Read tshwa 2 Kronekele 5 Bible Online

2 Kronekele 5 - tshwa bible

2 Kronekele 5

¹Zinghaho laha Solomoni a nga wa mbhetile a ntiro wontihe lowu a nga wu mahela a yindlu ya Jehova, i lo neha a zilo lezi a dadani wakwe Davida a nga wa zi nyikele: a siliva, ni nzalama, ni zontlhe zibya, a ya zi veka lomu ka tshomba ya yindlu ya Nungungulu.

²Zonake Solomoni i lo tsombanyisa a masingalakati ya ka Israeli, ni tihosana tontlhe ta tiyindlu ta va ka Israeli le Jerusalema, a kuva va ya teka a arke ga xivumelwano xa Jehova le mutini wa Davida le Zioni, va gi neha.

³Vontlhe vanhu va ka Israeli va lo tsombana ka hosi le mubuzweni, hi hweti ya wuntlhanu ni timbiri.

⁴Wontihe masingalakati ya ka Israeli ma lota, ni va ka Levi va lo rwala a arke.

⁵Va lo kanziha va gi neha ni tenda ga mutlhangano, ni zontlhe zibya lezi zi nga wa nyikelwe, zi nga wa hi lomu ka tabemakeli, zi lo rwaliwa hi vapristi ni va ka Levi.

⁶Hosi Solomoni zinwe ni tlhangano wontihe wa ka Israeli wu nga wa tsombene kakwe, va lo yima mahlweni ka arke, va maha miphahlo ya tiyivu ni ya tihomu ta tsanza-vahlayi.

⁷A vapristi va lo enghenisa a arke ga xivumelwano xa Jehova lomu wutshanwini ga gona ga kubasa lomu ndlwini wutshanwini ga kubasabasa, va gi veka lahasi ka tipapa ta makerubima.

⁸Hakuva a makerubima ma wa tshambulutile a tipapa ta wona laha ka wutshamu ga arke, ma fenengeta a arke ni mipingo ya kona.

⁹A mipingo yi wa lehile laha ka kuva yi woneka a tichoka ta yona le mahlweni ka arke ni le mahlweni ka wutshamu ga kubasabasa; kanilezi le handle yi wa nga woneki. A arke gi tshamile laho kala lezi.

¹⁰Lomu nzeni ka arke ku wa nga hi na nchumu, saseka maribye mambiri lawa Mosi a nga ma veka na va ha hi le Horeba, a xikhati lexo Jehova a nga maha xivumelwano zinwe ni va ka Israeli, kuhumeni kabye hi le Gipite.

¹¹Ni laha vapristi va nga wa humile hi lomu wutshanwini ga kubasabasa (hakuva vontlhe vapristi lavo va nga wa hi kona va wa ti basisile, va wa nga lanzelangi a nayo wa mitlawa;

¹²ni vayimbeleli vontlhe va ka Levi, Asafa, na Hemani, na Jedutuni, ni vana vabye, ni vanakulobye, va wa yimile hi le Muhuma-gambo wa alati, na va ambele a tinguwo ta wukene, na va hi ni tingoma ni timbila ni zitende, na va hi ni 120 wa vapristi laha kusuhani lava va bako mipunzu).

¹³A vabi va mipunzu ni vayimbeleli va lo yimbelela khatiginwe, hi gezu ginwe a ku dumisa ni ku bonga Jehova. Laha va nga waba mipunzu ni tingoma, ni tinwani timbila, na va kari va yimbelela vaku: Dumisani Jehova hakuva i lulamile, hakuva a wuxinji gakwe gi simamisile kala kupinzuka! a yindlu ya Jehova yi lo tatiswa hi refu,

¹⁴laha kaku a vapristi va tsanzeka ku yima lomo, va maha a ntiro wa kukhozela hi kota ya refu, hakuva a kungangamela ka Jehova ku wa tatile a yindlu ya Nungungulu.