Read tshwa Estere 5 Bible Online

Estere 5 - tshwa bible

Estere 5

¹Makunu hi siku ga wunharu, Estere i lo ambala tinguwo takwe ta wukosi, a ya yima lomu hubyeni ga yindlu ya hosi, ngomama ni yindlu ya hosi; a hosi na yi tshamile xitshanwini xa yona xa wuhosi ndlwini ya wuhosi ngomama ni nyangwa ya yindlu.

²Laha a nga wona muzinza Estere na a yimile lomu hubyeni, a hosi yi lo mu tsakela, yi mu tlakusela a nhonga ya nzalama ya wuhosi leyi a nga wa yi welele. Zinghaho Estere i lo tshinela a khumba a choka ya nhonga leyo.

³Zonake a hosi yiku kakwe: Muzinza Estere, mahungu muni? Xikombelo muni u xi tisako? Hambu u nga kombela a khihlanya ga mufumo, u ta nyikiwa.

⁴Estere aku: Loku a hosi yi vumela, nzi kombela hosi na Hamani, lezaku muta nyamutlha kugeni loku nzi mu longiseleko.

⁵Zonake a hosi yiku: Hatlisani mu ya vitana Hamani, kasi a fela ku ta maha lezi Estere a wulileko. Zinghaho a hosi na Hamani va loya kugeni loku Estere a nga wa va longisele.

⁶A xikhati ku nga nwiwa vinya, a hosi yiku ka Estere: U na ni xikombelo ke? U ta nyikiwa. U lava yini? Hambu u nga kombela a khihlanya ga mufumo, u ta tsemelwa.

⁷Zonake Estere a hlamula aku: A xikombelo xa mina hi lexi:

⁸Loku nzi xalalisa hosi, ni loku a hosi yi vumela ku nzi mahela xikombelo xa mina, nzi wa kombela lezaku a hosi na Hamani vata kambe kugeni loku nzi ta nga ku longisa, hambu kova manziko nzi ta maha kota kuranza ka hosi.

⁹Zonake a siku lego Hamani i lo huma a famba a mbilu yakwe na yi tele hi litsako. Kanilezi laha a nga wona Mordekai laha nyangweni ya hosi, a nga suki ge hambu ku kombisa xichavo, i lo mu zangarela nguvu.

¹⁰Hambu lezo Hamani i lo ti khoma, aya kaya; i lo ya vitanisa vanghana vakwe ni sati wakwe Zerexi.

¹¹Hamani i lo va hlawutela hi wunyingi ga titshomba takwe, ni kutala ka vana vakwe, ni lezi a hosi yi nga mu tlakusa ha zona yi mu veka hehla ka tihosana ni malanza ya hosi.

¹²Tlhatakumbiri, Hamani i te ngalo: Ina, ahandle ka mina muzinza Estere a nga vumelangi munwani munhu a ku pangalata hosi kugeni loku a nga wa ku longisile. Hambu manziko nziya kwaleyo ni hosi.

¹³Kanilezi zontlhe lezo a zi wuli nchumu ka mina, loku nzi wona muJuda gaya Mordekai na tshamile laha nyangweni ya hosi.

¹⁴Zonake a sati wakwe Zerexi ni vanghana vakwe vontlhe vaku kakwe: Ngha ku yimiswa a mhanze ya 50 wa mikono kuleha, kasi manziko u fela ku wulawula ni hosi lezaku a hayekwa ka yona; zonake u taya kugeni ni hosi na u tsakile. Lezo zi lo mu tsakisa Hamani, a rumisa a kuva yi yimiswa mhanze leyo.