Read tshwa Eksodusi 14 Bible Online

Eksodusi 14 - tshwa bible

Eksodusi 14

¹Jehova i lo wulawula ka Mosi aku:

²Byela a vanana va ka Israeli va tlhela va ya govela hi le mahlweni ka Pihahirote, xikari ka Migdole ni bimbi, le ko cuwukana na Baalzefoni: mu zimeka matenda ya nwina ngomama ni laho, kusuhani hi bimbi,

³kasi Faro a fela ku wula hi vanana va ka Israeli, aku: Va khweketa lomu xikari ka khwati, ni xiwula xi va tsangile.

⁴Mina rizi ta nonohisa a mbilu ya Faro, na yena i ta va lanza; zonake mina nzi tava ni wudumo hi Faro ni yimpi yontlhe; ni vaGipite va ta zi tiva lezaku hi mina Jehova. Zonake va lo maha lezo.

⁵Laha a hosi ya Gipite yi nga wa byelilwe lezaku a vanhu va tsutsumile, a mbilu ya Faro ni timbilu ta malanza yakwe ti lo hunzulukela a vanhu, vaku: Hi mahele yini a ku tlhatlha va ka Israeli va famba, va nga hi tireli ke?

⁶Zonake i lo panisa a tikareta takwe, a famba ni vanhu vakwe.

⁷I lo teka 600 wa tikareta, leti ti langilweko xikari ka vaGipite, ni tikareta tontlhe tinwani ta vaGipite: ku wa khilele tinhenha hehla ka tona tontlhe.

⁸Zinghaho Jehova i lo nonohisa a mbilu ya Faro, a hosi ya Gipite, kasi a fela ku lanza a vanana va ka Israeli, na kasi a vanana va ka Israeli va huma hi canja ga ntamu. [26]

⁹A vaGipite va lo va lanza; hi mahaxi ni tikareta tontlhe ta Faro, ni vakhileli va kona, ni yimpi yakwe yontlhe, yi lo ya va kuma na va govile kusuhani ni bimbi, hi mahlweni ka Pihahirote ngomama na Baalzefoni.

¹⁰Laha Faro a nga kari a tshinela, a vanana va ka Israeli va lo tlakusa mahlo, va wona vaGipite na va kari va va lanza. Zonake a vanana va ka Israeli: va lo chava nguvu, vaba huwa ka Jehova.

¹¹Vaku ka Mosi: Xana ku wa nga hi kona minkele le Gipite, lezi u nga hi humesa ku: ta fela lomu xiwuleni ke? U hi mahele yini, a ku hi humesa Gipite ke?

¹²Xana a hi zona lezi hi nga ku byelile le Gipite ke? hiku: Hi tsike hi tirela vaGipite; hakuva ku enele ka hina loku hi tirela vaGipite, a ku hunza ku ta fela lomu xiwuleni.

¹³Zonake Mosi aku ka vanhu: Mu nga chavi; yimani mu wona a kuhanyisa ka Jehova loku a ta nga ku tira xikari ka nwina nyamutlha; hakuva a vaGipite lava mu va wonako makunu, cima mu nga ta ha va wona kambe.

¹⁴Jehova i ta mu lwela, na nwina mu ta rutisa mu miyela. [27]

¹⁵Zonake Jehova aku ka Mosi: U bela yini huwa ka mina? Byela a vanana va ka Israeli lezaku va suka vaya mahlweni.

¹⁶Kambe tlakusa a nhonga ya wena, u nawuluta a canja ga wena hehla ka bimbi, u gi avanyisa; a vanana va ka Israeli va ta famba xikari ka bimbi misaveni yi womileko.

¹⁷Mina nzi ta nonohisa a timbilu ta vaGipite, va ta mu lanza; zonake mina nzi tava ni wudumo ha Faro ni yimpi yakwe yontlhe, ni tikareta takwe, ni vakhileli va mahaxi.

¹⁸A vaGipite va ta zi tiva lezaku hi mina Jehova, loku nzi ti mahela wudumo ha Faro ni tikareta takwe, ni vakhileli vakwe va mahaxi.

¹⁹A ngelosi ya Nungungulu leyi yi rangelako mabandla ya va ka Israeli yi lo suka, yiya hi lenzhako ka vona; ni mhinga ya refu yi lo suka mahlweni kabye yi ya yima hi lenzhako ka vona, xikari ka yimpi ya vaGipite ni ya vaIsraeli.

²⁰A tlhelo ginwe a mhinga ya refu yi lo maha ntima, kanilezi a ginwani tlhelo yi lo woninga ni wusiku; hikwalaho a yimpi yinwe yi wa nga zi koti ku tshinela ka yinwani gontlhe wusiku.

²¹Zonake Mosi i lo nawuluta a canja gakwe hehla ka bimbi, Jehova a tlhelisa a bimbi hi mheho ya ntamu ya Mutsuwuka-gambo, yi nga wa pupuxa wusiku gontlhe a pswhisa bimbi, a mati ma avanyeka hi laha xikari. [28]

²²A vanana va ka Israeli va lo famba hi laha xikari ka bimbi misaveni yi womileko; ni mati ma lo yima hi matlhelo mambiri. [29]

²³Zonake a vaGipite va la va hlongolisa, va enghenawu xikari ka bimbi, va va lanza hi le nzhako; wontihe mahaxi ya Faro, ni tikareta takwe, ni vakhileli vakwe.

²⁴Zonake hi xikhati xa laha mixweni, Jehova i lo cuwuka a yimpi ya vaGipite hi lomu mhingeni ya nzilo, zonake a vilinganyisa a yimpi ya vaGipite;

²⁵a kunula maranzani ya tikareta tabye, va ti fambisa hi kukarateka. A vaGipite vaku: A hi tsutsumeni hi chava vaIsraeli, hakuva Jehova wa va lwela, a hlasela vaGipite.

²⁶Jehova aku ka Mosi: Tlakusa a canja ga wena hehla ka bimbi, ni mati ma ta wuya hehla ka vaGipite, ni hehla ka tikareta tabye, ni hehla ka vakhileli va mahaxi.

²⁷Zinghaho Mosi i lo tlakusa a canja gakwe hehla ka bimbi, zonake laha gi ngaya kuceni, a bimbi gi lo tlhelela wutshanwini ga gona, ni laha a vaGipite va nga wa tsutsuma va lo tlhangana nawo; hilezo Jehova i lo mbembisa a vaGipite xikari ka bimbi.

²⁸A mati ma lo wuya, ma ta fenengeta tikareta ni yimpi yontlhe ya Faro, leyi yi nga wa lanza a vaIsraeli lomu bimbini; laho a ku salangi hambu ni munwe.

²⁹Kanilezi a vanana va ka Israeli va lo famba xikari ka bimbi; laha misaveni yi womileko, ni mati ma wa yimile hi matlhelo mambiri.

³⁰Ka lego siku Jehova i lo hanyisa Israeli canjeni ga vaGipite, ni vaIsraeli va lo wona a zirumbi za vaGipite lomu mbhirini ya bimbi.

³¹Laha Israeli a nga wona mintamu ya hombe ya Jehova, leyi a yi kombisileko ka vaGipite, a vanhu va lo chava Jehova; va kholwa ka Jehova ni ka Mosi, a nanza gakwe.