Read tshwa Ezra 5 Bible Online

Ezra 5 - tshwa bible

Ezra 5

¹Makunu a xikhati lexi muprofeti Hagai na muprofeti Zakaria nʼwana Ido va wa profeta ka vaJuda va le Judia ni le Jerusalema; va lo profeta kabye hi vito ga Nungungulu wa ka Israeli. [11]

²Zonake ku lo suka Zerubabeli nʼwana Xealtieli, na Jexua nʼwana Jozadake, va engeta va sangulisa ku aka yindlu ya Nungungulu le Jerusalema, na va hi zinwe ni vaprofeti va Nungungulu va nga wa va vuna.

³Xwalexo xikhati ku lota kabye Tatenai a hosi ya tiko ga le tlhatuko wa congo, na Xetarbazenai ni vanakulobye, va taku kabye: Himani a nga mu byela ku aka yindlu leyi, ni ku mbhetisa a ligingisi leli?

⁴Zonake vona va lo va wutisa, vaku: Mbamani mavito ya vavanuna lava, va akileko a yindlu leyi?

⁵Kanilezi a tihlo ga Nungungulu wabye gi wa hi hehla ka masingalakati ya va ka Juda; va lo tsika ku va beletela kala a mhaka leyo yi yiswa ka Dariusi, na va ha rinzela a papilo ga hlamulo wa mhaka leyo.

⁶A timhaka ta papilo legi gi rumelweko ka hosi Dariusi hi Tatenai a hosi ya tiko ga le tlhatuko wa congo, na Xetarbozenai ni vanakulobye va Afarsate va le tlhatuko wa congo;

⁷va lo mu rumela a papilo ga ku mu tivisa timhaka leti: Ka hosi Dariusi, a kuve ni kurula kontlhe!

⁸Ha tivisa ka hosi lezaku hina hi wa yile tikweni ga vaJuda, le ndlwini ya Nungungulu wa hombe; ya akiwa hi maribye ya hombe ma vatlilweko; lomu khurisini ku gongonzelwa mapulango; a mitiro yiya mahlweni mandleni yabye.

⁹Zonake hi lo wutisa masingalakati ni ku wulawula navo hiku: Himani a nga mu byela ku aka yindlu leyi, ni ku aka ligingisi?

¹⁰Hi lo va wutisa mavito yabye kasi ku ta ku byela, hi tsala mavito ya vavanuna lava va rangelako mitiro.

¹¹Va lo hi hlamula, vaku: Hina hi malanza ya Nungungulu wa tilo ni misava; hi aketa a yindlu leyi yi nga wa akilwe kale ka matiko; leyi yi akilweko hi yinwani hosi ya hombe ya va ka Israeli, a yi mbhelelisa.

¹²Kanilezi laha a vararu va hina va nga zangarisa Nungungulu wa tilo i lo Va nyikela mandleni ya Nebukadnezare a muKaldea, a hosi ya le Babuloni. Hi yena a nga khungumula a yindlu leyi, a khoma vanhu a va yisa wukhumbini le Babuloni. [12]

¹³Kanilezi hi lembe go ranga ga kufuma ka Kurusi a hosi ya le Babuloni, hosi Kurusi i loba nyiwo lezaku a yindlu ya Nungungulu a yi aketwe!

¹⁴A nzalama ni siliva ya yindlu ya Nungungulu, leyi yi nga wa tekilwe lomu tempeleni ya Jerusalema hi Nebukadnezare a famba nayo, a ya yi veka lomu tempeleni ya le Babuloni, i zi tlhelisile a zi hendleleta mandleni ya Xexbazare loyi a nga mu wumbela kuva hosi.

¹⁵Aku kakwe: Teka a zibya lezi u ya zi veka lomu tempeleni ya le Jerusalema; a yindlu ya Nungungulu a yi aketwe wutshanwini ga yona.

¹⁶Zonake Xexbazare loye i tile a ta vekela xiseketelo xa yindlu ya Nungungulu le Jerusalema; kusukela xikhatini xwalexo ya ha akiwa, a yi se nga mbhela.

¹⁷Makunu loku zi woneka na zi sasekile ka hosi, ngha ku hlotisiswa lomu ndlwini ya wukosi ya hosi ya le Babuloni, loku zi ngha zi wulilwe hi hosi Kurusi lezaku a yi akiwe a yindlu ya Nungungulu le Jerusalema; zonake a hosi yi ta hi tivisa kuxuva ka yona xungetano ni mhaka leyi.