Read tshwa 2 Kronekele 21 Bible Online

2 Kronekele 21 - tshwa bible

2 Kronekele 21

¹Jehoxafate i lo etlela zinwe ni vararu vakwe a lahliwa navo le mutini wa Davida; zonake a nʼwana wakwe Jehoramu i lo fuma xikhundleni xakwe.

²I wa hi ni vanakulobye, a vafana va Jehoxafate: Azaria, Jehieli, Zakaria. Azaria, Mikaeli na Xefatia; vontlhe lava va wa hi vafana va Jehoxafate a hosi ya ka Israeli.

³A raru wabye i wa va avele titshomba to tala ta siliva, ni nzalama, ni zilo za malongo, ni miti ya makhokhola lomu tikweni ga ka Juda; kanilezi a mufumo i wa nyikile Jehoramu, hakuva hi yena a nga hi matewula.

⁴Kanilezi laha Jehoramu a nga wa amukele a mufumo wa raru wakwe, na a ti tiyisile, i lo daya vontlhe vanakulobye hi tlhari ni tihosana tinwani ta va ka Israeli.

⁵Jehoramu i wa hi ni 32 wa malembe laha a nga sangula ku fuma. I lo fuma 8 wa malembe le Jerusalema.

⁶I lo lanzela tindlela ta tihosi ta va ka Israeli, khwatsi hi yindlu ya Ahabi, hakuva a sati wakwe i n wa Ahabi; hikwalaho i lo maha kubiha mahlweni ka Jehova.

⁷Hambu lezo Jehova a nga ranzangi ku lovisa a yindlu ya Davida, hi kota ya xivumelwano lexi a xi mahileko naye, ni mhaka leyi a nga yi wula aku i ta mu nyika, yena ni vanana vakwe, a kandiya kala kupinzuka.

⁸Xikhatini xakwe a va ka Edomi va lo hluwuka va ka Juda, va ti yimisela hosi.

⁹Zonake Jehoramu i lo huma zinwe ni tinduna takwe, ni tikareta takwe tontlhe; i lo suka ni wusiku a ya hlasela va ka Edomi lava va mu ranzeleko, ni tinduna ta tikareta.

¹⁰A va ka Edomi va lo hluwuka va ka Juda kala lezi. Xikhatini xwalexo Libna i lo hluwuka kakwe, hakuva yena, i wa fularele Jehova Nungungulu wa vadadani vakwe.

¹¹Jehoramu i lo engeta kambe a maha matshamu ma tlakukileko lomu zitsungeni za va ka Juda; i lo kucetela a vanhu va le Jerusalema ku ti nyiketela wubhayini, a pengisa va ka Juda.

¹²Ku lota kakwe a papilo gi tsalilweko hi muprofeti Elija, aku: Jehova Nungungulu wa dadani wa wena Davida,! ngalo: Kota lezi u nga fambiko hi tindlela ta raru wa wena Jehoxafate, ni ta Asa a hosi ya ka Juda,

¹³kanilezi u famba hi tindlela ta tihosi ta va ka Israeli, u kucetela va ka Juda ni vanhu va le Jerusalema a ku maha wubhayi, va lanzela zimaho za yindlu ya ka Ahabi, ni lezi u deleko a vanakuloni va yindlu ya raru wa wena, lava va nga wa hi va nene ku hunza wena,

¹⁴Jehova i ta bhoxa a mbanga ya hombe lomu vanhwini va wena; i taba a vana va wena ni vasati va wena, ni zontlhe lezi zi nga za wena.

¹⁵Wena wutsumbu u ta biwa hi khombo ga hombe ga wubabyi ga marumbu, gi ta nga enzelekelana kala marumbu ya wena ma huma hi kota ya ntamu wa zilonza.

¹⁶Jehova i lo hlohlotela vaFilistia ni vaArabia lava va akileko kusuhani ni Etiopia a kuva va vukela Jehoramu.

¹⁷Va lo kanziha vata tikweni ga ka Juda va ta enghena va phanga gontlhe wukosi legi gi nga wa hi ndlwini ya hosi; va teka ni vanana vakwe ni vasati vakwe, ku nga sali ni mufana munwe ahandle ka Jehoahaza a nzisana va vana vakwe.

¹⁸Anzhako ka zontlhe lezo Jehova i lo muba hi wubabyi ga marumbu legi gi nga holiko.

¹⁹A wubabyi gi lo kula siku ni siku; kumbheleni ka malembe mambiri a marumbu yakwe ma lo huma hi kota ya ntamu wa wubabyi lego. I lofa hi tsheku ya hombe. A vanhu vakwe a va mu hiselangi tibani khwatsi hi lezi va nga mahelwa vararu vakwe. [38]

²⁰I wa hi ni 32 wa malembe a xikhati a nga sangula ku fuma. 1 lo fuma 8 wa malembe le Jerusalema. I lofa a vanhu na va nga xaniseki; a lahliwa mutini wa Davida, kanilezi na ku nga hi lomu xilahleni xa tihosi.