Read tshwa Estere 7 Bible Online

Estere 7 - tshwa bible

Estere 7

¹Zinghaho a hosi na Hamani va lo ya tshama kugeni zinwe na muzinza Estere.

²A siku lego ga wumbiri, na va kari vanwa vinya, a hosi yiku ka Estere: Muzinza Estere, u na ni xikombelo ke? U ta nyikiwa; hambu u nga kombela a khihlanya ga mufumo, u ta tsemelwa.

³Zonake muzinza Estere i lo hlamula, aku: Hosi, loku u xalala ha mina, ni loku u vumela, nzi kombela lezaku a wutomi ga mina gi nga lobyiswi, ni wutomi ga va ka hina;

⁴hakuva mina ni va ka hina hi xabyisilwe, kasi kuva hi hihiritwa hi ku bhi. Kanilezi loku ku wa hi ku xaviselwa kuva hi maha tikhumbi, ngha nzi nga wuli nchumu, hambu lezi a nala a nga te ngha a tsanzekile ku ringanisa a kulahlekelwa ka hosi.

⁵Zonake hosi Ahasuerusi i te ngalo ka muzinza Estere: Himani yaloye, a ngava kwihi, a munhu wo kala ave ni mbilu yo alakanya ku maha lezo?

⁶Estere aku: A muhlokisi ni nala wo biha hi yena Hamani loyi! Zonake Hamani i lo dzuka mahlweni ka hosi ni muzinza.

⁷A hosi yi lo tsika kunwa vinya yi suka na yi zangarile yiya le tsenzeleni wa zinza. Hamani i lo suka a yima a khongotela muzinza Estere lezaku a ponisa wutomi gakwe; hakuva i wonile lezaku a hosi yi wa lava ku mu daya.

⁸Zonake a hosi yi suka le tsenzeleni wa zinza yi wuya laha va nga nwela kona vinya, Hamani na a wile laha a nga tshamile kona Estere. Zonake a hosi yiku: I kurumeta ni muzinza kuwoneni ka mina lomu ndlwini ya mina! A xikhati a hosi yi nga wa wulawula, va lo fenengeta a nghohe ya Hamani.

⁹Zonake Harbona, a munwe wa mithenwa leyi yi nga hi mahlweni ka hosi aku: A mhanze ya 50 wa mikono kambe hi liya, leyi Hamani a nga yi yimisele ku hayeka Mordekai loyi a nga ponisa hosi, yi laha kusuhani ni yindlu ya Hamani. A hosi yiku: Mu cikiteni ka yona!

¹⁰Zinghaho va lo cikita Hamani laha mhanzeni leyi a nga wa yi longisele Mordekai. Zonake a zanga ya hosi yi lo hohla.