewula, a raru wakwe i wa mu yimisile a kuva hosana);

¹¹ku gamela Hilkia, a wa wunharu hi Tibalia, a wa wumune hi Zakaria; a ku patsa a vana va Hosa ni vanakulobye, va wa hi 13.

¹²A ntiro wa ku hlayisa a yindlu ya Jehova wu wa vekilwe mandleni ya mitlawa leyi ya vahlayisi, ni ka tihosana ta tiyindlu tabye, ni ka vanakulobye, kasi va tira lomu ndlwini ya Jehova.

¹³Va lo hlawutelwa a nyangwa yinwe ni yinwani hi ku hlahluva, a vatsongwani ni vahombe, ka tiyindlu ta vararu vabye.

¹⁴Xelemia a hlawuliwa hi kuhlahluva a kuva tlhelo ga le Mutsuwuka-gambo. Ni nʼwana wakwe Zakaria loyi a nga hi munhu wa kupima, i lo hlawulwa hi kuhlahluva a kuva tlhelo ga Nwalungu.

¹⁵Obedi-Edomi i lo hlawuliwa hi kuhlahluva a kuva tlhelo ga le Dzongeni; a vana vakwe va lo hlawuliwa a kuva vahlayisi va yindlu ya titshomba.

¹⁶Xupima na Hosa va lo hlawuliwa a kuva tlhelo ga Mupela-gambo laha nyangweni ya Xaleketa, hi laha ndleleni yi kanzihako, laha a muhlayisi munwe a cuwukanako ni munwani.

¹⁷Hi le Mutsuwuka-gambo ku wa hi ni 6 wa va ka Levi; hi le Nwalungu va wa hi mune, hi le Dzongeni va wa hi mune, kada siku ni siku; le ndlwini ya titshomba ku wa hi ni vambiri ni vambiri.

¹⁸Le nzhako ka hubye, hi tlhelo ga Mupela-gambo, va wa hi mune laha ndleleni, ni vambiri laha ka hubye ya le nzhako.

¹⁹Leyi hi mitlawa ya vahlayisi va tinyangwa, va vana va Korate ni va Merari.

²⁰Lomu xikari ka vaLevi, Ahija i wa hi muhlayisi wa titshomba ta yindlu ya Nungungulu, ni titshomba ta zilo lezi zi basisilweko.

²¹A vana va Ladani ni va Gerxoni, lava va humileko hi ka Ladani, a tihosana ta tiyindlu ta vararu va Ladani a muGerxoni, ku wa hi Jehieli;

²²a vana va Jehieli hi Zetama, ni nakulobye Joeli; va wa hi vahlayisi va tshomba ya yindlu ya Jehova.

²³A va ka Amrami, ni va ka Izaru, ni va ka Hebroni, ni va ka Uzieli,

²⁴na Xebueli nʼwana Gerxoni wa Mosi, i wa hi hosana ya vahlayisi ya titshomba.

²⁵A vanakulobye lava va humeleko hi ka Eliezare ku wa hi Rehabia nʼwana wakwe, Jexaia nʼwana wakwe, na Joramu nʼwana wakwe, na Zikri nʼwana wakwe, na Xelemote a nʼwana wakwe.

²⁶Xelemote loyi ni vanakulobye va wa hi vahlayisi va titshomba tontlhe ta zilo lezi zi nyikelweko hi hosi Davida, ni tihosana ta tinyangwa, ni tinduna ta 1,000 ni ta mazana, ni tinduna ta yimpi.

²⁷Va lo zi nyikela kasi ku sasisa a yindlu ya Jehova, a zilo za tshomba leyi yi phangilweko yimpini. [31]

²⁸Zontlhe lezi zi nyikelweko hi muwoni Samueli, na Saule nʼwana wa Kixi, na Abnere a nʼwana Neri, na Joabe nʼwana Zeruia, ni zontlhe lezi zi nga wa nyikelwe hi vontlhe, zontlhe zi wa vekilwe mandleni ya Xelemote ni vanakulobye.

²⁹Lomu xikari ka va ka Izari, Kenania ni vana vakwe va wa yimiselwe a timhaka ta le handle ta va ka Israeli, va hi vaxuxi ni Valamuli va tona.

³⁰Lomu xikari ka va ka Hebroni, Haxabia ni vanakulobye, 1,700 wa vavanuna, va wa yimisilwe ku hlayisa va ka Israeli le tlhatuko wa Jordani hi tlhelo ga Mupela-gambo, lomu timhakeni tontlhe ta Jehova ni mitirweni yontlhe ya hosi.

³¹A va ka Hebroni hi Jerija loyi a nga wa hi hosana yabye; hi lembe ga wu 40 ga kufuma ka Davida, va lo lavisisa lomu tixakeni tabye ni tinyangweni tabye, va lo kuma tinhenha lomu mutini wa Jezera wa le Gileade.

³²A vanakulobye va Jerija va wa hi 2,700 wa vavanuna, a tinhenha ni tihosana ta tiyindlu ta vararu vabye, lava hosi Davida a va yimisileko hehla ka va ka Rubeni ni va ka Gadi ni khihlanya ga nyangwa ya Manasa, a ku lulamisa a timhaka tontlhe ta Nungungulu, ni timhaka ta hosi.