Read tshwa 2 Kronekele 4 Bible Online

2 Kronekele 4 - tshwa bible

2 Kronekele 4

¹Tlhatakumbiri, i lo maha a alati ga suku; a kuleha ka gona gi wa hi 20 wa mikono, a kuanama ka gona gi wa hi 20 wa mikono, ni kutlakuka ka gona gi wa hi 10 wa mikono. [8]

²I lo nyekisa a suku a maha ha wona a bimbi; gi wa hi ga 10 wa mikono kusukela tlhelo ginwe kuya ka ginwani tlhelo, na gi hi xirenzelekwani. A kutlakuka ka gona gi wa hi ntlhanu wa mikono, na gi renzelekelwe hi lingoti la 30 wa mikono wontihe matlhelo.

³Lahasi ka gona ku wa hi ni mifananiso ya tihomu to mahiwa hi suku matlhelweni wontihe, na ku hi ni 10 wa yona ka kono munwe; ti wa mahilwe hi tixaxa timbiri, na ti mahilwe zinwe na gona hi suku wu nyekisilweko.

⁴Gona gi wa hi le hehla ka 12 wa tikavi; a tinharu ti lo cuwuka Nwalungu, a tinharu ti cuwuka Mupela-gambo, a tinharu ti cuwuka Dzongeni, a tinharu ti cuwuka Muhuma-gambo; a bimbi gi wa hi hehla ka tona, na minkila ya tona yi hi lomu xikari.

⁵A kudziva ka gona ku wa hi canja ginwe; a nomu wa gona wu wa fanana ni wa kopo, na gi hi ni xiwumbeko xo fanana ni xitsangi xa khonʼwa. A wunzeni ga gona gi wa ringana 3,000 wa tikarafawu.

⁶I lo maha kambe a 10 wa zinamelo, a veka a ntlhanu wa zona hi tlhelo ga xinene, ni ntlhanu wa zona hi tlhelo ga xibhabha, kasi ku hlazela kona zontlhe zilo za miphahlo ya kuhiswa. A bimbi gi wa hi wuhlambelo ga vapristi. [9]

⁷I lo maha a 10 wa timeza ta tikandiya ta nzalama hi nayo wa tona, a ti veka lomu tempeleni, a ntlhanu wa tona hi tlhelo ga xinene, a tinwani ta ntlhanu hi tlhelo ga xibhabha.

⁸I lo maha kambe a 10 wa timeza a ti veka lomu tempeleni; ntlhanu wa tona hi le xineneni, a tinwani ta ntlhanu hi le xibhabheni. A maha kambe ni 100 wa mingelo ya nzalama.

⁹Ni kambe i lo maha a hubye ga vapristi, ni hubye ga hombe, ni tivati ta kona a ti nameketela suku.

¹⁰A bimbi i lo gi veka hi tlhelo ga xinene ga yindlu hi le Muhuma-gambo gi cuwuka le Dzongeni.

¹¹Huramu i lo maha timbita, ni mafoxolo ni zinamelo. Zinghaho Huramu i lo mbheta a ntiro lowu a nga wu mahela hosi Solomoni lomu ndlwini ya Nungungulu:

¹²a timhanze timbiri ni tihloko ta tona ta zirenzelekwani; a mitiro mimbiri yo lukiwa kasi ku fenengeta tihloko leto ta timhanze;

¹³ni 400 wa mapomegranada ya mitiro leyo yimbiri yo lukiwa; a munwe ni munwani wu ni tixaxa timbiri ta mapomegranada, na wu hi zo fenengeta a tihloko leto timbiri ta zirenzelekwani ti nga wa hi hehla ka timhanze.

¹⁴I lo maha kambe ni zikhatelo, ni zinamelo hehla ka zona,

¹⁵ni bimbi ginwe, ni 12 wa tikavi lahasi ka gona.

¹⁶Huramu-Abi i lo maha timbita, ni mafoxolo, ni mafoloko, ni zontlhe zibya za kona, a zi mahela hosi Solomoni; i lo zi maha hi suku wo ngangamela, a kuva zi hi za yindlu ya Jehova.

¹⁷A hosi yi lo rumisa a kuva zi ya wumbelwa le livaleni la Jordani, misaveni ya wumba, xikari ka Sukote na Zereda.

¹⁸Zinghaho Solomoni i lo maha a zibya zo tala nguvu, kasi a kutika ka suku ku wa nga tibyiwi.

¹⁹Solomoni i lo maha zontlhe zibya za yindlu ya Nungungulu, ni alati ga kona, ni timeza to veka ka tona a zibaba;

²⁰ni timeza ta tikandiya ta nzalama yo saseka, ni tikandiya ta kona, leti ti nga wa lumekiwa hi nayo wa kona mahlweni ka wutshamu ga kubasabasa.

²¹Ni zitsangi, ni tikandiya, ni tizora ta tikandiya, zi wa hi za nzalama yo saseka nguvu;

²²ni zitimo, ni zinamelo, ni mikombe, ni timbita ta nzilo, zi wa hi za nzalama yo saseka. Kasi kambe a nyangwa ya yindlu, ni tivati ta kona ta lomu nzeni, le nyangweni ya wutshamu ga kubasabasa, ni tivati ta yindlu le nyangweni ya tempeli, zi wa hi za nzalama.