Read tshwa Estere 9 Bible Online

Estere 9 - tshwa bible

Estere 9

¹Makunu hi hweti ya wu 12, yi nga ya Adare, hi siku ga 13, laha a zileletelo za hosi zi nga wa fanele ku tatiseka, a siku lego a valala va vaJuda va nga tsumba lezaku va ta va vukela ha gona, kanilezi a mhaka yi hunzulwa, a vaJuda va hi vona va vukelako valala vabye;

²a vaJuda va lo tsombana lomu mitini yabye ka wontihe matiko ya hosi Ahasuerusi, kasi ku daya lava va ta nga va vukela. A nga kona ni munwe a nga tiya a va vuka, hakuva va wa chabyiwa hi vanhu vontlhe.

³Tontlhe tihosana ta matiko, ni tinduna, ni vafumeli, ni vafambisi va ntiro ya hosi, va lo vunetela vaJuda, hakuva va wa mu chava nguvu Mordekai.

⁴Hakuva Mordekai i wa hi wa hombe ndlwini ya hosi, ni wudumo gakwe gi wa zwakele matikweni wontihe; hakuva inaloye Mordekai i wa enzelekelana a kuliswa zikhati ni zikhati.

⁵A vaJuda va lo daya vontlhe valala vabye hi supado, va va hihirita va maha kuranza kabye hehla ka lava va nga wa va venga.

⁶Lomu Xuxani, a zinzeni, a vaJuda va lo daya 500 wa vavanuna.

⁷Va lo daya na Parxandata, na Da-Ifoni, na Aspata,

⁸na Porata, na Adalia, na Aridata,

⁹na Parmaxta, na Arisai, na Aridai, na Vaizata,

¹⁰va nga khume ga vana va Hamani nʼwana Hamedata, a nala wa vaJuda. Kanilezi a va na nga phanga nchumu.

¹¹A siku lego ku lo ta bikiwa ka hosi le Xuxani, a zinzeni, a tsengo wa lava va nga delwe.

¹²A hosi yiku ka muzinza Estere: A vaJuda va dele 500 wa vavanuna lomu Xuxani, ni khume ga vana va Hamani. Lomu ka manwani matiko ya hosi ke, va ngava va mahile yini! Makunu xikombelo muni u nga naxo? U ta nyikiwa. U xuva ku mahelwa yini? Zi ta maheka.

¹³Zonake Estere aku: Loku a hosi yi vumela, ngha vaJuda va lomu Xuxani va vumelwa kambe manziko ku maha lezi zi nga wa yimiselwe nyamutlha, va hayeka a khume ga vana va Hamani laha timhanzeni.

¹⁴A hosi yi lo leletela zalezo, ku biwa nyiwo lomu Xuxani, ku chikitwa a khume ga vana va Hamani.

¹⁵A vaJuda lava va nga wa hi lomu Xuxani va lo tsombana kambe hi siku ga 14 ga hweti ya Adare, va daya 300 wa vavanuna lomu Xuxani. Kanilezi a va na nga phanga nchumu.

¹⁶A vanwani vaJuda lava va nga wa hi lomu matikweni ya hosi va lo tsombana va vikela wutomi gabye; va lo kuma kurula, va daya 75,000 wa valala vabye. Kanilezi a va na nga phanga nchumu.

¹⁷Lezo zi lo maheka hi siku ga 13 ga hweti ya Adare; ku ku hi siku ga 14 wa ywaleyo hweti va humula, va maha ha gona mubuzo va tsaka.

¹⁸Kanilezi a vaJuda lava va nga wa hi lomu Xuxani va lo tsombana hi siku ga 13 ni 14; ku ku hi siku ga 15 va humula, va maha mubuzo va tsaka.

¹⁹Hikwalaho a vaJuda lava va akileko lomu mitini yi nga bhiywangiko, a siku ga 14 ga hweti ya Adare va maha mibuzo va tsaka, giva ximuse, va rumelana zinyikiwo ha gona.

²⁰Mordekai i lo tsala timhaka leto, a hangalasa mapapilo ka vaJuda vontlhe lava va nga lomu matikweni ya hosi Ahasuerusi, ya kusuhani ni le kule,

²¹lezaku va tlhangana lembe ni lembe, va hlayisa a siku ga 14 ni ga 15 lomu ka hweti ya Adare,

²²ku nga masiku lawa a vaJuda va nga kuma kuhumula valaleni vabye, a hweti leyi a kuxaniseka kabye ku nga hunzulwa kuva litsako, a siku ga xirilo gi hunzulwa giva ka migiyo; va maha ha wona a mibuzo, va tsaka, va rumelana zinyikiwo, ni ku nyika zinyikiwo ka zisiwana.

²³A vaJuda va lo vumela ku maha lezi va nga sina va zi sangule, zi nga lezi Mordekai a nga wa va tsalele.

²⁴Hakuva Hamani nʼwana Hamedata, a muAgage, a nala wa vaJuda, i wa bohile xikungo xa ku lovisa vaJuda, a va hlahluvela Pure, yi nga hlolo, kasi ku va hihirita a va lovisa.

²⁵Kanilezi laha a mhaka yi nga chikela hosini, Estere i lo rumisa lezaku ku hangalaswa mapapilo yo vukela a xikungo lexi xi nga wa bohelwe vaJuda, ni lezaku xi wela hlokweni yakwe Hamani, yena ni vana vakwe va hayekiwa timhanzeni.

²⁶Hikwalaho a masiku lawo va lo nyika vito ga Purime, na zi sukela laha ka vito ga Pure. Hikwalaho, hi kota ya timhaka tontlhe ta papilo legi, ni mihumbo leyi va yi wonileko hi mhaka leyo,

²⁷a vaJuda va lo tiyisa va ti hlawutela lezaku vona ni pswalo wabye, ni vontlhe lava va hlengelako zinwe navo, va hlayisa masiku lawa ya mambiri lembe ni lembe, maringano ni lezi zi tsalilweko ni zileletelo za kona.

²⁸Va ti yimisela lezaku a masiku ma alakanyiwa ni ku hlayiswa hi zizukulwana zontlhe, ni mingango yontlhe, ni matiko wontihe, ni miti yontlhe ni lezaku masiku lawo ya Purime ma nga fuvi xikari ka vaJuda, xiva xialakanyiso xi nga hiko na magumo xikari ka zizukulwana zabye.

²⁹Zonake muzinza Estere nʼwana Abihaili ni muJuda loye Mordekai va lo nyikwa malungelo yo tsala va tiyisa papilo lego ga wumbiri ga Purime.

³⁰I lo hangalasa mapapilo ka vaJuda vontlhe va nga lomu ka 127 wa matiko ya mufumo wa Ahasuerusi, ya timhaka ta kurula ni wunene,

³¹kasi ku tiyisa masiku lawo ya Purime ni zikhati za wona, khwatsi hi lezi zi yimisilweko hi muJuda Mordekai na muzinza Estere, ni lezi vona ni pswalo wabye va ti yimiseleko ku yila ni ku maha hlomulo.

³²A zileletelo za Estere zi tiyisa timhaka leto ta Purime; ti lo tsalwa lomu bhukwini.