Read tshwa Estere 2 Bible Online

Estere 2 - tshwa bible

Estere 2

¹Anzhako ka lezo, laha hosi Ahasuerusi a nga wa bohlile khulo gakwe, i lo khumbula Vaxti, ni lezi a nga wa zi mahile, ni nayo lowu a mu vekeleko.

²Zonake a malanza ya hosi, lawa ma nga wa mu yimeletela, ma te ngalo: Ngha hosi yi labyelwa vanhwana vo saseka.

³A hosi ngha yi leletela a tinduna ta matiko wontihe ya yona lezaku ti tsombanyisa a vanhwana vontlhe vo saseka va va neha le Xuxani a zinzeni, a ndlwini ya vavasati, va hlayiswa hi Hagai, a nduna ya hosi ni muhlayisi wa vavasati, kasi va nyikwa a zilo za ku ti basisa ha zona.

⁴A nhwana loyi a ta nga tsakisa a hosi, hi yena a ta ngava muzinza xikhundleni xa Vaxti. A mhaka yi lo xalalisa a hosi, ku mahiwa lezo.

⁵Le Xuxani ku wa hi ni muJuda wo kari, a vito a nga hi Mordekai nʼwana Jaira wa Ximei, wa Kixi, a muBenjamini;

⁶loyi a nga wa khomilwe le Jerusalema zinwe ni tikhumbi leti ti nga wa hi na Jekonia a hosi ya ka Juda, loyi a nga wa khomilwe hi Nebukadnezzare a hosi ya le Babuloni. [1]

⁷I wa kari a wundla Hadasa, a nga Estere, a nʼwana wa raru-tsongwani wakwe, a xisiwana xo kala dadani ni mamani, na hi nhanyana wo saseka. A xikhati a vabeleki vakwe va ngafa, Mordekai i lo mu wundla kota nʼwana wakwe.

⁸Zinghaho a xikhati lexi a mhaka ya hosi yi nga wa tibyisilwe, a vanhwana vontlhe na va tsombanyisilwe le Xuxani a zinzeni, lomu wuhlayiselweni ga Hagai, Estere i lo yiswa ndlwini ya hosi, wuhlayiselweni ga Hagai, a muhlayisi wa vavasati.

⁹A nhwana i lo mu xalalisa a kuma thomo mahlweni kakwe. I lo hatlisa a mu nyika a zo ti basisa ha zona ni zakuga, ni 7 wa vanhanyana lava va hlawulweko ndlwini ya hosi, a mu rurisa ni vanhanyana vakwe a mu yisa wutshanwini go saseka nguvu ga yindlu ya vavasati.

¹⁰Estere a nga ti wulangi xibongo xakwe ge hambu lixaka lakwe, hakuva Mordekai i wa mu layile a ku nga wuli nchumu.

¹¹Siku ni siku Mordekai i wa fambafamba laha mahlweni ka tsenzela wa yindlu ya vavasati, kasi ku tiva kuhanya ka Estere ni lezi zi ta nga maheka ka yena.

¹²Makunu laha a khati ga nhanyana munwe ni munwani gi nga wa chikele ga kuya ka hosi Ahasuerusi, hi nzhako na va ti longisele kota nayo wa vavasati wa 12 wa tihweti, (hakuva lowo wu wa hi tsengo wa masiku ya kutibasisa kabye— 6 wa tihweti na va tola mafura ya mure, 6 wa tihweti na va tola za masema yo nuhela ni zo ti basisa ha zona,)

¹³zonake anzhako ka lezo hi kona a nhwana a tako ka hosi, a nyikiwa ni zihi a zi lavako kasi ku huma nazo ndlwini ya vavasati aya nazo ndlwini ya hosi.

¹⁴I waya kona laha gambyeni, ni mixo a tlhela aya ndlwini ya wumbiri ya vavasati, wuhlayiselweni ga Xaasgazi, a thenwa wa hosi lowu wu nga hlayisa a mindlukulu yakwe. I wa nga ha tlheli aya ka hosi, loku a hosi yi nga tsakiswangi hi yena, a wuya a vitanwa hi vito gakwe.

¹⁵Makunu laha Estere nʼwana Abihaili, a rarutsongwani wa Mordekai, loyi a nga mu wundla kota nʼwana wakwe, a nga wa chikelelwe hi khati gakwe ga kuya hosini, a nga kombelangi xilo ahandle ka lezi a nga nyikilwe hi Hagai, a thenwa wa hosi, a muhlayisi wa vavasati. Estere i wa tsakelwa hi vontlhe lava va nga mu wona.

¹⁶Zinghaho Estere i lo yiswa ka hosi Ahasuerusi, a ndlwini ya wuhosi, hi hweti ya wu 10, yi nga hweti ya Tebeti ya lembe ga wu 7 ga kufuma kakwe.

¹⁷A hosi yi lo ranza Estere ku hunza vontlhe vavasati, a tsakelwa nguvu hi hosi ku hunza vanwani vanhwana; zinghaho i lo mu ambexa a xidlodlo xa wuhosi hlokweni yakwe, a mu maha muzinza xikhundleni xa Vaxti.

¹⁸Zonake a hosi yi lo maha mubuzo wa Estere a mahela tihosana takwe tontlhe ni malanza yakwe wontihe; a matiko a ma nyika kuhumula, a ma nyika zinyikiwo hi manyikela ya hosi.

¹⁹A xikhati lexi a vanhwana va nga tsomhanyiswa khati ga wumbiri, Mordekai i lo tshama laha mahlweni ka nyangwa ya hosi.

²⁰Estere i wa nga se ti wula xibongo xakwe ge hambu lixaka lakwe, khwatsi hi lezi Mordekai a nga wa mu layisile zona, hakuva Estere i lanzele zileletelo za Mordekai kufanana ni xikhati a nga ha mu wundla.

²¹Masikwini walawo, na Mordekai a tshamile nyangweni ya hosi, a mithenwa mimbiri ya hosi, Bigtani na Terexi, a varinzeli va nyangwa, va lo zangara va lava ku daya hosi Ahasuerusi.

²²A mhaka yi lo tibyiwa hi Mordekai, loyi a nga yi hunzisa a byela muzinza Estere. Estere i lo bika mhaka leyo ka hosi hi vito ga Mordekai.

²³Laha a mhaka yi nga hlolwa, ku kumeka lezaku li wa hi lisine, hi wumbiri gabye va lo hayekwa sinyeni. Lezo zi lo tsalwa bhukwini ga matimu mahlweni ka hosi.