Read tshwa Ezra 4 Bible Online

Ezra 4 - tshwa bible

Ezra 4

¹Makunu laha a valala va ka Juda ni va ka Benjamini va ngazwa lezaku a vanana va tikhumbi va aketa a tempeli ya Jehova Nungungulu wa ka Israeli,

²va lota ka Zerubabeli ni ka tihosana ta tiyindlu ta vadadani vabye, va taku: A hi akeni zinwe na nwina, hakuva hinawu ha hlota Nungungulu wa nwina, kota lezi mu mahako, hinawu ha nyikela miphahlelo kusukela a siku lego Esar-Hadoni a hosi ya Asiria a hi nehileko leno. [9]

³Kanilezi Zerubabeli, na Jexua, ni tinwani tihosana ta vadadani va ka Israeli, va te ngalo kabye: Nwina a mu zi koti ku aka zinwe na hina a yindlu ya Jehova Nungungulu wa hina; hi hina hoce hi ta nga aka a yindlu ya Jehova Nungungulu wa ka Israeli, khwatsi hi lezi ku leletelweko hi Kurusi a hosi ya le Persia.

⁴Zonake a vanhu va tiko va lo sangula ku mbheta a ntamu wa ya ka Juda, va va karata kuakeni kabye;

⁵va lo xavelela a masingalakati lezaku va juwungela kuxuva kabye, va maha lezo wontihe masiku ya kuhanya ka Kurusi a hosi ya le Persia, kala masikwini ya kufuma ka Dariusi a hosi ya le Persia.

⁶A xikhatini xa hosi Ahasuerusi, kusanguleni ka kufuma kakwe, va lo tsala a papilo go hleva vaaki va vaJuda ni va Jerusalema.

⁷Kanilezi xikhatini xa Artaxerxesi, Bishlamu na Mitredate na Tabeeli ni vanwani vanakulobye, va lo tsalela Artaxerxesi a hosi ya le Persia a papilo hi maletela ya xiAsiria gi tlhamuselwa hi xiAsiria.

⁸Zinghaho Rehuma a sungukati, na Ximxai a mutsali, va lo tsalela hosi a papilo va vukela Jerusalema, vaku:

⁹Rehuma a sungukati, na Ximxai a mutsali, ni vanwani vanakulobye, a va ka Dina, ni va ka Afarsate, ni va ka Tarpeli, ni vaAfarsi, ni vaArkevi, ni vaBabuloni, ni vaXuxani, ni vaDeha, ni vaElami,

¹⁰ni vanwani varnatiko lava va luveleko lomu, va vekilweko hi Osnapera wa hombe, a dumileko, lomu mutini wa Samaria ni le tlhatuko wa congo.

¹¹Leti hi timhaka ta papilo legi va gi rumelako ka yena, hosi Artaxerxesi, vaku: Hina malanza ya wena, hi akileko tlhatukweni wa congo;

¹²a zi tiveke ka hosi lezaku a vaJuda lava va sukileko hi leyo ka wena, vata seno Jerusalema, va aka a muti lowu wa xikanya, wo biha, va lava ku mbheta a ligingisi; va akisile a xiseketelo xa kona.

¹³Hikwalaho a zi tiveke ka wena hosi lezaku, loku hakunene lowu muti wu vuxiwa, ni ligingisi la kona li mbhela, cima va nga ta ha khupa ge hambu ku luva ni ku humesa hlengo; zonake ku ta wonheka a xiwundlo xa tihosi.

¹⁴Hikwalaho khwatsi hi lezi hi lungako a zakuga za hina hi munyu wu humako ndlwini ya hosi, a hi xalaliswi a ku wona a hosi yi wonhekelwa hi zilo za yona. Hikwalaho ha rumela mhaka ka hosi a ku mu tivisa lezaku:

¹⁵A ku hlolisiswe lomu bhukwini ga zimaho za vadadani va wena, u ta kuma lezaku a muti lowu ngwa xikanya, wu vengako tihosi ni mifumo, ni lezaku ku kona kutialisa ka lowu muti kusukela xikhatini xa kaleloko, xi nga xona xigelo xa kulobyiswa ka wona.

¹⁶Hi ngalo ka hosi: Loku a muti lowu wu aketa a ligingisi la wona li mbhela, cima u nga ha ta kuva ni wutshamu seno tlhatuko wa congo.

¹⁷Zonake a hosi yi lo rumela a hlamulo ka Rehuma a sungukati, ni ka Ximxai a mutsali, ni ka vanakulobye va akileko Samaria, ni ka vanwani lava va nga tlhatuko wa congo: A kurula a kuve na nwina.

¹⁸A papilo legi mu nzi rumeleko gi gonzilwe khwatsi mahlweni ka mina.

¹⁹Nzi leletele a kuva ku hlotisiswa, hakunene ku kumilwe lezaku a muti lowu wu lo ti alisa ka tihosi, ku huma vilinganya ni maguwa ka wona.

²⁰Ni kambe Jerusalema i muti wu nga fumelwa hi tihosi ta tinhenha ti nga wa fumela matiko wontihe ya le tlhatuko wa congo, ti khupelwa, ni ku lubyiwa, ti humeselwa hlengo. [10]

²¹Makunu loku zi hi nghaho, byelani vanhu lavo va kaketa mitiro yabye ni lezaku wu nga akiwi muti lowo, kala nzi va byela.

²²Tlharihani, mu nga hoheti ka lezo, a mhango leyo yi nga kula yi maha xikarato.

²³Makunu laha a timhaka ta hosi Artaxerxesi ti nga wa gonzilwe mahlweni ka Rehuma, na Ximxai a mutsali, ni vanakulobye, va lo hatlisa vaya ka vaJuda le Jerusalema va ya va tsikisa hi ntamu ni wurena.

²⁴Zonake va lo kaketa a ntiro wa yindlu ya Nungungulu le Jerusalema; va lo tsika kala lembe ga wumbiri ga kufuma ka Dariusi a hosi ya le Persia.