Read tshwa Eksodusi 24 Bible Online

Eksodusi 24 - tshwa bible

Eksodusi 24

¹Nungungulu aku ka Mosi: Kanziha ka Jehova, wena na Aroni, na Nadabi, na Abihu, ni masingalakati ya ka Israeli ya 70, mu ta khizama na ma ha hi kule.

²Ku ta tshinela Mosi yece mahlweni ka Jehova; a vanwani va nga tshineli; ni vanhu va nga kanzihi zinwe naye.

³Zinghaho Mosi i loya byela a vanhu tontlhe timhaka ta Jehova, ni zileletelo zontlhe. Zonake a vanhu va lo hlamula hi gezu ginwe, vaku: A timhaka tontlhe leti ti wulilweko hi Jehova, hi ta ti maha.

⁴Mosi i lo tsala timhaka tontlhe ta Jehova, zonake i lo vinzuka ni mixo a aka a alati lahasi ka xitsunga, a yimisa a 12 wa timhinga ta maribye, a ku ringanisa a 12 wa tixaka ta ka Israeli.

⁵Zonake i lo ruma a majaha ya ka Israeli a ku nyikela a munyikelo wa kuhiswa, ni muphahlelo wa ku khesa Jehova hi tikuzi.

⁶Mosi i lo hungula wunwani nkhata a chela lomu mingelweni, a wunwani a nwatsekela alatini.

⁷I lo teka ni bhuku ga xivumelwano a gi gonza mahlweni ka vanhu; zonake a vanhu vaku: Zontlhe lezi Jehova a wulileko hi ta zi ingisa, hi zi maha.

⁸Zinghaho Mosi i lo teka a nkhata a nwatsekela vanhu ha wona, aku: Lowu hi nkhata wa xivumelwano lexi Jehova a mahileko zinwe na nwina hi tontlhe leti timhaka. [64]

⁹Zonake Mosi, na Aroni; na Nadabi, na Abihu, ni 70 wa masingalakati ya ka Israeli, va lo kanziha va ya wona Nungungulu wa ka Israeli.

¹⁰Lahasi ka mikonzo yakwe ku wa hi ni xilo xo fanana ni ribye gi vatlilweko ga safira; xi wa ngangamela khwatsi i: tilo.

¹¹Yena a nga tlakusangi a canja gakwe hehla ka tinjinga ta va ka Israeli; kanilezi va lo wona Nungungulu, zonake vaga, vanwa.

¹²Zonake Jehova aku ka Mosi: Kanziha uta leno xitsungeni u ta yima kona; nzi ta ku nyika a timbila ta maribye laya ma nga ni milayo ni zileletelo za mina lezi nzi zi tsalileko, kasi u va gonzisa zona.

¹³Mosi i lo suka zinwe na Joxua, a nanza gakwe; zonake Mosi i lo kanziha xitsungeni xa Nungungulu.

¹⁴Aku ka masingalakati: Yimani kwalaha, hi ta wuya hi ta mu kuma. Mu ta sala na Aroni na Hure; loye a ta ngava ni timhaka i ta ti neha ka vona.

¹⁵Mosi i lo kanziha xitsungeni; zonake a refu gi lo fenengeta xitsunga.

¹⁶A kungangamela ka Jehova ku lo tshama xitsungeni xa Sinai, ni refu gi lo xi fenengeta ntlhanu wa masiku ni ginwe; hi siku ga wuntlhanu ni mambiri i lo vitana Mosi na hi lomu refini.

¹⁷Zonake a kungangamela ka Jehova le hehla ka xitsunga ku lo woneka mahlweni ka vanana va ka Israeli kota nzilo wu vavamelako.

¹⁸Mosi i lo enghena refini, a kanziha xitsungeni a ya tshama kona 40 wa masiku ni 40 wa wusiku.