Read tshwa 2 Kronekele 20 Bible Online

2 Kronekele 20 - tshwa bible

2 Kronekele 20

¹Anzhako ka lezo a vanana va ka Moabi, ni va ka Amoni, ni vanwani va ka Meunime, va lo ta vukela Jehoxafate valwa naye.

²Zonake va lo ta byela Jehoxafate, vaku: Kuta xidlemo xa hombe, xi sukako hi le Edomi, le tlhatuko wa bimbi, a ku ta ku vukela; va le Hazazan-Tamara, ku nga Engedi.

³Jehoxafate i lo chava, a ti longisela ku hlota Jehova; i lo laya vontlhe va ka Juda lezaku va yila.

⁴Zinghaho a vaJuda va lo tsombana khatiginwe a ku hlota ntamu ka Jehova; va lo Suka mitini yabye yontlhe, va tela ku ta hlota Jehova.

⁵Jehoxafate i lo yima laha gotsovanyanweni wa va ka Juda ni va le Jerusalema lomu ndlwini ya Jehova, mahlweni ka hubye giswa,

⁶aku: Jehova Nungungulu wa vadadani va hina, a hi wena Nungungulu wa le tilweni ni mufumeli wa matiko wontihe ke? Canjeni ga wena ku na ni ntamu ni wunhenha; a nga kona munhu a zi kotako kulwa na wena.

⁷Nungungulu wa hina, a hi wena u panzanyileko a vaaki va tiko legi mahlweni ka vanhu va wena, a va ka Israeli, u gi nyikela kala kupinzuka ka pswalo wa Abrahama loyi a nga hi xaka ga wena hi masiku?

⁸Vona va akile ka gona, va akela a vito ga wena a yindlu ya kubasa, vaku:

⁹Loku hi humelwa hi makhombo manwani, kutani tiyimpi, a kulamula, kutani mitungu, a ndlala, hina hi ta yima mahlweni ka yindlu leyi ni mahlweni ka wena, hakuva a vito ga wena gi lomu ndlwini leyi; hlomulweni wa hina hi ta rila ka wena, u hizwa u hi ponisa.

¹⁰Makunu, languta a vanana va ka Amoni ni va ka Moabi ni va xitsunga xa Seire, lava u nga vumelangiko va ka Israeli a ku enghena xikari kabye xikhatini lexo va nga huma hi le Gipite, kanilezi va lo va potsa, va nga va lovisi;

¹¹hi nga wona lezi va hi chachazelako ha zona! Va lava ku hi hlongola tshombeni leyi u hi nyikileko.

¹²Nungungulu wa hina, u nga ta va lamula ke? Hakuva hina a hi na ntamu wa kulwa ni xidlemo xa hombe nguvu xi tako ku ta hi vukela; a hi zi tivi lezi hi to maha, kanilezi a mahlo ya hina ma cuwukele ka wena.

¹³Vontlhe vaJuda va lo yima mahlweni ka Jehova zinwe ni vanana vabye, ni vasati vabye ni vana vabye.

¹⁴Zonake a Moya wa Jehova wu lota hehla ka Jahazieli nʼwana Zakaria wa Benaia wa Jeieli wa Mattania, a muLevi wa lomu xikari ka vana va Asafa na hi kwalomu xikari ka hlengeletano,

¹⁵aku: Zwanani nwina nwentlhe vaJuda ni vaaki vontlhe va Jerusalema, na wena hosi Jehoxafate! Jehova i ngalo ka nwina: Mu nga chavi mu mbhela ntamu hi kota ya xidlemo lexi xa hombe nguvu, hakuva a yimpi leyi a hi ya nwina, kanilezi nja Nungungulu.

¹⁶Manziko relelani mu va yela; hi lavaya, va kanziha vata hi le xitsungeni xa Zizi. Mu ta ya kumana navo le magumo ka nkova lowu wu cuwukeneko ni xiwula xa Jerueli.

¹⁷A hi nwina mu ta ngalwa yimpini leyi: nwina humani mu ya yima ntsena. Mu ta wona a kuhanyisa ka Jehova loyi a nga zinwe na nwina. Mu nga chavi nwina va ka Juda na nwina va le Jerusalema mu mbhela ntamu, manziko fambani mu ya va vuka, Jehova i tava zinwe na nwina. [36]

¹⁸Zonake Jehoxafate i lo khizama awa hi nghohe yakwe, ni vontlhe vaJuda ni vaaki va Jerusalema va lowa mahlweni ka Jehova va khozela.

