Read tshwa Nehemia 2 Bible Online

Nehemia 2 - tshwa bible

Nehemia 2

¹Hi hweti ya Nisani, hi lembe ga wu 20 ga kufuma ka hosi Artaxerxesi, laha a vinya gi nga hi mahlweni kakwe, nzi lo teka a vinya nzi gi nyikela ka hosi. Hi mahlweni ka xikhati lexo cima a nzi nga tsanwa mahlweni kakwe.

²A hosi yi te ngalo ka mina: Hi kuyini a nghohe ya wena yi tsanwako na u nga babyi? Za su dlunya lezaku kuxaniseka ka mbilu. Zonake nzi lo chava nguvu.

³Nzi te ngalo ka hosi: Hosi, hanya kala kupinzuka! Nzi wa ta kala nzi nga tsanwi, laha a muti, a wutshamu ga zilahla za vadadani va mina, wu khungumulweko, ni tivati ta kona ti hisilweko hi nzilo ke? [4]

⁴Zonake a hosi yiku ka mina: Makunu u kombela yini ka mina? Zinghaho nzi lo kombela ka Nungungulu wa le tilweni.

⁵Nzi te ngalo ka hosi: Loku a hosi yi vumela, ni loku a hosi yi xalaliswa hi mina, u wa ta nzi rumela le Juda, mutini wa zilahla za vadadani va mina, kasi nzi fela ku ya wu aketa.

⁶A hosi yi te ka mina, a muzinza na wu tshamilewo reveni gakwe: Gi tava pfhumba ga masiku mangani? U ta wuya rini? Zonake laha hosi yi nga vumela ku nzi rumela; nzi lo mu byela xikhati.

⁷Tlhatakumbiri, nzi te ngalo ka hosi: Loku u vumela, hosi, nzi wa kombela ku nyikiwa mapapilo yo kombisa ka vafumeli va le tlhatuko wa congo, kasi va nzi tsika nzi hunza kala nzi ya chikela le Juda;

⁸ni papilo goya ka Asafa, a muhlayisi wa khwati ga hosi, kasi a fela ku nziha a tisinya to maha ha tona a timhanze ta tinyangwa ta khokhola ga yindlu ya Jehova, ni ta ligingisi la muti, ni ta yindlu leyi nzi ta nga tshama ka yona. A hosi yi lo nzi nyika, khwatsi hi lezi a canja ga ginene ga Nungungulu wa mina gi nga hi hehla ka mina.

⁹Zonake nzi lo chikela ka vafumeli va le tlhatuko wa congo nzi va nyika mapapilo ya hosi. A hosi yi wa nzi rumele ni tinduna ta yimpi ni vakhileli va mahaxi, va nzi pangalata.

¹⁰Laha Sanballati a muHoroni, na Tobia a nanza, a muAmoni, va nga wa zi zwile zi lo va karata nguvu, hi kuzwa lezaku ku tile wanuna loyi a telako ku ta hlotela vanana va ka Israeli a kutshameka khwatsi. Nehemia a sangula ku aketa ligingisi la muti.

¹¹Zinghaho nzi lo chikela Jerusalema, nzixwa laho masiku manharu;

¹²zonake nzi lo vuka ni wusiku, ku wa hi mina ni vavanuna va tsongwani; ge a nzi na nga byela munhu lezi a Nungungulu wa mina a nga wa zi chelile mbilwini ya mina a kuva nzi zi mahela Jerusalema. Ne ni xihari nzi wa nga hi naxo, ahandle ka xwalexi nzi nga wa xi khilele.

¹³Nzi lo huma ni wusiku hi nyangwa ya tlhelo ga le nkoveni ngomama ni Hlowo ya Dragoni, hi tlhelo ga Nyangwa ya Wulongo, nzi cuwukisisa a ligingisi la Jerusalema leli li nga wa khungumulwe, ni tivati leti ti nga wa hisilwe hi nzilo.

¹⁴Zonake nzi hunzeleta nziya le Nyangweni ya Xibuka kala le tiveni ga hosi. Kanilezi ku wa nga hi na wutshamu go hunza ni xihari lexi nzi nga wa xi khilele.

¹⁵Zonake nzi lo kanziha ni wusiku lego nziya le xicongwaneni nzi ya cuwukisisa a ligingisi; nzi lo tlhela nzi wuya, nzi ta enghena hi Nyangwa ya tlhelo ga le nkoveni.

¹⁶A tihosana a ti ku tivangi lomu nzi nga wa yile, ni lezi nzi nga maha. Nzi wa nga se wuta nchumu ka vaJuda, ge hambu ka vapristi ni ka manghanakana, ni ka tihosana, hambu tava va nga maha a ntiro.

¹⁷Zonake nzi te ngalo kabye: Ma yi wona mhango leyi hi nga ka yona, lezi a Jerusalema gi hahlulisilweko zona, ni kuhiswa ka tivati hi nzilo. Ngonani hi ta vuxa a ligingisi ta Jerusalema, kasi hi nga have xihlekiso kambe.

¹⁸Nzi lo va byela hi laha a canja ga Nungungulu wa mina gi nga nzi mahela kusasa, ni timhaka leti a hosi yi nga ti wuta ka mina. Vona vaku: A hi sukeni hi aka! Zinghaho va lo tiya hlana a ku maha ntiro lowo wo saseka.

¹⁹Kanilezi laha Sanballati a muHoroni, na Tobia a nanza, a muAmoni, na Gexemi a muArabia, va nga zizwa va lo hi tseketsela, va wuta hi ku hi kanyisa, vaku: Xini lexi mu xi mahako? Mu vukela a hosi ke?

²⁰Zonake nzi lo va hlamula, nziku: Nungungulu wa tilo i ta hi vuna; hikwalaho hina malanza yakwe hi ta suka hi aka. Kanilezi nwina a mu na xiavelo, ge hambu malungelo kutani xialakanyiso lomu Jerusalema.