Read tshwa 2 Kronekele 7 Bible Online

2 Kronekele 7 - tshwa bible

2 Kronekele 7

¹Laha Solomoni a nga wa gumesile ku khongela, ku lo relela a nzilo hi le tilweni wu ta pswhumula a muphahlo wa kuhiswa, zonake a kungangamela ka Jehova ku lo tata a yindlu. [17]

²A vapristi va lo tsanzeka ku enghena lomu ndlwini ya Jehova, hakuva a kungangamela kakwe ku wa tatile a yindlu ya Jehova.

³Laha vontlhe va ka Israeli va nga wa wonile a nzilo ni kungangamela ka Jehova, na zi relela lomu ndlwini, va lo korama lahasi liranzabyeni, va khizama va dumisa Jehova, vaku: Hakuva yena i lulamile, hakuva a wuxinji gakwe ga kala kupinzuka.

⁴Zonake a hosi ni vanhu vontlhe va lo nyikela miphahlelo mahlweni ka Jehova.

⁵Hosi Solomoni i lo nyikela muphahlelo wa 22,000 wa tihomu, ni 120,000 wa tiyivu. Zinghaho a hosi ni vanhu vontlhe va lo nyikelisisa a yindlu ya Nungungulu.

⁶A vapristi va lo yima matshanwini yabye yo tira mitiro yabye zinwe ni va ka Levi, na va angarele a timbila ti longiselweko Jehova, leti hosi Davida a nga wa ti mahele ku dumisa Jehova ha tona, vaku: Hakuva a wuxinji gakwe ga kala kupinzuka; laha Davida a nga wa dumisa ha tona Jehova. A vapristi va loba mipunzu na va cuwukene navo, vontlhe va ka Israeli na va yimile,

⁷Solomoni i lo basisa a wutshamu ga lomu xikari ka hubye ga le mahlweni ka yindlu ya Jehova, kasi a fela ku nyikela kona a munyikelo wa kuhiswa ni mafura ya miphahlo ya kurula, hakuva a alati ga suku legi Solomoni a nga wa gi mahile gi wa nga eneli a munyikelo wa kuhiswa ni wa mafura.

⁸Xikhatini xwalexo Solomoni i lo maha mubuzo ntlhanu wa masiku ni mambiri, zinwe ni vontlhe va ka Israeli; xi wa hi xidlemo xa hombe nguvu xi nga wa tsombene kusukela le nyangweni ya le Hamate kala le xicongwaneni xa Gipite.

⁹Hi siku ga wu 8 va lo maha mutlhangano wo Basa, hakuva va hetile 7 wa masiku na va nyikelisisa a alati; zonake va lo maha a mubuzo wa 7 wa masiku.

¹⁰Hi siku ga 23 ga hweti ya wu 7 Solomoni i lo hangalasa vanhu va ti yela matendeni yabye na timbilu tabye ti tsakile, hakuva Jehova i katekisile Davida na Solomoni ni va ka Israeli, a vanhu vakwe.

¹¹Zinghaho Solomoni i lo mbheta a yindlu ya Jehova ni yindlu yakwe ya wuhosi, a mbhetisela zontlhe lezi a nga wa xuvile ku zi maha lomu ndlwini ya Jehova ni lomu ndlwini yakwe.

¹²Zonake Jehova i lo woneka ka Solomoni ni wusiku, aku kakwe: Nzi zwile mukhongelo wa wena; nzi hlawule wutshamu legi a kuva ga yindlu ya miphahlelo. [18]

¹³Loku nzi vala a tilo yi ngani vula, ni loku nzi rumela humbi a ku ta mbheta masimu ya nwina, ni loku nzi rumela mitungu ka vanhu va mina;

¹⁴loku a vanhu va mina lava va khongelako hi vito ga mina va ti sola, ni loku va khongela hi ku hlota a vito ga mina, va fularela a tindlela tabye to biha, mina nzi ta vazwa na nzi hi tilweni, nzi va tsetselela zionho zabye, nzi holisa a tiko gabye.

¹⁵Makunu a mahlo ya mina ma ta cuwuka, ni tindleve ta mina ti ta ingisa a mikhongelo ya legi wutshamu;

¹⁶hakuva makunu nzi hlawule yindlu leyi nzi yi basisa, kasi a vito ga mina gi fela ku tshama kona kala kupinzuka, ni lezaku kasi a mahlo ya mina ni mbilu ya mina zi tava kona laha kala kupinzuka.

¹⁷Wenawu, loku u famba mahlweni ka mina khwatsi hi lezi dadani wa wena Davida a fambisileko zona, u maha zontlhe lezi nzi ku leleteleko zona, ni loku wena u hlayisa milayo ya mina ni zileletelo za mina,

¹⁸zonake mina nzi ta tiyisa a xitshamu xa wena xa wuhosi, khwatsi hi xivumelwano xa mina ni raru wa wena Davida, xaku: Cima ku nga ta vumaleka a wanuna wa pswalo wa wena wa kuva a fumela va ka Israeli.

¹⁹Kanilezi loku mu hunzuluka mu fularela a zileletelo ni milayo ya mina, leyi nzi yi vekileko mahlweni ka nwina, mu ya khozela vanwani vanungungulu mu khizama mahlweni ka vona,

²⁰nzi ta mu tsuwula lomu tikweni ga mina legi nzi nga wa mu nyikile gona, ni yindlu leyi nzi yi basisileko a kuva yi lumba a vito ga mina nzi ta yi hoxa kule, nzi yi maha yi chepetwa ni kuva xihlekiso ka vanhu vontlhe.

²¹Yona yindlu leyi tlakukileko kota lezi, ni wihi loyi a ta nga hunza hi laha kusuhani ka yona i ta hlamala, aku: Hi yini Jehova a maha lezi ka vanhu lava ni ka yindlu leyi ke? [19]

²²Va ta hlamula: Hi kota ya lezi va tsikileko Jehova Nungungulu wa vadadani vabye, loyi a va humesileko tikweni ga Gipite, va ya namarela ka vanwani vanungungulu va va khizamela va va khozela; hikwalaho yena i rumele hehla kabye a zikarato zontlhe lezi.