Read tshwa 2 Kronekele 12 Bible Online

2 Kronekele 12 - tshwa bible

2 Kronekele 12

¹Makunu laha a mufumo wa Rehoboamu wu nga wa tiyisilwe, a hi ni ntamu, yena ni vontlhe va ka Israeli va lo tsika a nayo wa Jehova.

²Zonake hi lembe ga wuntlhanu ga kufuma ka hosi Rehoboamu, Xixaka hosi ya le Gipite i lo kanziha a ta hlasela Jerusalema, hakuva vona va wa onhele Jehova. [24]

³Yena i lota ni 1,200 wa tikareta, ni 60,000 wa vakhileli va mahaxi, ni yimpi leyo a ngata nayo hi le Gipite yi wa hi ya hombe: vaLibia, ni vaSukkima, ni vaEtiopia.

⁴I lo teka a miti ya makhokhola ya ka Juda, a chikela le Jerusalema.

⁵Zonake ku lota muprofeti Xemaia ka Rehoboamu ni ka tinduna ta va ka Juda, leti ti nga wa tsombene le Jerusalema hi kota yo chava Xixaka; a taku ngalo kabye: Jehova i ngalo; Nwina mu nzi tsikile. Hikwalaho minawu nzi mu tsikile mandleni ya Xixaka!

⁶Zonake a tinduna ta ka Israeli zinwe ni hosi, va lo ti koramisa, vaku: Jehova i lulamile!

⁷Makunu laha Jehova a nga wona lezaku va ti koramisile, ku lota a gezu ga Jehova ka Xemaia, gi taku: Vona va ti koramisile. Nzi nga ta va lovisa, nzi ta va ponisa; ni zanga ya mina yi nga ta tshekulela Jerusalema hi canja ga Xixaka.

⁸Hambulezo va ta mu tirela, kasi va fela ku zi tiva aku xini ku khozela mina, ni ku khozela mifumo ya manwani matiko.

⁹Zinghaho Xixaka a hosi ya le Gipite i lo kanziha Jerusalema a ta teka a tshomba ya yindlu ya Jehova ni tshomba ya yindlu ya wuhosi; i lo teka zontlhe, a teka ni zitlhangu za nzalama, lezi zi nga mahilwe hi Solomoni.

¹⁰Hosi Rehoboamu i lo maha zinwani za suku matshanwini ya lezi zi tekilweko, a zi nyikela mandleni ya tinduna ta varangeli va vahlayisi va nyangwa ya yindlu ya hosi.

¹¹A zikhati lezi a hosi yi enghenako lomu ndlwini ya Jehova, a varinzeli va lo ta zi teka va zi welela, va tlhela va ya zi veka lomu ndlwini ya varinzeli.

¹²Kota lezi Rehoboamu a nga wa ti koramisile, Jehova i lo bohlisa a zanga yakwe, a nga ha mu lovisi kambe. Tlhatakumbiri, lomu tikweni ga ka Juda ku wa hi ni zilo zo saseka.

¹³Zinghaho hosi Rehoboamu i lo ti tiyisa lomu Jerusalema a fuma. I wa hi ni 41 wa malembe a xikhati lexi a nga sangula ku fuma. I lo fuma 17 wa malembe le Jerusalema, mutini lowu Jehova a wu hlawuleko ka tontlhe tinyangwa ta ka Israeli a kuva a veka a vito gakwe lomo. A vito ga nyine wakwe ku wa hi Naama a muAmmoni. [25]

¹⁴I le maha kubiha, hakuva a nga hlotangi Jehova hi mbilu yakwe yontlhe.

¹⁵A mitiro ya Rehoboamu yo sangula ni yo gumesa yi tsalilwe lomu ka matimu ya muprofeti Xemaia, ni ya Iddo a muwoni, ni lomu mabhukwini ya zizukulwana. Zikhatini zontlhe lezo ku wa hi kona kulwa xikari ka Rehoboamu na Jeroboamu.

¹⁶Rehoboamu i lo etlela zinwe ni vararu vakwe, a lahliwa mutini wa Davida. Zonake a nʼwana wakwe Abija i lo fuma xikhundleni xakwe.