Read tshwa Eksodusi 18 Bible Online

Eksodusi 18 - tshwa bible

Eksodusi 18

¹Makunu Jetro, a mupristi wa le Midiani, muxade wa Mosi, i lozwa hi zontlhe lezi Nungungulu a zi mahileko ka Mosi ni vanhu vakwe va ka Israeli, ni lezaku Jehova i humesile Israeli le Gipite.

²Zonake Jetro, muxade wa Mosi, i lo teka Zipora a sati wa Mosi, loyi a nga wa mu tlhelisile a famba kabye;

³i lo teka ni vanana vakwe va vambiri, a vito ga munwe i wa hi Gerxomi, hakuva Mosi i te ngalo: Nzi wa hi muluveli tikweni ga vamatiko; [40]

⁴a vito ga munwani i wa hi Eliezere, hakuva i waku: Nungungulu wa dadani wa mina i nzi vunile, a nzi tlhatlhisa ka matlhari ya Faro.

⁵Jetro, muxade wa Mosi, a famba ni vana va Mosi, ni sati wakwe le xiwuleni, laha a nga wa govele le xitsungeni xa Nungungulu.

⁶Yena aku ngalo ka Mosi: Mina Jetro, muxade wa wena, nzi tile ka wena ni sati wa wena, ni vana va wena va vambiri.

⁷Zonake Mosi i lo huma a khinga muxade wakwe, a khizama ka yena a mu pswopswa; zonake va lo ambisana mahungu; anzhako va enghena lomu tendeni ga Mosi.

⁸Mosi i lo mu hlawutela hi zontlhe lezi Jehova a zi mahileko ka Faro ni ka vaGipite hi kota ya vaIsraeli, ni zixaniso zontlhe lezi zi nga va humela laha ndleleni, ni lezi Jehova a nga va tlhatlhisisa zona.

⁹Zonake Jetro i lo tsaka hakuva Jehova i mahile wuxinji ka vaIsraeli hi ku va tlhatlhisa canjeni ga vaGipite.

¹⁰Jetro aku ngalo: A ku khesiwe Jehova loyi a mu tlhatlhisileko canjeni ga vaGipite, ni le canjeni ga Faro; loyi a tlhatlhisileko vanhu canjeni ga vaGipite.

¹¹Makunu nza zi tiva lezaku Jehova ngwa hombe ku hunza vanungungulu vontlhe hakuva i va hangalasile ka lezi va nga ti kukumukisa ha zona.

¹²Zonake Jetro, muxade wa Mosi, i lo nyikela munyikelo wo hiswa ni miphahlelo ka Jehova; Aroni ni masingalakati wontihe ya vaIsraeli va lo taga zibaba ni muxade wa Mosi mahlweni ka Nungungulu.

¹³Hi siku gi gamelako Mosi i lo tshama ku lamula vanhu, a vanhu va lo ta yima mahlweni ka Mosi kusukela ni mixo kala laha gambyeni.

¹⁴Zonake laha muxade wa Mosi a nga wonile zontlhe lezi a zi mahako ka vanhu, aku: Za yini lezi u zi mahako ka vanhu? Hikuyini u lamula wece a vanhu? Hikuyini vontlhe vanhu va ta yima mahlweni ka wena kusukela ni mixo kala laha gambyeni?

¹⁵Mosi aku ka muxade wakwe: Hi lezi a vanhu vata ka mina va ta wutisa Nungungulu.

¹⁶Ni loku va hi ni timhaka, vata ka mina, nzi lamula munwe ni munwani, nzi va tivisa zileletelo za Nungungulu ni milayo yakwe.

¹⁷A muxade wa Mosi aku ka yena: Lezi u zi mahako a hi zona.

¹⁸Hakunene u ta karala, wena ni vanhu lava u nga navo; hakuva lezi za tsanza, wena u hava ntamu wo tira wece.

¹⁹Makunu ingisa a gezu ga mina, nzi ku luleka; Nungungulu ave na wena. Yimela vanhu mahlweni ka Nungungulu, u heleketa ka Nungungulu tontlhe timhaka tabye;

²⁰u va gonzisa a ziyimiso ni milayo, u va kombisa a ndlela leyi va faneleko ku famba ha yona, ni ntiro lowu va faneleko ku wu tira.

²¹Kanilezi hlawula xikari ka vanhu vontlhe a vavanuna lava va va nene, lava va chavako Nungungulu, a vavanuna lava va lulamileko, lava va vengako bhinzu legi gi nga lulamangiko; u va yimisa a kuva tinduna ta mazanazana, ni ta zana, ni ta ntlhanu wa makume, ni ta makume; [41]

²²zonake va ta lamula vanhu hi masiku ni masiku; kasike a timhaka leti ta hombe va ta ti tisa ka wena; leti ta titsongwani va ta ti mbheta. Hungula nzhwalo wa wena, va wu rwala zinwe na wena.

²³Loku u maha lezi, na Nungungulu a ku leletela zona, wena u tava ni ntamu wa ku yima, ni vontlhe lava vanhu va tlhelela makaya na va hi ni kurula.

²⁴Mosi i lo ingisa a zileletelo za muxade wakwe, a maha zontlhe lezi a mu leleteleko zona.

²⁵Makunu Mosi i lo hlawula xikari ka vanhu va ka Israeli vontlhe vavanuna lava va lulamileko, a va yimisa kuva tinduna ta vanhu. Ti lo maha tinduna ta mazanazana, ni ta mazana, ni ta ntlhanu wa makume, ni ta makume,

²⁶leti ti faneleko ku lamula vanhu zikhati zontlhe. A timhaka leti to karata, va wa ti yisa ka Mosi; leti titsongwani va lamula vona;

²⁷Mosi i lo onekana ni muxade wakwe; yena Jetro a andlamuka aya kabye.