Read tshwa 1 Kronekele 27 Bible Online

1 Kronekele 27 - tshwa bible

1 Kronekele 27

¹Lava hi vana va ka Israeli, hi tsengo wabye, a tihosana ta tinyangwa ni tinduna ta mazana ni ta makume mazana, ni malanza yabye ma tirelako a hosi timhakeni tontlhe ta mitlawa leyi yi enghenako ntirweni ni leyi yi humako ha kona, ka tontlhe tihweti ta lembe; a tlawa munwe ni munwani wu wa hi ni 24,000 wa vavanuna.

²A ka tlawa wo sangula wa hweti yo ranga, ku yimisilwe Jaxobeamu nʼwana Zabdieli a kuva nduna; a tlawa wakwe wu wa hi ni 24,000 wa vavanuna.

³Yena i wa hi zukulu wa Perezi, na a hi hosana ya tinduna tontlhe ta yimpi ya hweti yo sangula.

⁴A nduna ya tlawa wa hweti ya wumbiri ku wa hi Dodai a muAhohi. A murangeli wa tlawa wakwe ku wa hi Mitloti, na wu hi wa 24,000 wa vavanuna.

⁵A nduna ya tlawa wa wunharu ka hweti ya wunharu ku wa hi Benaia nʼwana mupristi Jehoiada; wu wa hi ni 24,000 wa vavanuna.

⁶Benaia loyi i wa hi nhenha xikari ka lava va 30, na a hi murangeli wabye. A tlawa wakwe wu wa rangelwa hi nʼwana wakwe Ammizadaba.

⁷A nduna ya wumune ka hweti ya wumune ku wa hi Asaheli a nakulobye wa Joabe; anzhako kakwe ku lanzela nʼwana wakwe Zebadia; a tlawa wakwe wu wa hi ni 24,000 wa vavanuna.

⁸A nduna ya wuntlhanu ka hweti ya wuntlhanu ku wa hi Xamhuta a muIzra, a tlawa wakwe wu wa hi ni 24,000 wa vavanuna.

⁹A nduna ya wu 6 ka hweti ya wu 6 ku wa hi Ira nʼwana Ikexa a muTekoa; a tlawa wakwe wu wa hi ni 24,000 wa vavanuna.

¹⁰A nduna ya wu 7 ka hweti ya wu 7 ku wa hi Helezi a muPeloni wa vazukulu va ka Efraime; a tlawa wakwe wu wa hi ni 24,000 wa vavanuna.

¹¹A nduna ya wu 8 ka hweti ya wu 8 ku wa hi Sibekai a muHuxate, wa lixaka la ka Zera; a tlawa wakwe wu wa hi ni 24,000 wa vavanuna.

¹²A nduna ya wu 9 ka hweti ya wu 9 ku wa hi Abiezera a muAnatote, wa nyangwa ya ka Benjamini; a tlawa wakwe wu wa hi ni 24,000 wa vavanuna.

¹³A nduna ya wu 10 ka hweti ya wu 10 ku wa hi Maharai a muNetofate, wa lixaka la ka Zera; a tlawa wakwe wu wa hi ni 24,000 wa vavanuna.

¹⁴A nduna ya wu 11 ka hweti ya wu 11 ku wa hi Benaia a muPiratoni, wa nyangwa ya ka Efraime; a tlawa wakwe wu wa hi ni 24,000 wa vavanuna.

¹⁵A nduna ya wu 12 ka hweti ya wu ku wa hi Heldai a muNetofate, wa lixaka la ka Otnieli; a tlawa wakwe wu wa hi ni 24,000 wa vavanuna.

¹⁶Hehla ka lezo ku wa hi ni tihosana ta tinyangwa ta ka Israeli. A hosana ya ka Rubeni hi Eliezare nʼwana Zikri; ka va ka Simeoni hi Xefatia nʼwana Maaka.

¹⁷Ka va ka Levi hi Haxabia nʼwana Kemueli; ka va ka Aroni hi Zadoke;

¹⁸ka va ka Juda hi Elihu, a munwe wa vanakulobye va Davida; ka va ka Isakare hi Omri nʼwana Mikaeli.

¹⁹Ka va ka Zebuloni hi Ixmaia nʼwana Obadia; ka va ka Naftali hi Jeremote nʼwana Azrieli;

²⁰ka va ka Efraime hi Hoxea nʼwana Azazia; ka khihlanya ga nyangwa ya ka Manasa hi Joeli nʼwana Pedaia.

²¹Ka khihlanya ga nyangwa ya ka Manasa le tikweni ga Gileade hi Iddo nʼwana Zakaria; ka va ka Benjamini hi Jasieli nʼwana Abnere.

²²Ka va ka Dani hi Azareli nʼwana Jerohamu. Leti ti wa hi tihosana ta tinyangwa ta ka Israeli.

²³Davida i wa nga hlayangi lava va nga hi hasi ka 20 wa malembe, hakuva Jehova i wa tsumbisile lezaku i ta anzisa va ka Israeli va tala kota tinyeleti ta tilo. [32]

²⁴Joabe nʼwana Zeruia i wa sangule ku va hlaya, kanilezi a nga va hetangi, hakuva Jehova i lo zangarela va ka Israeli hi kota ya mhaka leyi; hikwalaho a tsengo wabye a wu tsaliwangi bhukwini ga Matimu ya hosi Davida.

²⁵Azmavete nʼwana Adieli i wa hi muhlayisi wa zilo za hosi. Jonatani nʼwana Uzzia i wa hi muhlayisi wa zigurumbu lezi zi nga wa hi lomu masinwini, ni lomu mitini, ni lomu zimitaneni, ni lomu makhokholeni.

²⁶Ezri nʼwana Kelube i wa hi muhlayisi wa lava va tirako ku rima lomu masinwini.

²⁷Ximei a muRamate i wa hi muhlayisi wa zivina; Zabdi a muXifma i wa hlayisa a vinya legi gi nga hi lomu zigowolweni.

²⁸Baal-Hanani a muGedera i wa hlayisa a makuwu ni tisinya ta mikuwu leti ti nga wa hi tinyakeni; Joaxi i wa hi muhlayisi wa tiyindlu ta mafura.

²⁹Xitrai a muXaroni i wa hi muhlayisi wa tihomu leti ti nga waga Xaroni; Xafate nʼwana Adlai i wa hlayisa a tihomu leti ti nga hi lomu mikoveni.

³⁰Obile a muIxmaeli i wa hlayisa a makameli; Jehdeia a muMeronote i wa hlayisa a timbongola.

³¹Jazzizi a muHagri i wa hlayisa a tiyivu. Vontlhe lava va wa hi vahlayisi va wukosi ga hosi Davida.

³²Jonatani, a raru tsongwani wa Davida, i wa hi nduna ya laha hubyeni, a wanuna wa kupima ni wutivi mitsalweni; Jehieli nʼwana Hekmoni i wa hi muhlayisi wa vanana va hosi.

³³Ahitofeli i wa hi singalakati ga hosi; Huxai a muArke i wa hi munghana wa hosi.

³⁴Anzhako ka Ahitofeli ku wa hi na Jehoiada nʼwana Benaia na Abiatara, va enghena wutshanwini gakwe. A nduna ya yimpi ya hosi ku wa hi Joabe.