Read tshwa 2 Kronekele 22 Bible Online

2 Kronekele 22 - tshwa bible

2 Kronekele 22

¹A vanhu va le Jerusalema va lo yimisa Ahazia, a xisiva-marumbu xakwe a kuva hosi xikhundleni xakwe, hakuva a tlawa lowu wu ngata ni vaArabia lomu wugovelweni, wu dele vontlhe a vana va hombe va hosi. Hikwalaho Ahazia nʼwana Jehoramu hosi ya ka Juda, i lo fuma.

²Ahazia i wa hi ni 42 wa malembe a xikhati a nga sangula ku fuma; i lo fuma lembe ginwe le Jerusalema. A vito ga nyine wakwe i wa hi Atalia nʼwana Omri.

³Yenawu i lo lanzela tindlela ta va ka Ahabi, hakuva a nyine wakwe hi yena a nga wa muha wusungukati, a mu kucetela ku maha kubiha.

⁴I lo maha kubiha mahlweni ka Jehova, a lanzela zimaho za yindlu ya ka Ahabi, hakuva hi vona va nga hi masungukati yakwe anzhako ka kufa ka raru wakwe, kala a lobyiswa.

⁵Hi kota ya ku kucetelwa hi vona, i lo suka a famba na Jehoramu nʼwana Ahabi a hosi ya ka Israeli le yimpini ya kulwa na Hazaeli a hosi ya le Siria le Ramote-Gileade. A maSiria va lo gwaza Joramu.

⁶I lo tlhela aya le Jezreeli a ku ya chumiwa a timbanga leti a nga wa gwazilwe le Rama na alwa na Hazaeli a hosi ya le Siria. Ahazia nʼwana Jehoramu hosi ya ka Juda, i lo relela aya le Jezreeli a ya wona Joramu nʼwana Ahabi, kota lezi a nga wa babya.

⁷Makunu a kulobyiswa ka Ahazia ku wa hi kuranza ka Nungungulu, hi kota ya kuya ka Joramu, hakuva a xikhati a nga chikela i lo hloma yimpi na Joramu valwa na Jehu nʼwana Nimxi, loyi Jehova a mu totileko ku lovisa a yindlu ya Ahabi.

⁸Laha Jehu a nga wa lamula a yindlu ya Ahabi, i lo kuma a tinduna ta va ka Juda ni vana va vanakulobye va Ahazia, lava va nga wa khozela Ahazia; i lo va daya.

⁹I lo rumela a vanhu a ku ya lava Ahazia; va lo ya mu khoma le Samaria le a nga wa fihlele kona, va mu neha ka Jehu. I lo ta dawa. Kanilezi va lo mu lahla, hakuva va te ngalo: I nʼwana wa Jehoxafate loyi a nga wa ranza Jehova hi mbilu yakwe yontlhe. Makunu ku wa nga ha salangi a munhu wa yindlu ya Ahazia a nga wa hi na malungelo yo fuma.

¹⁰Makunu laha Atalia, a nyine wa Ahazia, a nga wona lezaku a nʼwana wakwe i file, i lo suka a lovisa wontihe a pswalo wa wuhosi ga tihosi ta ka Juda.

¹¹Kanilezi Jehoxabeate a nhanyana wa hosi Joramu i lo teka Joaxi wa Ahazia a mu nyemukisa xikari ka vana va hosi, lava va nga wa dayetelwa, a mu enghenisa lomu kwarutwini ni muanwisi wakwe. Zinghaho Jehoxabeate nʼwana hosi Joramu, a sati wa mupristi Jehoiada, hakuva yena i wa hi makabye wa Ahazia, i lo mu fihla a nga kumiwi hi Atalia; hikwalaho a nga mu dayangi.

¹²I wa hi zinwe navo na fihlilwe lomu ndlwini ya Nungungulu ntlhanu wa malembe ni ginwe; Atalia na a fumela tiko.