Read tshwa Ezra 7 Bible Online

Ezra 7 - tshwa bible

Ezra 7

¹Anzhako ka lezo, hi xikhati xa kufuma ka Artaxerxesi a hosi ya le Persia, Ezra nʼwana Seraia wa Azaria wa Hilkia,

²nʼwana Xaluma wa Zadoke, wa Ahituba,

³nʼwana Amaria, wa Azaria, wa Meraiote,

⁴nʼwana Zerahia, wa Uzi, wa Buki,

⁵nʼwana Abixua, wa Fineasi, wa Eleazare, wa Aroni, a mupristi wa hombe,

⁶Ezra loyi i lo suka hi le Babuloni; i wa hi mutsali a tlharihileko milayweni ya Mosi leyi yi nyikilweko hi Jehova Nungungulu wa ka Israeli. A hosi yi lo mu nyika zontlhe lezi a nga zi kombela, hakuva a canja ga Jehova Nungungulu wakwe gi wa hi zinwe na yena.

⁷I lo kanziha zinwe ni vanwani va ka Israeli, a vapristi, ni vaLevi, ni vayimbeleli, ni vahlayisi va tinyangwa, ni malanza, va lo kanziha vaya Jerusalema naye, hi lembe ga wu 7 ga kufuma ka hosi Artaxerxesi.

⁸I lo chikela Jerusalema hi hweti ya wuntlhanu ya lembe ga wu 7 ga kufuma ka hosi.

⁹Hakuva yena i lo suka le Babuloni hi siku go ranga ga hweti yo sangula, zonake a chikela Jerusalema hi siku go ranga ga hweti ya wuntlhanu, khwatsi hi lezi a canja ga tipswalo ta Nungungulu gi nga hi zinwe na yena.

¹⁰Hakuva Ezra i wa nyikele mbilu yakwe ntirweni wa ku hlota a nayo wa Jehova, ni ku wu maha, ni ku gonzisa va ka Israeli a zileletelo ni nongameto.

¹¹Makunu leti hi timhaka ta papilo legi hosi Artaxerxesi a nyikileko Ezra, a mupristi ni mutsali, a nga gonzisa milayo wa Jehova, ni ziyimiso zakwe lezi a leleteleko va ka Israeli:

¹²Artaxerxesi, a hosi ya tihosi, a ka Ezra, a mupristi ni mutsali a mbheleleko wa nayo wa Nungungulu wa le hehla;

¹³mina nza leletela lezaku vontlhe vanhu va ka Israeli lava va nga lomu ka mufumo wa mina, ni vapristi vabye, ni vaLevi, lava va ranzako ku tlhelela Jerusalema na wena, kota kuranza kabye, a va fambe.

¹⁴Hakuva wena u rumiwa hi hosi zinwe ni tinduna ta yona ta 7 ta hubye, a ku ya hlola Judia ni Jerusalema, khwatsi hi lezi ku wulilweko milayweni ya Nungungulu wa wena, leyi u yi khomileko mandleni ya wena. [15]

¹⁵U ta famba ni siliva ni nzalama, lezi a hosi zinwe ni tinduna ta yona ta hubye, va zi nyikeleko hi kuranza kabye ka Nungungulu wa ka Israeli, loyi a wutshamu gakwe gi nga le Jerusalema.

¹⁶Ni siliva yontlhe ni nzalama leyi u ta nga yi kuma lomu tikweni gontlhe ga Babuloni, zinwe ni minyikelo leyi yi ta nga humeselwa a yindlu ya Nungungulu wabye le Jerusalema hi vanhu, ni vapristi, hi kuranza kabye.

¹⁷Kasi wena wa fela ku ya hatlisa u xava hi mali leyo a tikuzi, ni tihamba, ni tiyivana, ni minyikelo ya kona ya zakuga ni zakunwa, u zi nyikela laha alatini ga yindlu ya Nungungulu wa nwina le Jerusalema.

¹⁸Kasike a siliva ni nzalama leyi yi ta nga sala, wena ni vanakuloni mu ta tira ha yona lezi zi nga za kuranza ka Nungungulu wa nwina, khwatsi hi lezi mu ta nga zi wonisa zona.

¹⁹A zibya lezi u nyikilweko a kuva za ntiro wa yindlu wa Nungungulu wa wena u ta ya zi nyikela mahlweni ka Nungungulu wa le Jerusalema.

²⁰A zinwani lezi zi ta nga laveka lomu ndlwini ya Nungungulu wa wena, lezi u fanelako ku zi nyikela, u ta ya zi teka ndlwini ya titshomba ta hosi.

²¹Mina hosi Artaxerxesi, nzi leletela nwina nwentlhe mu nga le tlhatuko wa congo, nwina lava mu hlayisako a wukosi ga mina, lezaku mu hatlisa mu maha zontlhe lezi Ezra, mupristi ni mutsali wa milayo ya Nungungulu wa le tilweni, a ta nga zi kombela ka nwina.

²²Kukala ka 100 wa titalenta ta siliva, ni 100 wa tipimo ta mavele, ni 100 wa mapipa ya vinya, ni 100 wa mapipa ya mafura, ni munyu lowu wu va enelisako.

²³Zontlhe lezo zi leletelweko hi Nungungulu wa le tilweni a zi mahelwe a yindlu yakwe hi ku chela kota, kasi a nga zangareli a mufumo wa hosi ni vanana va yona.

²⁴Kambe hina ha mu tivisa lezaku a vapristi vontlhe, ni vaLevi, ni vayimbeleli, ni vahlayisi va tinyangwa, ni vaNetinime, ni malanza ya yindlu ya Nungungulu, va nga humesi a nzhuvo, hambu hlengo kutani khupo.

²⁵Wena Ezra, hi wutlhari ga Nungungulu wa wena legi u nga nago, yimisa a Valamuli, ni vahloti va ku lamula a vanhu vontlhe le tlhatuko wa congo, u yimisa vontlhe lava va tivako milayo ya Nungungulu wa wena; lava va nga yi tiviko mu Va gonzisa.

²⁶Kani himani a nga hlayisiko milayo ya Nungungulu wa wena, ni milayo ya hosi, a lamulwe hi kudawa, kutani ku hlongolwa, kutani ku giwa a tshomba yakwe, kutani ku hoxwa paxweni.

²⁷A ku bongiwe Jehova Nungungulu wa vadadani va hina, loyi a vekileko a timhaka ta ku nghahi mbilwini ya hosi, ta ku dzunza a yindlu ya Jehova le Jerusalema,

²⁸loyi a nzi mahileko nzi kuma tipswalo ka hosi, ni ka tinduna ta hubye gakwe, ni ka tihosana tontlhe ta tinhenha ta hosi! Mina nzi lo tiyiswa hlana, khwatsi hi lezi a canja ga Jehova Nungungulu wa mina gi nga hehla ka mina; nzi tsombanyisile a masingalakati ya va ka Israeli, lezaku va kanziha zinwe na mina.