Read tshwa 2 Kronekele 2 Bible Online

2 Kronekele 2 - tshwa bible

2 Kronekele 2

¹Solomoni i lo xuva lezaku ku akiwa a yindlu yi lumbako a vito ga Jehova, ni yindlu yakwe ya wuhosi.

²Solomoni i lo hlaya 70,000 wa vavanuna, kasi ku rwala minzhwalo, ni 80,000 wa vavanuna kasi ku vatla maribye lomu xitsungeni, ni 3,600 wa vavanuna va nga wa hi vahlayisi. [3]

³Solomoni i lo rumela mhaka ka Huramu, a hosi ya le Tire, aku kakwe: Hi nga nzi mahela lezi u nga mahela dadani wa mina Davida—u nzi rumela a tisinya ta sedare, kasi nza fela ku ti akela ha tona a yindlu yo tshama ka yona.

⁴Languta, mina nzi lava ku aka a yindlu yi lumbako a vito ga Jehova Nungungulu wa mina nzi yi nyikela kakwe, nzi hisela lomo libani mahlweni kakwe, ni ku veka zibaba wontihe masiku mahlweni kakwe za zikombiso, ni ku mu phahlela hi munyikelo wa kuhiswa wa mixo ni gambo, ni wa masabado, ni wa kuhumeni ka hweti, ni wa mibuzo ya Jehova Nungungulu wa hina. Leyo hi yona a fanelo ya va ka Israeli kala kupinzuka. [4]

⁵A yindlu leyi nzi lavako ku aka nja hombe, hakuva Nungungulu wa hina ngwa hombe ku hunza vanungungulu vontlhe.

⁶Kanilezi himani a nga ni ntamu wa ku mu akela a yindlu ke? Hakuva hambu a tilo ni tilo ga matilo a ma zi koti ku mu enela. Makunu mina nza kuva mani wo kala nzi mu akela a yindlu, loku yi nga hi ya ku hisela ka yona libani mahlweni kakwe ke? [5]

⁷Hikwalaho nzi rumele a munhu a tlharihileko mitirweni ya nzalama ni ya siliva, ni ya suku, ni ya ziketse, ni ya za muvala wo zirila ni wa zo pswhuka, ni wa zo palala, ni lava va tivako ku vatla, kasi va fela ku tira ni vanhu va mina va lomu tikweni ga ka Juda ni Jerusalema, lava va hlawulweko hi dadani wa mina Davida.

⁸U nzi rumela ni tisinya ta tisedare ta le Lebanoni, ni ta kipres, ni ta almuga, hakuva mina nza zi tiva lezaku a malanza ya wena ma zi tiva ku tsema tisinya le Lebanoni. Zinghaho a malanza ya mina ma ta tira zinwe ni malanza ya wena.

⁹Va ta nzi longisela a tisinya to tala, hakuva a yindlu leyi nzi ta nga yi aka yi tava ya hombe, yo saseka nguvu.

¹⁰A malanza ya wena lawa ma ta nga tsema tisinya nzi ta ma nyika 20,000 wa tipimo ta mavele ma tlhokolweko, ni 20,000 wa tipimo ta sevada, ni 20,000 wa tikarafawu ta vinya, ni 20,000 wa tikarafawu ta mafura.

¹¹Huramu a hosi ya le Tire i lo hlamula hi papilo, a gi rumela ka Solomoni, aku: Kota lezi Jehova a ranzileko a vanhu vakwe, i ku yimisile wena a kuva hosi hehla ka vanhu vakwe.

¹²A engeta aku: A ku bongiwe Jehova Nungungulu wa ka Israeli, loyi a nga maha a tilo ni misava, hakuva i nyikile ka hosi Davida a nʼwana a tlharihileko, loyi a nga ni malanga ni kupima, loyi a ta nga aka a yindlu ya Jehova ni yindlu yakwe ya wuhosi. [6]

¹³Makunu mina nza rumela ka wena a tlhari leyi yi nga ni kupima, yena Huramu-Abi,

¹⁴a nʼwana wa wasati a humako ka vana va ka Dani, kanilezi a raru wakwe na hi muTire, Yena wa tiva mitiro ya nzalama ni ya siliva, ni ya suku, ni ya ziketse, ni ya maribye, ni ya tisinya, ni ya za muvala wo zirila, ni zo valala, ni ya za wukene, ni ya zo pswhuka; kambe wa zi tiva a ku kehlela tontlhe tixaka ta zifananiso zo tlhavelwa, ni ku maha yontlhe mitiro leyi yi lavekako. I ta tira ni zitiri za wena ni zitiri za hosi ya mina Davida, a raru wa wena.

¹⁵Makunu ngha a hosi yanga yi rumela ka malanza ya yona a mavele, ni sevada, ni mafura, ni vinya, a zilo lezi yi zi wulileko.

¹⁶Hi ta tsema a tisinya to tala lomu Lebanoni; tontlhe leti u ta nga ti lava hi ta ku rumela, hi ti tlhatukisa hi bimbi ti chikela le Jopa, wena u ti tleketlela tiya le Jerusalema.

¹⁷Solomoni i lo hlaya vontlhe valuveli lava va nga wa hi lomu tikweni ga ka Israeli, a lanzela a tsengo lowu Davida a dadani wakwe a nga wu kumile; wu wa hi 153,600 wa vavanuna.

¹⁸I lo hlawula 70,000 wabye a kuva varwali va minzhwalo, a 80,000 wabye vava vavatli va maribye le xitsungeni, ni 3,600 vava vahlayisi ni vatirisi va vanhu.