Read tshwa 2 Kronekele 6 Bible Online

2 Kronekele 6 - tshwa bible

2 Kronekele 6

¹Zonake Solomoni i te ngalo: Jehova i wula lezaku i ranza ku tshama lomu munyameni!

²Kanilezi mina nzi akile a yindlu laha u ta nga tshama kona, ni wutshamu legi u ta nga aka ka gona kala kupinzuka.

³Zonake a hosi yi lo hunzuluka yi katekisa a tlhangano wontihe wa ka Israeli. A tlhangano wontihe wa ka Israeli wu lo yima.

⁴Yena aku ngalo: A ku dumiswe Jehova Nungungulu wa ka Israeli, loyi a nga wulawula hi nomu wakwe ka dadani Davida, a tlhela a tatisa hi canja gakwe lezi a zi wulileko, aku:

⁵Kusukela siku lego nzi nga humesa a vanhu va mina le tikweni ga le Gipite, cima a nzi hlawulangi a muti lomu xikari ka tinyangwa ta ka Israeli a kuva ku akiwa kona a yindlu kasi ku tshama lomo a vito ga mina, ni kambe cima a nzi hlawulangi munhu a kuva hosi ya vanhu va mina, a va ka Israeli. [10]

⁶Kanilezi makunu nzi hlawule a Jerusalema lezaku kasi a vito ga mina gi fela ku tshama lomo, nzi hlawula Davida a kuva a fuma hehla ka vanhu va mina, a va ka Israeli.

⁷A dadani wa mina Davida i wa xuvile ku aka a yindlu yi lumbako a vito ga Jehova, Nungungulu wa ka Israeli;

⁸kanilezi Jehova i te ngalo ka dadani wa mina Davida: Khwatsi hi lezi u xuvako ku aka a yindlu yi lumbako a vito ga mina, u mahile khwatsi hi mixuvo ya wena.

⁹Kanilezi a hi wena u ta nga aka a yindlu leyo, hi nʼwana wa wena loyi a humileko hi lomu xiwunwini xa wena, a ta nga aka a yindlu yi lumbako a vito ga mina.

¹⁰Jehova i tatisile a gezu gakwe legi a gi wulileko. Mina nzi tshamile xikhundleni xa dadani wa mina Davida, nzi tshamile xitshanwini xa wuhosi xa ka Israeli, khwatsi hi lezi Jehova a tsumbisileko; mina nzi akile a yindlu yi lumbako a vito ga Jehova Nungungulu wa ka Israeli.

¹¹Nzi vekile lomo arke legi gi nga ni xivumelwano xa Jehova, lexi a xi mahileko zinwe ni va ka Israeli.

¹²I lo yima mahlweni ka alati ga Jehova a mahlweni ka wontihe tlhangano wa ka Israeli, a nawuluta a mandla yakwe;

¹³hakuva Solomoni i wa mahile a wutshamu go yima ka gona hi suku lomu xikari ka hubye. A kuleha ka gona gi wa hi ntlhanu wa mikono, ni kuanama ka gona gi wa hi ntlhanu wa mikono, a kutlakuka ka gona gi wa hi mikono minharu. I lo kanziha ka gona; a khizama hi madzolo yakwe mahlweni ka tlhangano wontihe wa ka Israeli, a tlakusa a mandla yakwe,

¹⁴aku: Jehova Nungungulu wa ka Israeli, cima a ku na Nungungulu a fananako na wena, le tilweni ni laha misaveni; wena loyi u hlayisako a xivumelwano xa wena ni ku va mahela wuxinji a malanza ya wena lawa ma fambako mahlweni ka wena hi timbilu ta wona tontlhe; [11]

¹⁵hakuva lezi u zi tsumbisileko ka dadani wa mina, a nanza ga wena Davida, u zi mahile; u wulawulile hi nomu wa wena, zonake u zi tatisa hi canja ga wena nyamutlha.

