Read tshwa 2 Kronekele 8 Bible Online

2 Kronekele 8 - tshwa bible

2 Kronekele 8

¹Makunu anzhako ka 20 wa malembe na Solomoni a akile yindlu ya Jehova ni yindlu yakwe wutsumbu,

²Solomoni i lo aka a miti leyi a nga wa nyikilwe hi Huramu, a akisa va ka Israeli lomo.

³Solomoni i lo ya hlasela le Hamate-Zoba, a va khozisa.

⁴Zonake i lo aka Tadmora le xiwuleni, ni yontlhe miti ya titshomba leyi a akileko tikweni ga le Hamate.

⁵Ni kambe i lo aka a Bete-Horoni wa le hehla ni Bete-Horoni wa le hasi, a miti yi bhiyilweko hi makhurisi, ni makhokhola, ya tivati ti nga ni zikwinyaro,

⁶ni Baalate ni miti yontlhe ya titshomba, leyi a nga wa hi nayo, ni yontlhe miti ya tikareta, ni miti ya vakhileli va mahaxi, ni zontlhe lezi Solomoni a nga wa xuvile ku zi aka le Jerusalema, ni le Lebanoni, ni tiko gontlhe ga mufumo wakwe.

⁷A vanhu vontlhe lava va nga wa hi misalela ya vaHiti, ni maAmori, ni vaPerezi, ni vaHivi, ni vajebusi, lava va nga hiko va ka Israeli,

⁸a zizukulwana zabye lezi zi nga wa sele lomu tikweni anzhako kabye, hakuva a va ka Israeli a va va lovisangi, Solomoni i lo va tsombanyisa a va maha vaxibhalu kala lezi.

⁹Kanilezi a va ka Israeli Solomoni a nga va mahangi tikhumbi to maha mitiro ya mikhinyavezo, hakuva va wa hi vavanuna va yimpi, ni tinduna takwe, ni tinduna ta tikareta ta kulwa, ni ta vakhileli va mahaxi.

¹⁰Lowu hi tsengo wa tinduna ta vahlayisi lava va yimisilweko hi hosi Solomoni; lava va nga yimisilwe ku hlayisa vanhu va wa hi 250.

¹¹Solomoni i lo heleketa nʼwana Faro le ndlwini yakwe leyi a nga wa mu akele, a huma lomu mutini wa Davida hakuva yena i te ngalo: A sati wa mina a nga zi koti ku tshama lomu ndlwini ya Davida, a hosi ya ka Israeli, hakuva a matshamu lawa matshamu yo basa, lawa ku enghenileko a arke ga Jehova.

¹²Zonake Solomoni lo maha a munyikelo wa kuhiswa laha alatini ga Jehova, legi a nga wa gi akile mahlweni ka nyangwa,

¹³a nyikela miphahlelo ya siku ni siku khwatsi hi lezi Mosi a leleteleko, ya masabado, ni ya kusangula ka hweti, ni ya mibuzo, makhati manharu hi lembe, ni mibuzo ya zibaba zi nga comelwangiko, ni mibuzo ya tisonto, ni mibuzo ya matabernakeli. [20]

¹⁴Kota kuleletela ka raru wakwe Davida i lo yimisa a mitlawa ya vapristi mitirweni yabye, ni vaLevi mitirweni yabye, a ku dumisa Jehova ni ku maha mitiro yabye mahlweni ka vapristi siku ni siku; i lo yimisa ni vahlayisi va tinyangwa hi mitlawa yabye, ka nyangwa yinwe ni yinwani, hakuva Davida a munhu wa Nungungulu i lo leletela zalezo.

¹⁵A va mahangi lezi zi hambeneko ni kuleletela ka hosi xungetano ni vapristi, ni vaLevi, ni titshomba.

¹⁶Zinghaho wontihe a ntiro wa Solomoni wu wa longisilwe kusukela kusanguleni ka ku akwa ka yindlu ya Jehova kala a siku lego yi nga mbhetiswa ha gona; a yindlu ya Jehova yi lo mbhelisa lezo.

¹⁷Zonake Solomoni i loya le Ezioni-Gebera ni le Elote, le fungwini wa bimbi, a tikweni ga le Edomi.

¹⁸Huramu i lo mu rumela mataro hi malanza yakwe, ni malanza lawa ma tivako khwatsi hi bimbi; va loya Ofira zinwe ni malanza ya Solomoni va ya teka 450 wa titalenta ta nzalama, va ti neha ka hosi Solomoni.