Read tshwa 2 Kronekele 27 Bible Online

2 Kronekele 27 - tshwa bible

2 Kronekele 27

¹Jotamu i wa hi ni 25 wa malembe a xikhati a nga sangula ku fuma; i lo fuma 16 wa malembe le Jerusalema. A vito ga nyine wakwe i wa hi Jeruxa nʼwana Zadoke.

²I lo maha kululama mahlweni ka Jehova, a lanzela zontlhe lezi a raru wakwe Uzzia a nga zi mahile; ntsena lezaku yena a nga enghenangi lomu tempeleni ya Jehova. Kanilezi a vanhu va lo simama va onha.

³I lo aka a nyangwa ya le hehla ya yindlu ya Jehova, a maha mitiro ya hombe hi khurisi ga Ofeli.

⁴Ni kambe i lo aka a miti le xitsungeni xa ka Juda, a aka ni tiyindlu ta wuhosi ni makhokhola lomu makhwatini.

⁵I lolwa ni hosi ya va ka Amoni a va khozisa. Gwalego lembe a va ka Amoni va lo mu nyika a 100 wa titalenta ta siliva, ni 10,000 wa tipimo ta mavele, ni 10,000 wa tipimo ta sevada. A lembe ga wumbiri ni ga wunharu a va ka Amoni va lo humesa a nzuvo ya lipimo lelo.

⁶Zinghaho Jotamu i lo kuma ntamu, hakuva yena i wa ti longisela tindlela takwe hi Jehova Nungungulu wakwe.

⁷A zinwani za Jotamu, ni tiyimpi takwe tontlhe, ni mitiro yakwe, zi tsalilwe bhukwini ga matimu ya tihosi ta ka Israeli ni ta ka Juda.

⁸I lo sangula ku fuma na hi ni 25 wa malembe, a fuma 16 wa malembe le Jerusalema.

⁹Jotamu i lo etlela zinwe ni vararu vakwe, a lahliwa mutini wa Davida. Zonake a nʼwana wakwe Ahaza i lo fuma xikhundleni xakwe.