Read tshwa Estere 1 Bible Online

Estere 1 - tshwa bible

Estere 1

¹Masikwini ya Ahasuerusi, loyi a nga wa fumele 127 wa matiko kusukela India kala Etiopia,

²masikwini lawo hosi Ahasuerusi, laha a nga wa tshamile xitshanwini xa wuhosi gakwe lexi xi nga hi le Xuxani a zinzeni gakwe,

³na ku hi lembe ga wunharu ga kufuma kakwe, i lo mahela tihosana ni malanza yakwe a mubuzo, ni tinduna ta mabutho ya le Persia ni ya le Media, a manghanakana ni tihosana ta matiko yakwe lava va nga wa tsombene mahlweni kakwe.

⁴I lo va kombisa a titshomba ta mufumo wakwe, ni wukosi ga wukulu gakwe kala ku mbhela 180 wa masiku.

⁵Anzhako ka masiku lawo a hosi yi lo maha kambe mubuzo, yi mahela vontlhe vanhu lava va nga wa hi le Xuxani a zinzeni, a vahombe ni vatsongwani, xipimo xa 7 wa masiku, laha tsenzeleni wa zinza ga hosi.

⁶Laho ku wa hayekelwe a tinguwo to basa, ni ta lihlaza, ni ta wukuxe, ti nga wa hayekilwe hi tingoti ta wukene go zirila lomu ka zihareketo za siliva ni lomu timhanzeni ta maribye yo basa, na ku hi ni mibhedi ya siliva ni nzalama, lahasi ka kona na ku mahilwe hi maribye yo basa ni yo pswhuka ni ya halandi ni ya ntima.

⁷Va wa nwela lomu ka zibya za tixaka ti tsalangeneko; ni vinya ga hosi gi wa tele nguvu kota lezi yi nga ranzisa zona.

⁸Ku wa nwiwa hi nayo, ku nga hi kona wo kalala, khwatsi hi lezi a hosi yi nga leletisile zona a tinduna tontlhe ta yindlu yakwe, lezaku ti maha kuranza ka munhu munwe ni munwani.

⁹Yenawu muzinza Vaxti i lo mahela vavasati a mubuzo lomu ndlwini ya wuhosi yi nga wa lumba hosi Ahasuerusi.

¹⁰Hi siku ga wu 7, laha a mbilu ya hosi yi nga wa tsakile hi vinya, i lo ruma Mehumani, na Bizta, na Harbona, na Bigta, na Abagta, na Zetari na Karkasi, a 7 wa mithenwa leyi yi nga wa yimeletela hosi Ahasuerusi,

¹¹lezaku va ya teka muzinza Vaxti va mu neha mahlweni ka hosi na ambele a xidlodlo xa wuhosi, kasi ku ta kombisa a wumbhuri gakwe ka vanhu ni ka tihosana, hakuva i wa hi lipswitla.

¹²Kanilezi muzinza Vaxti i lo kanyisa kuleletela ka hosi a ngayi. Hikwalaho a hosi yi lo holova, a zanga ya yona yi vindluka.

¹³Zonake a hosi yi lo wutisa a titlhari leti ti nga wa tiva zikhati, hakuva a hosi yi wa xuxa tontlhe timhaka zinwe ni lava va nga wa tiva nayo ni nongameto.

¹⁴A madota yakwe ku wa hi Karxena, na Xetari, na Admata, na Tarxixi, na Meresi, na Marsena, na Memukani, va nga 7 wa tihosana ta Persia ni Media, va nga wa wona a nghohe ya hosi, na va hi vona vahombe mufunweni; aku kabye:

¹⁵Hi ta maha yini ka muzinza Vaxti, hi ka nayo, hakuva a nga mahangi lezi hosi Ahasuerusi a nga mu leletela hi milomu ya mithenwa?

¹⁶Memukani i lo hlamula mahlweni ka hosi ni tihosana, aku: Muzinza Vaxti a nga onhelangi hosi yoce, kanilezi i onhele kambe ni tihosana tontlhe ni vanhu vontlhe va matiko ya hosi Ahasuerusi.

¹⁷Hakuva lezi a muzinza wu zi mahileko zi ta zwala ka vontlhe vavasati, va sangula ku kanyisa vavanuna vabye, laha ku ta nga wuliwa lezaku: Hosi Ahasuerusi i vitanisile muzinza Vaxti lezaku ata mahlweni kakwe, kanilezi a nga tangi.

¹⁸Inyamutlha lezi a vasati va tihosana ta Persia ni Media, lava va zwileko a zimaho za muzinza, va ta mahawu lezo ka tihosana; hikwalaho lezo zi ta vuxa kutsanwa ni zanga ya hombe.

¹⁹Loku a hosi yi zi ranza, yi nga rumisa a nyivo ya wuhosi, lezaku ku tsaliwa milayweni ya maPersia ni maMedi, a mhaka yi nga hiko na kuhunzulwa, lezaku Vaxti a nga ha veki nkonzo wakwe mahlweni ka hosi Ahasuerusi, u wuya u nyikela a wuzinza gakwe ka munwani loyi a nga chukwana ku hunza yena.

²⁰A xikhati lexi a nyivo ya hosi yi ta nga tivisiwa mufunweni wontihe, kota lezi wu nga wa hombe, vontlhe vavasati va ta kombisa xichavo ka vavanuna vabye, kusukela ka vatsongwani kala ka vahombe.

²¹A mhaka leyo yi xalalisa a hosi ni tihosana. A hosi yi lo maha khwatsi hi lezi a nga wulile Memukani.

²²I lo rumela mapapilo matikweni wontihe ya hosi, a tiko ni tiko hi matsaiela ya gona ni lirimi la gona, lezaku a wanuna munwe ni munwani a fumele a yindlu yakwe, a wulawula lirimi la ka kabye.