Read tshwa Eksodusi 23 Bible Online

Eksodusi 23 - tshwa bible

Eksodusi 23

¹U nga dzuki u wulawula timhaka ta mawunwa; u nga hlengeli ni wa kubiha u maha kustumunyu wo hemba.

²U nga lanzeli a ntlawa lowu wu mahako kubiha; u nga hlengeli ni xidlemo hubyeni, lexi xi hambukisako a nongameto.

³U nga tsetsi a xisiwana mhakeni ya xona le hubyeni.

⁴Loku u tlhangana ni homu ya nala wa wena, kutani i mbongola, na yi lahlekile, u ta yi heleketa ka nwinyi wa yona.

⁵Loku u wona a mbongola ya loyi a ku vengako na yi tikelwa hi nzhwalo wa yona, u nga mu tsiki yece, u fanele ku mu vuna ku yi tlhatlha.

⁶U nga byeketi a mhaka yi lulamileko ya xisiwana xa ka nwina le hubyeni.

⁷Chava mawunwa. U nga dayi loyi a nga hiko na nanzu ni loyi a lulamileko, hakuva nzi nga ta yimela a munhu wo biha, nzi mu hlaya loyi a lulamileko.

⁸U nga amukeli a zinyikiwo, hakuva zi vala a mahlo ya lava va wonako, kambe zi byeketa a timhaka ta lava va lulamileko le hubyeni.

⁹U nga xanisi a muluveli; nwina ma tiva malakanyo ya muluveli, hakuva nwinawu mu wa hi valuveli le Gipite.

¹⁰Lomu ka ntlhanu wa malembe ni ginwe, wena u ta rima a simu ga wena, u tshovela a mihanzu ya gona.

¹¹Kanilezi hi lembe ga wuntlhanu ni mambiri, u ta gi tsika gi etlela, kasi a zisiwana za tiko ga nwina zaga mihanzu ya kona, zonake lezi zi salako zi ta giwa hi zihari. U ta maha zalezo hi zivina za wena ni maoliva ya wena.

¹²U ta tira mitiro ya wena hi ntlhanu wa masiku ni ginwe, kanilezi u ta humula hi siku ga wuntlhanu ni mambiri; ku ta humula ni homu ya wena, ni mbongola ya wena; ni nʼwana wa khumbi ya wena ni muluveli wa wena, vonawu va ta humula.

¹³Mu ta hlayisa zontlhe lezi nzi mu leleteleko. Mu nga dzuki mu kumbuka a mavito ya vanwani vanungungulu; ngha ma nga zwali milonwini ya nwina.

¹⁴U ta nzi mahela mutlhangano kanharu hi lembe.

¹⁵U ta hlayisa a mutlhangano wa zibaba zi nga comelwangiko; ka masiku ya ntlhanu ni mambiri, hi hweti ya Abibi, u taga a zibaba zi nga comelwangiko khwatsi hilezi u leletelweko; hakuva hi yona a hweti leyi u nga huma ha yona le Gipite. Hikwalaho a vanhu va nga dzuki va woneka mahlweni ka mina na va nga hi na nchumu.

¹⁶U ta hlayisa ni mutlhangano wa kuhula, wu nga wa mihanzu ya ntiro wa wena wa lezi u byeleko masinwini. Va ta hlayisa ni mutlhangano wa kuhlengeletela, kugumeseni ka lembe, loku u hlengeletele a mitiro ya masimu ya wena.

¹⁷A vavanuna va ta woneka mahlweni ka Hosi Jehova kanharu hi lembe.

¹⁸U nga humesi a nkhata wa muphahlo wa mina zinwe ni zibaba zi comelweko; ni mafura ya mutlhangano wa mina ma nga sali kala manziko.

¹⁹A mihanzu yo sangula ya tiko ga wena, u ta yi neha ndlwini ya Jehova, Nungungulu wa wena.

²⁰Languta, nza ruma a ngelosi ya mina mahlweni ka wena, kasi yi fela ku ku hlayisa lomu ndleleni, yi ku chiketa tikweni legi nzi gi longisileko. [62]

²¹Chela kota ha yona, u ingisa a gezu ga yona, u nga yi kaneti, hakuva yi nga ta timisela hi kubiha ka nwina, hakuva yona yi na ni vito ga mina.

²²Kanilezi loku u ingisa a gezu ga yona, u maha zontlhe lezi nzi ta nga ku byela, nzi ta maha a nala wa valala va wena, nzi ku lwela ka lava va ku vukelako.

²³Hakuva a ngelosi ya mina yi ta ku rangela mahlweni, yi ku yisa tikweni ga vaAmori, ni vaHiti, ni vaPerezi, ni vaKanani, ni vaHivi, ni vajebusi, na vona nzi ta va lovisa.

²⁴U nga khizameli vanungungulu vabye, u nga va khozeli, u nga mahi mikhuwo yabye; kanilezi u ta va daya vontlhe, u khungumula zifananiso zabye zontlhe.

²⁵Khozelani Jehova, Nungungulu Wa nwina, zonake i ta katekisa a zakuga za nwina, ni mati ya nwina, a susa mababyi xikari ka nwina.

²⁶Cima ku nga tava ni wasati a ta nga wonhekelwa hi rumbu, kutani wasati wa ngonwa tikweni ga wena. Nzi ta engetela a tsengo wa masiku ya wena.

²⁷Nzi ta rumela kuchabya ka mina mahlweni ka wena, nzi ta hangalasa a vanhu lava u ta nga chikela ka vona; nzi ta panzanya a valala va wena vontlhe.

²⁸Nzi ta rumela a mivi yi ku rangela mahlweni, yi hlongola vaHivi, ni vaKanani, ni vaHiti mahlweni ka wena.

²⁹Nzi nga ta va susa mahlweni ka wena hi lembe ginwe, a tiko gi nga maha xiwula, zonake a zivanza za khwati zi anza, zi mu daya.

³⁰Nzi ta va hlongola mahlweni ka wena hi kutsongwani ni kutsongwani; kasi nza mu nyika a xikhati xa kuva mu anza, mu aka tikweni gontlhe.

³¹Nzi ta panza a mbhingano wa wena kusukela Bimbini go Pswhuka kala bimbini ga maFilistia, ni kusukela xiwuleni kala ku chikela congweni; hakuva nzi ta mu hlulela a vaaki va tiko lego; mu ta va hlongola mahlweni ka nwina. [63]

³²U nga mahi xivumelwano navo, ge hambu ni vanungungulu vabye.

³³Vona va nga aki lomu tikweni ga wena, va nga dzuka va ku onhisa mahlweni ka mina; hakuva loku u khozela a vanungungulu vabye, zonake va tava phanya ka wena.