¹⁹A va ka Levi, a vana va Kohate ni vana va Kora va lo suka va dumisa Jehova Nungungulu wa ka Israeli hi gezu ga hombe.

²⁰Hi siku gi gamelako va lo suka ni mixo va loya tlhelo ga xiwula xa le Tekoa; va te na va ha suka, Jehoxafate i lo yima, aku: Hi nga zwani nwina vaJuda na nwina vaaki va Jerusalema! Tsumbani Jehova Nungungulu wa nwina, mu ta tiyiswa; tsumbani vaprofeti vakwe, mu ta humelela!

²¹Laha a nga wa bohile xikungo ni vanhu, i lo hlawula lava va ta nga yimbelela mahlweni ka Jehova ni ku mu dumisa, na va ambele tinguwo ti basileko, va ranga mahlweni ka yimpi, vaku: Dumisani Jehova, hakuva a wuxinji gakwe gi tshamile kala kupinzuka!

²²Laha va nga sangula ku yimbelela, va dumisa Jehova, yena Jehova i lo maha xijumani lenzhako ka vana va ka Amoni ni maMoabi, ni va xitsunga xa Seire lava va ngata ku ta vukela va ka Juda; va lo hluliwa.

²³Hakuva a va ka Amoni ni maMoabi va lo vukela a vaaki va xitsunga xa Seire, va va hlasela va va lovisa; laha va nga wa mbhetile a vaaki va le Seire, va lo hlaselana ha voce. [37]

²⁴Laha a vaJuda va nga kanziha hehla ka xitsunga lexo xa xiwula va lo cuwuka a xidlemo, va wona a zirumbi zi nga wa mbambamele lahasi; laho ku wa nga ponangi ni munhu munwe.

²⁵A xikhati lexi Jehoxafate ni vanhu vakwe va ngata ku ta phanga, va lo ta kuma xikari ka zirumbi a titshomba tinyingi ni zilo za lisima; va lo zi teka na zi tele va tlhela va tsanzeka ni ku zi rwala. Va lo phanga titshomba hi masiku manharu hakuva ti wa tele nguvu.

²⁶Hi siku ga wumune va lo tsombana le nkoveni wa Beraka, hakuva laho va lo dumisa Jehova. Hikwalaho a wutshamu lego gi lo chuliwa vito ga Beraka kala nyamutlha.

²⁷Zonake vontlhe vaJuda ni va le Jerusalema va lo tlhelela Jerusalema hi kutsaka; Jehoxafate i lo ranga mahlweni kabye, hakuva Jehova i wa va tsakisile hi ku va ponisa ka valala vabye.

²⁸Va lo enghena Jerusalema ni lomu ndlwini ya Jehova ni mihambi ni zitende ni mipunzu.

²⁹Zonake laha a mifumo ya matiko wontihe yi ngazwa lezaku Jehova i lwile ni valala va ka Israeli, yi lo chava Nungungulu.

³⁰Zinghaho a mufumo wa Jehoxafate wu lova ni kurula, hakuva Nungungulu wakwe i lo mu nyika kuhumula matlhelo wontihe.

³¹Jehoxafate i lo fumela va ka Juda. I wa hi ni 35 wa malembe a xikhati lexi a nga sangula ku fuma. I lo fuma 25 wa malembe le Jerusalema. A vito ga nyine wakwe i wa hi Azuba nʼwana Xilhi.

³²I lo lanzela ndlela ya raru wakwe Asa, a nga hambukangi a huma ka yona; i lo maha kululama mahlweni ka Jehova.

³³Hambu lezo a matshamu ma tlakukileko a ma susiwangi, a vanhu va wa nga tiyangi khwatsi ndleleni ya ku hlota Nungungulu wa vararu vabye.

³⁴A zinwani zimaho za Jehoxafate zo sangula ni zo gumesa zi tsalilwe lomu ka matimu ya Jehu nʼwana Hanani, lawa ma enghenisilweko bhukwini ga tihosi ta ka Israeli.

³⁵Anzhako ka lezo Jehoxafate a hosi ya ka Juda i lo maha wuxaka na Ahazia a hosi ya ka Israeli, loyi a nga wa maha kubiha.

³⁶I lo hlengela naye a ku maha a mataro le Ezioni-Gebera yoya Tarxixi.

³⁷Zoriake Eliezare nʼwana Dadavahu wa le Merexa i lo profeta mahlweni ka Jehoxafate, aku: Lezi wena u nga hlengela na Ahazia, Jehova i gohile mitiro ya wena. Zinghaho a mataro ma lo goheka, ma tsanzeka kuya Tarxixi.