Read tshwa 2 Kronekele 13 Bible Online

2 Kronekele 13 - tshwa bible

2 Kronekele 13

¹Zonake Abija i lo sangula ku fumela va ka Juda hi lembe ga wu 18 ga kufuma ka Jeroboamu.

²I lo fuma malembe manharu le Jerusalema. A vito ga nyine wakwe i wa hi Mikaya nʼwana Urieli wa le Gibea. Ku wa hi ni yimpi xikari ka Abija na Jeroboamu.

³Abija i hlomisa 400,000 wa vavanuna, a milangelwa ya tinhenha; yenawu Jeroboamu i lo hlomisa 800,000 wa vavanuna, a milangelwa ya tinhenha.

⁴Zonake Abija i lo yima le hehla ka xitsunga xa Zemaraime, xi nga le zitsungeni za ka Efraime, aku: Wena Jeroboamu, na nwina nwentlhe va ka Israeli, nzi ingiseni!

⁵Kasi nwina a mu zi tivi lezaku Jehova Nungungulu wa ka Israeli i nyikele a mufumo wa ka Israeli ka Davida ni vana vakwe hi xivumelwano xi tiyileko kala kupinzuka ke? [26]

⁶Kanilezi Jeroboamu nʼwana Nebate, a nanza ga Solomoni nʼwana Davida, i suka a vukela a hosi yakwe.

⁷A vanyamijiri lava va nga hiko nchumu, a zihunza milayo va tsombene kakwe, va hlomela Rehoboamu nʼwana Solomoni, laha Rehoboamu a nga ha hi tsongwani, a nga hi na ntamu mbilwini yakwe, a tsanzeka ku ti vikela.

⁸Makunu nwina mu alakanya ku kuma ntamu mahlweni ka mufumo wa Jehova, lowu wu nga canjeni ga vana va Davida; nwina mu tele nguvu, kanilezi mu na ni marole ya nzalama lawa Jeroboamu a mu mahela a kuva vanungungulu va nwina.

⁹Xana a mu hlongolangi a vapristi va Jehova, a vana va Aroni zinwe ni va ka Levi ke? Mu ti yimisele vanwani vapristi kota lezi va mahako vamatiko manwani, muku, loku munhu ata ku ta phahlela hi homu zinwe ni 7 wa tihamba, a yimiswa kuva mupristi wa lexi xi nga hiko nungungulu. [27]

¹⁰Kasike hina, Jehova hi yena a nga Nungungulu wa hina; a hi mu tsikangi; ni vapristi lava va tirako ku khozela Jehova hi vona a vana va Aroni ni va ka Levi, va tirako mitiro yabye.

¹¹Wontihe masiku, mixo ni gambo, va maha ka Jehova a munyikelo wa kuhiswa ni tibani to nuhela, va veka ni zibaba za xikombiso laha mezeni yi basileko, va lumeka tikandiya lomu timezeni ta tona ta nzalama wontihe masiku laha gambyeni, hakuva hina hi hlayisa a nayo wa Jehova Nungungulu wa hina; kanilezi nwina mu mu fularele.

¹²Makunu langutani, Nungungulu i na hina a hi rangela, zinwe ni vapristi vakwe, ni mipunzu leyi Va bako kasi ku mu hangalasa. O, va ka Israeli, mu nga hlomi yimpi muiwa na Jehova Nungungulu wa vararu va nwina, hakuva cima mu nga ta hlula.

¹³Kanilezi Jeroboamu i lo va juma hi nzhako. Zinghaho vona va wa cuwukene ni va ka Juda, lava vo juma na va hi le nzhako kabye.

¹⁴A xikhati lexi a va ka Juda va nga cuwuka le nzhako, va lo kuma lezaku ku wa hi ni yimpi le mahlweni ni le nzhako kabye. Zonake va lo rila ka Jehova, a vapristi vaba mipunzu.

¹⁵A vavanuna va ka Juda va loba huwa, Nungungulu a hlasela Jeroboamu ni vontlhe va ka Israeli, a va hlula mahlweni ka Abija ni va ka Juda.

¹⁶A va ka Israeli va lo panzanyeka mahlweni ka va ka Juda, Nungungulu a va nyikela mandleni yabye.

¹⁷Abija ni vanhu vakwe va lo va hlasela nguvu, hakuva a va ka Israeli lava va ngawa hi kudawa va wa hi 500,000 wa vavanuna, a milangelwa ya tinhenha.

¹⁸A va ka Israeli va lo khoziswa xikhatini lexo, a va ka Juda va hlula, hakuva va wa tsumba Jehova Nungungulu wa vararu vabye.

¹⁹Abija i lo hlongolisa Jeroboamu, a mu tekela a miti yakwe: Beteli ni zimitana za kona, na Jexana ni zimitana za kona, na Efroni ni zimitana za kona.

²⁰Jeroboamu cima a nga ha kumangi kambe a ntamu masikwini ya Abija. I lo biwa hi Jehova, afa.

²¹Kanilezi Abija i lo simama a enzeleka; i lo teka 14 wa vasati, a beleka 22 wa vafana ni 16 wa vanhanyana.

²²A zinwani zimaho za Abija, lezi a zi mahileko ni lezi a zi wulileko zi tsalilwe lomu ka matimu ya muprofeti Iddo.