Read tshwa 1 Kronekele 28 Bible Online

1 Kronekele 28 - tshwa bible

1 Kronekele 28

¹Davida i lo tsombanyisa tontlhe tihosana ta ka Israeli, a tihosana ta tinyangwa, ni tinduna ta mitlawa leyi yi tirelako hosi, ni tinduna ta 1,000, ni tinduna ta mazana, ni vahlayisi va titshomba tontlhe, ni vahlayisi va zifuyo zontlhe za hosi, ni vahlayisi va vanana vakwe, ni mithenwa, ni tinhenha, vontlhe va tsombana le Jerusalema.

²Zonake hosi Davida i lo yima hi mikonzo yakwe, aku: Nzi ingiseni nwina vanakulori, na nwina vanhu va mina! Nzi wa xuvile ku aka a yindlu ya arke ga xivumelwano xa Jehova, ni xikhegetelo xa mikonzo ya Nungungulu wa hina, a yindlu ya kuhumula. Nzi longisile a zilo zo aka ha zona.

³Kanilezi Nungungulu i te ngalo ka mina: Wena u nga ta aka a yindlu yi lumbako a vito ga mina, hakuva u wanuna wa yimpi; u halatile a nkhata.

⁴Hambu lezo, Jehova Nungungulu wa ka Israeli i nzi hlawule ndlwini yontlhe ya dadani wa mina, a kuva nzi hi hosi ya ka Israeli kala kupinzuka; hakuva yena i hlawule Juda a kuva hosi. Lomu nyangweni ya ka Juda i hlawule a yindlu ya dadani wa mina. Lomu xikari ka vana va dadani hi mina nzi nga mu tsakisa, a nzi yimisa kuva hosi ya vontlhe va ka Israeli. [33]

⁵Lomu xikari ka vana va mina vontlhe, hakuva Jehova i nzi nyikile a vana vo tala, i hlawule Solomoni, a nʼwana wa mina, a kuva a tshama xitshanwini xa wuhosi xa mufumo wa Jehova, hehla ka va ka Israeli.

⁶Yena i te ngalo ka mina: A nʼwana wa wena Solomoni hi yena a ta nga aka a yindlu ya mina, ni tihubye ta mina, hakuva mina nzi mu hlawule lezaku ava nʼwana wa mina, minawu nzi tava raru wakwe.

⁷Nzi ta yimisa mufumo wakwe kala kupinzuka, loku yena a simama ku hlayisa a milayo ya mina, ni zileletelo za mina, kota nyamutlha.

⁸Hikwalaho mina nzi wulawula laha mahlweni ka vontlhe va ka Israeli, ni lowu tlhangano wa Jehova, ni lomu tindleveni ta Nungungulu wa nwina, nziku: Gongani, mu lavisisa milayo yontlhe ya Jehova Nungungulu wa nwina, kasi nwina ma fela ku fumela a tiko legi go saseka, legi mu ta nga gi siyela a vana va nwina a kuva tshomba ya vona kala kupinzuka.

⁹Wena nwananga Solomoni, tiva Nungungulu wa dadani wa wena, u mu khozela hi mbilu yi basileko ni kutsaka ka muhefemulo; hakuva Jehova wa kamba timbilu tontlhe, a tiva a timhaka tontlhe ta maalakanyo ya mbilu. Loku wena u mu hlota, u ta mu kuma; kanilezi loku wena u mu tsika, yena i ta ku hoxa kule kala kupinzuka. [34]

¹⁰Cuwuka makunu lezaku Jehova i ku hlawule a ku aka a yindlu ya ku basa. Tiya-ke, u tira!

¹¹Zonake Davida i lo nyika ka nʼwana wakwe Solomoni a xikombiso xa nyangwa ya tempeli, ni xa tiyindlu ta yona, ni xa tiyindlu ta titshomba ta kona, ni xa tikwarutu ta lomu xikari, ni xa yindlu ya ku khongelela kona.

¹²I lo mu nyika a xikombiso xa zontlhe lezi a nga wa hi nazo lomu mbilwini yakwe, xa mahubye ya yindlu ya Jehova, ni xa tikwarutu ta wontihe matlhelo, ni xa yindlu ya titshomba ta Nungungulu, ni zilo zi nyikelweko;

¹³ni xa mitlawa ya vapristi ni vaLevi, ni xa ntiro wontihe wa kukhozela ndlwini ya Jehova, ni matirisela ya zibya zontlhe a ntirweni wa yindlu ya Nungungulu.

¹⁴A mu nyika ni xikombiso xa zibya za nzalama, ni kutika ka nzalama ya kona, a za ntiro wunwe ni wunwani, ni xa zontlhe zibya za siliva, ni kutika ka siliva ya zibya za mitiro ya tixakaxaka;

¹⁵ni kutika ka timeza ta tikandiya ta nzalama, ni tikandiya ta kona ta nzalama; ni kutika ka meza yinwe ni yinwani, ni tikandiya ta kona; ni kutika ka timeza ta tikandiya ta siliva, ni kutika ka meza yinwe ni yinwani, ni tikandiya ta kona, kota ntiro wa meza ya kandiya yinwe ni yinwani.

¹⁶A mu leletela ni kutika ka nzalama ya timeza ta zibaba za ku vekiwa mahlweni ka Jehova, ka meza yinwe ni yinwani, ni kutika ka siliva ya timeza ta siliva.

¹⁷Ni ka mafoloko, ni mingelo, ni tikopo za nzalama yo saseka, ni ka maguwana ya nzalama, ni kutika ka guwana ginwe ni ginwani, ni ka maguwana ya siliva, hi kutika ka guwana ginwe ni ginwani.

¹⁸Ni ka alati ga libani, a nzalama yi nyekisilweko, hi kutika ku faneleko; i lo mu nyika ni xikombiso xa kareta ya makerubima ma tshambulutilweko tipapa ta wona, ma fenengeta a arke ga xivumelwano xa Jehova.

¹⁹Tontlhe timhaka leti ni zikombiso lezi za mitiro leyi yi ta nga mahiwa, zi tsalilwe; nzi pimisilwe zontlhe hi Jehova.

²⁰Davida i lo engeta kambe aku ka nʼwana wakwe Solomoni: Tiya hlana, u ngavi na hlenekera; maha zalezo! U nga chavi, u nga mbheli ntamu, hakuva Jehova Nungungulu, yena Nungungulu wa mina, i tava zinwe na wena; cima a nga ta ku tsika hambu ni ku ku rivala ka yontlhe mitiro ya yindlu ya Jehova kala yi mbhela.

²¹Hi leyi mitlawa ya vapristi ni vaLevi ya ku maha mitiro yontlhe ya yindlu ya Nungungulu; wena u na ni vanhu vo tala vo tlhariha, va ranzako hi timbilu tabye tontlhe a ku maha tixaka tontlhe ta mitiro, ni tinduna ta vanhu vontlhe ti kona a kuva ti maha zontlhe lezi u ta nga ti byela.