¹⁶Jehova Nungungulu wa ka Israeli makunu maha ka dadani wa mina, a nanza ga wena Davida, lezi u mu tsumbisileko zona, uku: Cima ku nga ta vumaleka ni siku ginwe mahlweni ka mina a munhu loyi a ta nga tshama xitshanwini xa wuhosi xa ka Israeli, loku a vana va wena hakunene va hlayisa tindlela tabye, va famba hi milayo ya mina khwatsi hi lezi u fambisileko zona wena mahlweni ka mina.

¹⁷Jehova Nungungulu wa ka Israeli, ngha gezu ga wena, legi u gi wulileko ka nanza ga wena Davida, gi tatiseka makunu!

¹⁸Kona Nungungulu hakunene a nga aka ni vanhu laha misaveni ke? Languta, a tilo, ni tilo ga matilo a ma ku ringani; ku ta kuyini ka yindlwana levi nzi yi akileko ke? [12]

¹⁹Jehova Nungungulu wa mina, amukela a mukhongelo wa nanza ga wena, ni kukombela kakwe, u ingisa a kurila ni kukhongela loku a nanza ga wena a ku humesako mahlweni ka wena,

²⁰lezaku a mahlo ya wena ma vululeka, ma wona wusiku ni mumu, ma cuwuka a yindlu leyi ni wutshamu legi u nga wula uku u ta veka a vito ga wena ka gona; ni lezaku u ingisa a mikhongelo leyi a nanza ga wena gi ta nga kombela ka legi wutshamu. [13]

²¹Zwana a mikhongelo ya nanza ga wena ni ya vanhu va wena, a va ka Israeli, loku va khongela na va hi ka legi wutshamu; ingisa na u hi kwaleyo tilweni, wutshanwini lego u akileko ka gona: ingisa, u tsetselela!

²²Loku a munhu a onhela nakulobye, zonake va mu hlambanyisa mahlweni ka alati ga wena ndlwini leyi,

²³zonake wena u zizwa na u hi kwa: leyo tilweni, u zi maha, u lamula a malanza ya wena; u kombisa loyi a nga ni nanzu, u mu tlhelisela mitiro yakwe hlokweni yakwe, kanilezi u khanisa loyi a lulamileko, u mu tlhelisela hi kululama kakwe!

²⁴Ni loku a vanhu va wena, a va ka Israeli, va hluliwa hi valala vabye, hi kota ya kuva va onhile ka wena loku vona va hunzuluka va tlhelela ka wena, va dumisa a vito ga wena, va maha mikhongelo, va kombela mahlweni ka wena ndlwini leyi,

²⁵zonake wena zwana na u hi kwaleyo tilweni, u tsetselela a zionho za vanhu va wena, a va ka Israeli, u va tlhelisa va wuya lomu tikweni legi u va nyikileko gona zinwe ni vadadani vabye!

²⁶Loku a tilo gi valilwe, yi ngani vula, hi kota ya kuva va ku onhele, loku vona va khongela ka legi wutshamu, va dumisa a vito ga wena, va tsika a zionho zabye lezi u nga wa va tsayisa ha zona;

²⁷zonake wena zwana na u hi kwaleyo tilweni, u tsetselela a malanza ya wena, a vanhu va wena va ka Israeli, a zionho zabye, na u va gonzisa a ndlela yo saseka leyi va faneleko ku famba ha yona; zonake rumela a vula lomu tikweni legi wena u va nyikileko a kuva tshomba yabye.

