Read tshwa Ezra 3 Bible Online

Ezra 3 - tshwa bible

Ezra 3

¹Hi siku yi nga woneka a hweti ya wu 7, a va ka Israeli lava va nga wa hi lomu mitini yabye, va lo tsombana le Jerusalema, kukotisa loku va hi munhu munwe. [5]

²Ku lo suka Jexua nʼwana Jozadake ni vanakulobye, a vapristi, na Zerubabeli nʼwana Xealtieli, ni vanakulobye, va yima va aka a alati ga Nungungulu wa ka Israeli, kasi va fela ku tlhavela laho a miphahlo ya kuhiswa, khwatsi hi lezi ku tsalilweko nayweni wa Mosi a munhu wa Nungungulu. [6]

³Va lo yimisa a alati laha wutshanwini ga gona, hakuva va wa chava a vanhu va matiko lawa ma nga wa va renzelekele; va lo nyikela miphahlo ya kuhiswa ka Jehova, va nga wa yi hisa mixo ni gambo.

⁴Va lo maha ni mubuzo wa mixaxa, khwatsi hi lezi ku tsalilweko, ni ku nyikela a minyikelo ya kuhiswa ya siku ni siku hi mamahela ya kona ni nayo wa kona wa fanelo wa siku ni siku. [7]

⁵Ni kambe ku lo nyikelwa a munyikelo wa kuhiswa wa masiku, ni wa kuwoneka ka hweti, ni wa mitlhangano yontlhe yi basileko ya Jehova, ni wa munhu ni munhu loyi a ranzako ku phahlela ka Jehova hi matsenya.

⁶Hi siku go ranga ga hweti ya wu 7, va lo sangula ku nyikela ka Jehova a muphahlelo wa kuhiswa; kanilezi a xiseketelo xa yindlu ya Jehova xi wa nga se ku akiwa.

⁷Va lo nyikela a mali ka vavatli va maribye ni timhanze, va nyikela a zakuga ni zakunwa, ni mafura ka vaSidoni ni va le Tire, kasi vona va fela ku va nehela a tisinya ta sedare hi le Lebanoni, tita le Jopa hi bimbi, khwatsi hi lezi va nga wa vumelwe hi Kurusi a hosi ya le Persia.

⁸Makunu hi lembe ga wumbiri ga kuwuya kabye lomu ndlwini ya Jehova le Jerusalema, lomu ka hweti ya wumbiri, Zerubabeli nʼwana Xealtieli, na Jexua nʼwana Jozadake, ni vanakulobye lava va nga wa hi vapristi, ni va ka Levi, ni vontlhe lava va nga tlhelela Jerusalema na va huma hi le kukhonweni, va lo sangula ku tira; ku lo yimiswa vaLevi kusukela ka va 20 wa malembe kuya mahlweni, kasi ku fambisa a ntiro wa yindlu ya Jehova.

⁹Zonake ku lo suka Jexua ni vana vakwe, ni vanakulobye, na Kadmieli, ni vana vakwe, a vanana va ka Juda, va yima khatiginwe va fambisa mitiro ya yindlu ya Nungungulu, zinwe ni vana va ka Henadade, ni vana vabye ni vanakulobye, va ka Levi.

¹⁰Laha a vaaki va nga sangula ku aka a xiseketelo xa tempeli ya Jehova, a vapristi va lo yima laho na va ambele tinguwo tabye na va welele mipunzu, zinwe ni vaLevi, ni vana va Asafa, na va hi ni tingomana, va dumisa Jehova, va lanzela a zileletelo za Davida a hosi ya ka Israeli. [8]

¹¹Zonake vontlhe va lo yimbelela, va dumisa, va bonga Jehova, vaku: Hakunene, i nene, hakuva a kuranza ka wunene gakwe ka Israeli ku simamile kala kupinzuka. A vanhu vontlhe va lo kanyuluka va maha guwa ga hombe hi ku dumisa Jehova, hakuva ku wa akilwe a xiseketelo xa yindlu ya Jehova.

¹²Kanilezi a vapristi vanyingi ni vaLevi, ni tihosana ta tiyindlu ta vadadani: a zikhosana lezi zi nga wonile a yindlu ya kale, laha va nga wona a xiseketelo xa yona, va lo rila va xilila mihloti hi ku wona a yindlu leyo; kanilezi a talo wa vanwani va lo kanyuluka hi kutsaka.

¹³Zinghaho ku wa nga hi kona munhu a nga wa zi kota ku hambanyisa a guwa ga kutsaka ni ga kurila ka vanhu; hakuva va wa maha a guwa ga hombe gi nga wa zwala kule.