Read tshwa Eksodusi 10 Bible Online

Eksodusi 10 - tshwa bible

Eksodusi 10

¹Jehova aku ka Mosi: Famba ka Faro hakuva nzi yi nonohisile a mbilu yakwe ni timbilu ta malanza yakwe, kasi nza fela ku maha ziwoniso lezi za mina xikari kabye.

²Kasi wenawu wa fela ku ta hlawutela ka nʼwana wa wena, ni ka zukulu wa wena, a zilo lezi nzi zi mahileko ka vaGipite, ni zihlamaliso lezi nzi zi mahileko xikari kabye, nwinawu mu fela ku nzi tiva ha zona, lezaku hi mina Jehova.

³Zonake Mosi na Aroni va loya ka Faro va yaku ngalo kakwe: Jehova, Nungungulu wa maHeberu, i ngalo: U ta ala kala rini a ku ti koramisa mahlweni ka mina? Tlhatlha a vanhu va mina va ya nzi khozela.

⁴Hakuva loku u beletela a vanhu va mina a kuya nzi khozela, manziko nzi ta humesa a humbi lomu tikweni gontlhe ga wena.

⁵Yi ta fenengeta misava yontlhe, a vanhu va ta tsanzeka ni ku wona misava; a humbi yi taga lezi zi seleko, lezi zi nga pona maralala; yi taga ni tisinya tontlhe leti ti mitileko masinwini ya nwina.

⁶Yi ta tata a yindlu ya wena, ni tiyindlu ta malanza ya wena wontihe, ni tiyindlu ta vaGipite vontlhe; lezaku a vararu va wena ni vakoko va wena a va zi wonangi zo kota lezi, kusukela kubelekweni kabye kala lezi. Mosi i lo fulara a suka mahlweni ka Faro.

⁷Zonake a malanza ya Faro maku kakwe: Loyi munhu i tava ziyo xikari ka hina kala rini? Tlhatlha vanhu lava va ya khozela Jehova, Nungungulu wabye. A ku zi woni lezaku a Gipite ga lova ke?

⁸Zonake va lo vitana Mosi na Aroni mahlweni ka Faro. Yena aku ka vona: Fambani mu ya khozela Jehova, a Nungungulu wa nwina. Kanilezi mbamani va ta nga famba ke?

⁹Mosi aku; Hi ta famba ni vanana va hina, ni zikhosana za hina, ni vafana va hina, vi vanhanyana va hina, ni tiyivu ta hina, ni tihomu ta hina; hakuva hiya nkhozweni ya Jehova.

¹⁰Faro aku kabye: Jehova ave zinwe na nwina, kota lezi nzi mu tlhatlhako lezaku mu famba ni vanana va nwina. Cuwukani! Mu na ni maalakanyo yo biha!

¹¹Ahihi; nwina vavanuna, fambani mu ya khozela Jehova, hakuva hi lezo mu kombelako zona. Zonake va lo hlongoliwa mahlweni ka Faro.

¹²Jehova aku ka Mosi: Tlakusa a canja ga wena hehla ka tiko ga Gipite, ku tata a humbi lomu tikweni ga Gipite, yi ta taga a byanyi gontlhe ga misava, ni zontlhe lezi zi siyilweko hi vula ya maralala.

¹³Mosi i lo tlakusa a nhonga yakwe hehla ka tiko ga Gipite, zonake Jehova i lo pupuxa a mheho ya Mutsuwuka-gambo lomu tikweni, yi pupuxa a siku gontlhe. Laha na gi cile, a mheho ya Mutsuwuka-gambo yi lo neha humbi.

¹⁴A humbi yi lo ta chikela yi tata tiko gontlhe ga Gipite, yi fenengeta misava yontlhe ya Gipite hi kutala ka yona. Cima ku wa nga seva kona a humbi yo kota leyo kale ka matiko, ni lezaku yi nga tava kona kambe a humbi yo kota leyo.

¹⁵Yi lo fenengeta misava yontlhe, a tiko gi pfhupeliswa; a humbi yiga zontlhe lezi zi milako lomu tikweni, ni mihanzu yontlhe ya tisinya leti ti nga ponile a vula ya maralala; a ku salangi ne ni tluka lomu tikweni, ni ka lezi zi milako masinwini ya tiko gontlhe ga Gipite.

¹⁶Zonake Faro i lo hatlisa ku vitana Mosi na Aroni, aku ka vona: Nzi onhile ka Jehova, Nungungulu wa nwina, ni ka nwina.

¹⁷Makunu lezi ngha u nzi tsetselela a kuonha ka mina a khati legi basi, mu kombela ka Jehova, Nungungulu wa nwina, kasi a fela ku susa a ntungu lowu ntsena ka mina.

¹⁸Mosi i lo Suka mahlweni ka Faro aya kombela ka Jehova.

¹⁹Zonake Jehova i lo pupuxa a mheho ya hombe ya Muhlwa-gambo, yiya susa a humbi yi yi hoxa le Bimbini go Pswhuka. A ku salangi ni humbi lomu tikweni ga Gipite.

²⁰Kanilezi Jehova i lo nonohisa a mbilu ya Faro, a ala ku tlhatlha a vanana va ka Israeli va famba. A munyama.

²¹Jehova Uku ka Mosi: Tlakusa a canja ga wena le hehla kasi ku fela kuva kona munyama lomu tikweni gontlhe ga Gipite; a munyama lowu wu ta nga zwakala ka vanhu.

²²Mosi i lo tlakusa a canja gakwe le hehla, zonake wu lova kona a munyama wa ntima wo phu lomu tikweni gontlhe ga Gipite wu hetile masiku manharu.

²³A vanhu va tsanzeka ku wonana, ku nga hi kona munhu a nga wa zi kota ku suka wutshanwini gakwe lomu ka masiku manharu. Kanilezi ka vanana va ka Israeli ku wa hi kona kuwonekela lomu mitini yabye.

²⁴Zonake Faro i lo vitana Mosi, aku: Fambani mu ya khozela Jehova, Nungungulu wa nwina; ku ta sala tiyivu ta nwina ni tihomu ta nwina basi; mu famba ni vanana va nwina.

²⁵Mosi aku: Hi nyike wena lezi hi ta ngaya phahlela ha zona ka Jehova, Nungungulu wa hina.

²⁶A mitlhambi ya hina hi ta famba nayo, cima ku nga ta sala ni zikamba, hakuva hi ta zi teka kwalomo lezi hi ta nga phahlela ha zona Jehova, Nungungulu wa hina, hakuva a hi zi tivi lezi hi ta nga mu khozela ha zona ria hi nga se chikela laho.

²⁷Kanilezi Jehova i lo nonohisa a mbilu ya Faro, a ala ku va tlhatlha va famba.

²⁸Faro aku ka yena: Suka ka mina, u nga ha engeti u wona a nghohe ya mina, hakuva a siku lego hi ta nga wonana, wena u tafa.

²⁹Mosi aku: U wula khwatsi, cima nzi nga ta ha wona a nghohe ya wena kambe.