Read tshwa Estere 6 Bible Online

Estere 6 - tshwa bible

Estere 6

¹Wusikwini gwalego a hosi a yi kumangi wurongo; i lo vitanisa a bhuku ga matimu gi ta gonziwa mahlweni ka hosi.

²Ku lo kumeka na ku tsalilwe lezaku Mordekai i wa na nga bika ha Bigtana na Terexi, a mithenwa mimbiri ya hosi, va nga hi vahlayisi va nyangwa, lezaku va wa lava ku daya hosi Ahasuerusi.

³A hosi yi wutisa yiku: Xini Mordekai a nga mahelwa xa ku mu dzunza ni ku mu bonga a ntiro lowo? A malanza lawa ma nga wa mu yimeletela maku ka hosi: A nga mahelwangi nchumu.

⁴A hosi yiku: Himani a nga lomu hubyeni? Hamani i wa sina a enghenile lomu hubyeni ga hosi, kasi ku ta wulawula ni hosi ni mhaka yo hayeka Mordekai laha ka mhanze leyi a nga wa yi yimisile.

⁵A malanza ya hosi maku: Hi gaya Hamani a yimileko lomu hubyeni. A hosi yiku: Mu byeleni a enghena.

⁶Zinghaho Hamani i lo enghena. A hosi yiku kakwe: Xini hi ta nga mahela a munhu loyi a hosi yi xuvako ku mu dzunza? A xikhati lexo Hamani i waku mbilwini yakwe: Himani munwani a nga dzunziwako hi hosi ahandle ka mina?

⁷Hamani i te ngalo ka hosi: Loyi a hosi yi xuvako ku mu dzunza,

⁸a ku nehiwe tinguwo ta wuhosi leti a hosi yi tolovelako ku ambala, ni haxi legi gi khilelwako hi hosi, ni xidlodlo lexi xi tlhatekwako hlokweni ya hosi;

⁹a tinguwo leto ni haxi zi ta hendleletwa mandleni ya ginwe ga manghanakana ya tihosana ta hosi, kasi ku fela ku ambexwa loyi a hosi yi xuvako ku mu dzunza, a fambiswa hi haxi lomu maruweni ya muti na ku huwelelwa mahlweni kakwe, vaku: I mahiwa lezi a munhu loyi a hosi yi xuvako ku mu dzunza!

¹⁰Zonake a hosi yiku ka Hamani: Hatlisa u teka a tinguwo ni haxi, khwatsi hi kuwula ka wena, u maha lezo ka Mordekai, a muJuda loyi a tshamako laha nyangweni ya hosi! U nga tsiki ni xinwe xa lezi u zi wulileko!

¹¹Zonake Hamani i lo teka a tinguwo ni haxi, a ya ambexa Mordekai, a mu khileta a haxi a fambafamba lomu maruweni ya muti, na a kanyuluka mahlweni kakwe, aku: I mahiwa lezi a munhu loyi a hosi yi xuvako ku mu dzunza!

¹²Mordekai i lo tlhela a wuya laha nyangweni ya hosi. Kanilezi Hamani i lo hatlisa aya ndlwini yakwe na xaniseka, na ti fenengetile hloko yakwe.

¹³I lo hlawutela zontlhe lezi zi nga maheka kakwe, a byela sati wakwe Zerexi ni vanghana vakwe vontlhe. A titlhari takwe ni sati wakwe Zerexi vaku kakwe: Loku Mordekai, loyi u sanguleko makunu kuwa mahlweni kakwe, a hi wa lixaka la vaJuda, hizinene u nga ta humelela naye, zi tiyile lezaku u tawa mahlweni kakwe.

¹⁴Na va ha wulawula naye, a mithenwa ya hosi yi lo chikela hi kuhatlisa, na yi tela Hamani lezaku aya kugeni loku ku longisilweko hi Estere.