Read tshwa Eksodusi 17 Bible Online

Eksodusi 17 - tshwa bible

Eksodusi 17

¹Yontlhe hlengeletano ya vanana va ka Israeli yi lo suka xiwuleni xa Sini, na va kari va pima mipfhuka yabye kota kuleletela ka Jehova. Va lo ya zimeka matenda yabye le Refidime; kanilezi laho ku wa nga hi na meti ya kuva a vanhu vanwa. [37]

²Hilezo a vanhu va lo sola Mosi, vaku: Hi nyike mati hinwa. Mosi aku ka vona: Hi yini mu nzi zangarelako? Mu mu ringela yini Jehova?

³A vanhu va wa hi ni tora hi ku vumala mati, zonake va lo holovela Mosi, vaku: U hi humesele yini le Gipite u ta hi daya hi tora, hina ni vanana va hina ni tihomu ta hina?

⁴Zonake Mosi i lo rila ka Jehova, aku: Nzi ta maha yini hi vanhu lava ke? Va lava ku nzi gandla hi maribye!

⁵Jehova aku ka Mosi: Teka masingalakati ya va ka Israeli, ni nhonga ya wena leyi u ngaba bimbi ha yona, u rangela mahlweni ka vanhu.

⁶Languta, nzi ta yima mahlweni ka wena lahaya ribyeni ga Horebe; u taba ribye, zonake gi ta humesa mati; va tanwa vanhu. Mosi i lo maha lezo mahlweni ka masingalakati ya ya ka Israeli. [38]

⁷I lo chula wutshamu lego a vito ga Masa na Meriba hi kota ya kukaneta ka vanana va ka Israeli; ni ku ringa Jehova, vaku: Xana Jehova i kona xikari ka hina, kutani a nga kona ke?

⁸Zonake ku lo ta chikela vaAmaleki, va talwa na Israeli le Refidime. [39]

⁹Mosi aku ka Joxua: Hlawula a vavanuna mu yalwa ni vaAmaleki; manziko nzi taya yima le hehla ka xitsunga, na nzi khomile a nhonga ya Nungungulu.

¹⁰Joxua i lo maha khwatsi hi lezi Mosi a mu byelileko zona, i lo yalwa na Amaleki. Zonake Mosi na Aroni na Hura va lo kanziha hehla ka xitsunga.

¹¹Ku waku loku Mosi a tlakusa mawoko yakwe, a vaIsraeli va hlula; kanilezi loku a releta mawoko yakwe, vaAmaleki va hlula vaIsraeli.

¹²Kanilezi laha a mawoko ya Mosi ma nga karele, va lo teka ribye a tshama ka gona, Aroni na Hura va khoma mawoko yakwe, munwe hi tlhelo ginwe ni munwani hi tlhelo ginwani; zinghaho a mawoko yakwe ma lo tlakuswa kala a gambo gi pela.

¹³Hilezo Joxua ni vanhu vakwe, va lo hlula vaAmaleki hi matlhari.

¹⁴Zonake Jehova aku ka Mosi: Tsala lezi zilo lomu bhukwini, xiva xialakanyiso lexi xi hlayiswako, u byela Joxua lezaku nzi ta lovisa kualakanywa ka Amaleki lahasi ka tilo.

¹⁵Mosi i lo aka a alati, a gi chula a vito ga Jehova-nisi.

¹⁶Aku: Lezi a canja ga Amaleki gi vukeleko a xiluvelo xa, Jehova, Jehova i talwa na Amaleki ka zizukulwana za zizukulwana.