²⁸Loku ku hi ni ndlala lomu tikweni, ni mitungu, ni mumu, ni kubola ka mavele, ni humbi ya tixaka ti hambeneko; ni loku a valala va hlasela a vanhu va wena, lomu mitini yabye, ni loku ku hi ni makhombo ni mababyi ya tixaka ti tsalangeneko;

²⁹ni loku a munhu, kutani a vanhu va wena vontlhe, a va ka Israeli, va khongela, a munwe ni munwani na a ti wula a mbanga yakwe ni hlomulo wakwe, na va kari va tlakusa a mandla yabye ngomama ni yindlu leyi,

³⁰zwana wena na u hi kwaleyo tilweni, laho u akileko kona, u tsetselela, u nyika ka munwe ni munwani a ka mixuvo yakwe yontlhe, wena loyi u tivako a mbilu ya munhu ni munhu, hakuva hi wena wece u tivako a timbilu ta vana va vanhu, [14]

³¹kasi vona va fela ku ku chava, va famba hi tindlela ta wena masikwini wontihe lawa va ta nga hanya lomu tikweni legi u gi nyikileko ka vararu va hina!

³²Tlhatakumbiri, xungetano ni wamatiko, loyi a nga hiko wa ka Israeli, na a sukela tikweni ga le kule hi kota ya vito ga wena ga hombe, hi kota ya canja ga wena ga ntamu, ni woko ga wena gi nawulutilweko, loku yena a khongela na cuwukile ngomama ni yindlu leyi,

³³zonake ingisa wena na u hi kwaleyo tilweni, laho u akileko kona, u maha zontlhe lezi a wamatiko a zi kombelako ka wena; kasi a vanhu vontlhe va misava va fela ku zi tiva lezaku a vito ga wena gi khongeliwa lomu ndlwini leyi nzi yi akileko, va ku chava kukotisa tiko ga wena ga Israeli.

³⁴Ni loku a vanhu va hloma a yimpi a ku yalwa ni valala vabye, va famba hi ndlela leyi u ta nga va kombisa, zonake loku vona va khongela na va cuwukile tlhelo ga muti lowu wena u wu hlawuleko, ngomama ni yindlu leyi nzi yi akileko a kuva yi lumba a vito ga wena,

³⁵zonake ingisa wena na u hi kwaleyo tilweni a mukhongelo wabye ni mukombelo wabye, u va hlanguta zikaratweni zabye.

³⁶Ni loku va ku onhela, (hakuva a nga kona munhu a nga onhiko,) zonake u va zangarela, u va nyikela ka valala vabye, a valala vabye va va khoma va va yisa wukhumbini tikweni ga le kule, kutani ga laha kusuhani; [15]

³⁷loku vona va ti alakanya na va hi kwaleyo tikweni ga wukhumbi gabye, va tlhelela ka wena, va khongela na va hi kwaleyo tikweni lego, vaku: Hi onhile, hi mahile lezi zi bihileko, hi gohile;

³⁸loku va tlhelela ka wena hi timbilu tabye tontlhe, ni mihefemulo yabye yontlhe, na va hi kwaleyo tikweni ga wukhumbi gabye; loku va khongela na va cuwukile a tlhelo ga tiko legi u nyikileko vararu vabye, ni muti lowu u wu hlawuleko, ni tlhelo ga yindlu leyi nzi yi akeleko vito ga wena,

³⁹zwana wena na u hi kwaleyo tilweni, laho u akileko kona, u ingisa mikhongelo yabye, u va yimela timhakeni tabye, u tsetselela a vanhu va wena lava va ku onheleko.

⁴⁰Nungungulu wa mina, ngha a mahlo ya wena makunu ma vululeka, u ingisa hi tindleve ta wena a mukhongelo lowu nzi wu mahako ka legi wutshamu!

⁴¹Makunu Jehova Nungungulu, Suka uta laha wutshanwini ga wena ga kuhumula, wena ni arke ga ntamu wa wena! Jehova Nungungulu, ngha vapristi va wena va fenengetiwa hi kuhanyiswa, ni lava va ku ranzako ngha va tsakela a wunene ga wena. [16]

⁴²Jehova Nungungulu, u nga hoxi a totilweko wa wena; alakanya a wuxinji legi u gi mahileko ka nanza ga wena Davida!