Read tshwa Nehemia 11 Bible Online

Nehemia 11 - tshwa bible

Nehemia 11

¹A tihosana ta vanhu ti wa akile lomu Jerusalema. A vanhu na vonawu va lo hlahluva tihlolo kasi ku hlawula vanhu, munwe ka ntlawa wa khume, lava va ta nga ya aka le Jerusalema, a mutini wa kubasa, lava va 9 wa vona va aka le mitini yinwani.

²A tiko gi lo katekisa a vanhu lava va nga ti nyikela ha voce a kuva vaaki va lomu Jerusalema.

³Makunu leti hi tihosi ta matiko leti ti nga vumela ku ya aka le Jerusalema; na kasi lomu Juda munhu ni munhu i wa tshama wutshanwini gakwe, lomu mitini yabye, va nga lava: va ka Israeli, vapristi, a vaLevi, a vaNetinime, ni vana va malanza ya Solomoni.

⁴Lomu Jerusalema ku wa akile vo kari va vana va ka Juda, ni va ka Benjamini. A va ka Juda, hi Ataia nʼwana Uzzia, nʼwana Zekaria, nʼwana Amaria, nʼwana Xefatia, nʼwana Mahalaleli, wa vana va Perezi;

⁵na Maaseia nʼwana Baruke, nʼwana Kol-hoze, nʼwana Hazaia, nʼwana Adaia, nʼwana Joiariba, nʼwana Zekaria, nʼwana wa muXiloni.

⁶Vontlhe vana va Perezi lava va nga wa akile le Jerusalema va wa hi 468 wa tinhenha.

⁷A vana va Benjamini hi lava: Sallu nʼwana Mexullamu, nʼwana Joeda, nʼwana Pedaia, nʼwana Kolaia, nʼwana Maaseia, nʼwana Itieli, nʼwana Jexaia.

⁸Anzhako kakwe ku wa hi Gabai na Sallai, 928 wa vavanuna.

⁹A muhlayisi wabye ku wa hi Joeli nʼwana Zikri. Juda nʼwana Hasenua i wa hi wa wumbiri ka vahlayisi va muti.

¹⁰A vapristi: Jedaia nʼwana Joiariba, Jakina,

¹¹Seraia nʼwana Hilkia, nʼwana Mexullamu, nʼwana Zadoki, nʼwana Meraiote, nʼwana Ahituba, a mufumeli wa yindlu ya Nungungulu,

¹²zinwe ni vanakulobye lava va nga wa maha a ntiro wa yindlu, 822 wa vavanuna, na Adaia, nʼwana Jerohamu, nʼwana Pelatia, nʼwana Amzi, nʼwana Zekaria, nʼwana Paxura, nʼwana Malkija,

¹³ni vanakulobye, a tihosana ta tiyindlu ta vararu vabye, 242; na Amana: nʼwana Azareli, nʼwana Azai, nʼwana Mexilemote, nʼwana Imera,

¹⁴ni vanakulobye, 128 wa tinhenha. A muhlayisi wabye ku wa hi Zabdieli nʼwana Hagedolimu.

¹⁵A vaLevi: Xemaia nʼwana Hasxuba, nʼwana Azrikamu, nʼwana Haxabia, nʼwana Buni;

¹⁶na Xabetai na Jozabada, wa tihosana ta va ka Levi, loyi a nga wa hi muhlayisi wa mitiro ya le handle ka yindlu ya Nungungulu.

¹⁷Na Matania nʼwana Mika, nʼwana Zabdi, nʼwana Asafa, loyi a nga wa hi murangeli mikombelweni ya ku nyika kubonga, na Bakbukia a nga hi wa wumbiri xikari ka vanakulobye; na Abda, nʼwana Xamua, nʼwana Galala, nʼwana Jedutuni.

¹⁸Lomu mutini wu basileko, vontlhe vaLevi va wa hi 284.

¹⁹Tlhatakumbiri, a varinzeli va tinyangwa, ku wa hi Akuba, na Talmona, ni vanakulobye, va wa hi 172 wa vavanuna.

²⁰A misalela ya ka Israeli, ni vapristi, ni vaLevi, va wa hi lomu mitini yontlhe ya ka Juda, munwe ni munwani tshombeni yakwe.

²¹Kanilezi a vaNetinime va wa akile Ofeli. Ziha na Gixpa va wa hi vahlayisi va vaNetinime.

²²A munwani muhlayisi wa vaLevi lomu Jerusalema, ku wa hi Uzzi nʼwana Bani, nʼwana Haxabia, nʼwana Matania, nʼwana Mika, wa vana va Asafa, a vayimbeleli lava va nga wa maha ntiro ya yindlu ya Nungungulu.

²³Hakuva a hosi yi wa leletele mitiro yabye, ni lezaku a vayimbeleli va nyikiwa xiavelo xabye xi ringanako xa siku ni siku.

²⁴Petahia nʼwana Mexezabeli, wa vana va ka Zera nʼwana Juda, i wa hlawulwe hi hosi a ku cuwukana ni timhaka tontlhe ta vanhu.

²⁵Hi tlhelo ga miti ni masimu ya kona, a vanwani va ka Juda va wa akile le Kiriat-Arba ni zimitaneni za kona, ni le Diboni ni zimitaneni za kona, ni le Jekabzeli ni zimitaneni za kona;

²⁶ni le Jexua, ni le Molada, ni le Bet-Peleti;

²⁷ni le Hazar-Xuali, ni le Beer-Sheba ni zimitaneni za kona;

²⁸ni le Ziklagi, ni le Mekona ni zimitaneni za kona;

²⁹ni le Enrimmoni, ni le Zora, ni le Jarimuti;

³⁰Zanoa, Adullama, ni zimitaneni za kona, Lakixe, ni masinwini ya kona, Azeka ni zimitaneni za kona. Zinghaho va lo gova kusukela le Berexeba kala le nkoveni wa Hinnome.

³¹Ni va ka Benjamini va lo govawo kusukela Geba kuya mahlweni, le Mikmaxe ni Aija, ni le Beteli ni zimitaneni za kona;

³²le Anatote, Noba, Anania;

³³Hazora, Rama, Gitaime;

³⁴Hadida, Zeboime, Nebalati;

³⁵Loda, na Ono, le nkoveni wa vavatli.

³⁶A vanwani vaLevi va ntlawa wa ka Juda, va lo ya aka xikari ka va ka Benjamini.