Read tshwa 2 Kronekele 36 Bible Online

2 Kronekele 36 - tshwa bible

2 Kronekele 36

¹Zonake a vanhu va tiko va lo teka Joahaza nʼwana Josia va mu yimisa a kuva hosi xikhundleni xa raru wakwe le Jerusalema.

²Joahaza i wa hi ni 23 wa malembe a xikhati a nga sangula ku fuma; i lo fuma tihweti tinharu lomu Jerusalema.

³A hosi ya le Gipite yi mu tekela wuhosi gakwe le Jerusalema, a khupisa a vanhu hi 100 wa titalenta ta siliva, ni talenta yinwe ya nzalama.

⁴A hosi ya le Gipite yi lo yimisa Eliakimu, a nakulobye, a kuva hosi ya ka Juda ni Jerusalema, a hunzula a vito gakwe, aku hi Jehoiakimu. Neko i lo teka nakulobye Joahaza a mu yisa le Gipite.

⁵Jehoiakimu i wa hi ni 25 wa malembe a xikhati a nga sangula ku fuma; i lo fuma 11 wa malembe le Jerusalema. I lo maha kubiha mahlweni ka Jehova Nungungulu wakwe.

⁶Ku lota Nebukadnezare, a hosi ya le Babuloni, a talwa naye, yi mu boha hi mangenje ya suku yi mu yisa le Babuloni.

⁷Nebukadnezare i lo teka zinwani zibya za yindlu ya ka Jehova a zi yisa le Babuloni, a ya zi veka lomu ndlwini yakwe ya wuhosi.

⁸A zinwani zimaho za Jehoiakimu, ni manyala ma bihileko lawa a nga maha, ni lezi zi kumilweko ka yena, zi tsalilwe lomu bhukwini ga Matimu ya tihosi ta ka Israeli ni ta ka Juda. A nʼwana wakwe Jehoiakina i lo fuma xikhundleni xakwe.

⁹Jehoiakina i wa hi ni 8 wa malembe a xikhati a nga sangula ku fuma; i lo fuma tihweti tinharu ni khume ga masiku le Jerusalema; i lo maha kubiha mahlweni ka Jehova.

¹⁰Lomu kusanguleni ka lembe gi gamelako, hosi Nebukadnezare i lo rumela vanhu va ya mu khoma va mu yisa Babuloni zinwe ni zibya lezo zo saseka za yindlu ya Jehova. I lo yimisa nakulobye Zedekia a kuva hosi ya ka Juda ni Jerusalema.

¹¹Zedekia i wa hi ni 21 wa malembe a xikhati a nga sangula ku fuma; i lo fuma 11 wa malembe le Jerusalema. [57]

¹²I lo maha kubiha mahlweni ka Jehova Nungungulu wakwe, a nga ti koramisangi mahlweni ka muprofeti Jeremia, loyi a nga wa mu byela a timhaka ta Jehova.

¹³Yenawu i lo hluwuka ka hosi Nebukadnezare loyi a nga mu hlambanyisa hi vito ga Nungungulu; i lo nonohisa a nhamu ni mbilu yakwe, a nga tlhelelangi ka Jehova Nungungulu wa ka Israeli. [58]

¹⁴Tlhatakumbiri a tihosana tontlhe ta vapristi, ni vanhu va tiko va lo anzisa nguvu kuhambunyeta kabye, va lanzela manyala wontihe ya vamatiko, va nyenyezisa a yindlu ya Jehova leyi a nga wa yi basisile a kuva yakwe le Jerusalema.

¹⁵Jehova Nungungulu wa vadadani vabye i wa va layile zikhati zinyingi hi mitsumi yakwe, hakuva i wa hawukela a vanhu vakwe ni wutshamu gakwe.

¹⁶Kanilezi vona va lo rukatela a mitsumi ya Nungungulu, va xanza timhaka ta yena, va hlekula vaprofeti vakwe, kala a zanga ya Jehova yi vukela a vanhu vakwe laha ka kuva ku nga hi na kuhuluka.

¹⁷Hikwalaho i lo va rumela a hosi ya maKaldea, yi ta daya majaha yabye hi matlhari lomu ndlwini yabye yo basa; a nga nyenyeletelangi majaha, hambu ni vanhanyana, ge hambu zikhosana zi nga ni wuvu; i lo va nyikela vontlhe mandleni yakwe.

¹⁸Zontlhe a zibya za yindlu ya Nungungulu, a za hombe ni zitsongwani, ni wukosi ga yindlu ya Jehova, ni ga hosi, ni ga tinduna takwe, Nebukadnezare i lo yisa zontlhe le Babuloni.

¹⁹Va lo hisa a yindlu ya Nungungulu, va khungumula a ligingisi la Jerusalema, va hisa tontlhe tiyindlu ta wuhosi, va xakela zontlhe zilo za malongo.

²⁰Lava va ponileko matlhari, i lo va gula a va yisa le Babuloni kasi va fela ku ya mu tirela, yena zinwe ni vanana vakwe, kala ku huma a mufumo wa Persia.

²¹Kasi ku fela ku tatiseka a gezu ga Jehova legi gi wulilweko hi nomu wa Jeremia, kala a tiko gi ta ti tsakela hi masabado ya gona; gi humula xikhati xontlhe lexi kala ku mbhela 70 wa malembe. [59]

²²Zonake hi lembe go ranga ga kufuma ka Kurusi a hosi ya le Persia, kasi ku fela ku tatiseka a gezu ga Jehova a gi wulileko hi nomu wa Jeremia, Jehova i lo vuxa a mbilu ya Kurusi a hosi ya le Persia, aba hungu ka wontihe mufumo wakwe ni ku tsala aku: [60]

²³Kurusi a hosi ya le Persia i ngalo: Jehova Nungungulu wa le tilweni i nzi nyikile yontlhe mifumo ya misava; i nzi leletele a kuva nzi mu akela a yindlu le Jerusalema lomu tikweni ga ka Juda. Ni wihi xikari ka nwina loyi a nga wa vanhu vakwe, Jehova Nungungulu wakwe ave zinwe naye, ngha a kanziha a famba kona!