Read tshwa Eksodusi 1 Bible Online

Eksodusi 1 - tshwa bible

Eksodusi 1

¹Laya hi mavito ya vana va Israeli, lava va ngaya Gipite zinwe na Jakobe, lava loyi ni loyi a yileko ni ngango wakwe:

²Rubeni na Simoni, na Levi, na Juda,

³na Isakari, na Zebuloni, na Benjamini,

⁴na Dani, na Naftali, na Gadi, na Axeri.

⁵A vanhu vontlhe va yindlu ya Jakobe va wa hi 70. Josefa i wa sina a hi leyo Gipite.

⁶Zonake Josefa i lofa ni vanakulobye vakwe vontlhe, ni vontlhe va xizukulwana lexo.

⁷A vanana va ka Israeli va lo beleka va anza, va tala nguvu, va hi ni ntamu, va tata tiko. [1]

⁸Zonake ku lo fuma a hosi yiswa le Gipite, leyi yi nga mu tiviko Josefa.

⁹Yiku ka vanhu va yona: Leli lixaka la vanana va ka Israeli, la hi hunza hi kutala ni ntamu;

¹⁰a hi va khomeni hi mano, va nga anza nguvu; ku ku loku ku huma yimpi, va hlengela ni valala va hina, valwa na hina, zonake va suka lomu tikweni.

¹¹Zonake va lo yimisa a tinduna ta mitiro hehla kabye, va va xanisa hi mikhinyavezo. Va lo akela Faro a miti ya kuveketela ya Pitomi na Ramsesi.

¹²Kanilezi hambu lezo va nga wa xaniswa, hi laho va nga wa anza nguvu, va tala. Hi laho a vanana va ka Israeli va nga wa vengiwa ha kona.

¹³Zonake a vaGipite va lo tirisa a vanana va ka Israeli hi timbiti. [2]

¹⁴Va lo va hlokisa kuhanya kabye hi mitiro yo binza ya zitini, ni mitiro yontlhe ya masimu; a mitiro yontlhe leyo va wo va tirisa hi timbiti.

¹⁵Zonake a hosi ya vaGipite yi lo byela a masungukati ya maHeberu (a vito ga munwani i wa hi Xifra, ni munwani i wa hi Pua), yiku:

¹⁶Loku mu tekela wasati wa muHeberu, cuwukani na ha ku beleka, loku a hi mufana dayani; loku a hi nhanyana, mu tsikeni a hanya.

¹⁷Kanilezi a masungukati ma lo chava Nungungulu; a ma mahangi kota lezi a hosi ya Gipite yi nga va leletele ku maha; kanilezi va lo ponisa vafana.

¹⁸Kanilezi a hosi ya vaGipite yi lo vitana masungukati, yiku ka wona: Hiyini mu ponisako vafana ke?

¹⁹A masungukati maku ka Faro: Hi lezi a vasati va maHeberu a va fanani ni vasati va vaGipite; vona va na ni ntamu, loku a sungukati gi chikela gi va kuma na va belekile.

²⁰Nungungulu i lo katekisa masungukati; a vanhu va lo anza va tala nguvu.

²¹Hikwalaho, hi kota ya lezi a masungukati ma nga chava Nungungulu, Nungungulu i lo katekisa a tiyindlu tabye.

²²Zonake Faro i lo leletela a vanhu vakwe, aku: A vafana vontlhe lava va ta nga belekiwa, va hoxeni congweni; kanilezi a vanhanyana va tsikeni va hanya. [3]