Read tshwa 2 Kronekele 16 Bible Online

2 Kronekele 16 - tshwa bible

2 Kronekele 16

¹Hi lembe ga wu 36 ga kufuma ka Asa, Baaxa a hosi ya ka Israeli i lo kanziha tikweni ga ka Juda a ya aka le Rama, kasi a fela ku tsimbetela a vanhu a ku huma ni ku enghena ka Asa a hosi ya ka Juda.

²Zonake Asa i lo humesa a siliva ni nzalama lomu kwameni wa yindlu ya Jehova ni wa yindlu ya hosi, a yi rumela ka Ben-Hadade a hosi ya le Siria yi nga wa akile le Damasku, aku ngalo:

³Ku kona kuzwanana xikari ka mina na wena, kota lezi a dadani wa mina ni wa wena va nga wa zwanana. Mina nza ku rumela a siliva ni nzalama. Famba u ya tshova kuzwana ka wena na Baaxa a hosi ya ka Israeli, kasi a fela ku suka leno ka mina.

⁴Ben-Hadade i lo ingisa timhaka ta hosi Asa, a rumela a tinduna takwe ta yimpi a ku ya vukela a miti ya ka Israeli; va lo hlasela Ijoni, na Dani, na Abel-Maime, ni yontlhe miti ya matlhari ya ka Naftali.

⁵Laha Baaxa a nga wa zi zwile, i lo tsika ku aka le Rama, a kaketa mitiro yakwe.

⁶Zonake hosi Asa i lo vitana a vaJuda vontlhe, va ya tleketlela a maribye le Rama ni timhanze, lezi Baaxa a nga wa akile ha zona. Va lo aka ha zona le Geba ni le Mizpa.

⁷Xikhatini xwalexo, Hanani a muwoni i lota ka Asa a hosi ya ka Juda a taku kakwe: Lezi wena u tsumbileko a hosi ya le Siria, u nga tsumbi Jehova Nungungulu wa wena, hi kota ya lezi a mabutho ya hosi ya le Siria ma pswhutukile canjeni ga wena.

⁸Kasi a yimpi ya vaEtiopia ni vaLibia, ni makamaka wa tikareta ni vakhileli va mahaxi, va wa nga talangi ke? Leziya u nga wa tsumba Jehova, yena i va nyikele mandleni ya wena.

⁹Hakuva a mahlo ya Jehova ma languta misaveni yontlhe a ku tiyisa lava va nga vakwe hi timbilu tabye tontlhe. U mahile wupumbu mhakeni leyi, hakuva kusukela lezi u tava ni tiyimpi. [31]

¹⁰Zonake Asa i lo zangarela a muwoni a mu hoxa paxweni. I wa mu zangarele nguvu hi kota ya mhaka leyo. I lo xanisa a vanwani vo kari ka xwalexo xikhati.

¹¹A zimaho za Asa zo sangula ni zo gumesa zi tsalilwe lomu bhukwini ga tihosi ta ka Juda ni ta ka Israeli.

¹²Hi lembe ga wu 39 ga kufuma kakwe, Asa i lo babya hi xilonza za lomu mikonzweni zo tshisa nguvu, kanilezi hambu lomu wubabyini gakwe a nga hlotangi Jehova; i lo lava tinʼanga.

¹³Asa i lo etlela zinwe ni vararu vakwe; i file hi lembe ga wu 41 ga kufuma kakwe.

¹⁴Va lo mu lahla lomu nkeleni lowu a nga wa ti mahele yena wutsumbu a mutini wa Davida. Va lo mu etlelisa ka mubhedi wu teleko hi masema yo nuhela ni tixaka tontlhe ta mimiri ti tlhanganyisilweko hi wutlhari. Va lo mu hisela a tibani to tala to nuhela.